– ಮಗಳ ಕೃತ್ಯಕ್ಕೆ ತಂದೆಯ ಸಾಥ್
– ಚೀಲದಲ್ಲಿ ಹೆಣ ಒಯ್ದು ಅರಣ್ಯದಲ್ಲಿ ಹೂತರು
ಲಕ್ನೋ: ಪ್ರತಿನಿತ್ಯ ಹಾಸಿಗೆಯಲ್ಲಿ ಶೌಚ ಮಾಡಿದ 5 ವರ್ಷದ ಮಗುವನ್ನ ದೊಡ್ಡಮ್ಮ ಕೊಲೆಗೈದಿರುವ ಘಟನೆ ಉತ್ತರ ಪ್ರದೇಶದ ಫರೂಖಾಬಾದ್ ನಲ್ಲಿ ನಡೆದಿದೆ. ಮಗುವನ್ನ ಕೊಂದ ದೊಡ್ಡಮ್ಮ ಮತ್ತು ಆಕೆಯ ಕೃತ್ಯಕ್ಕೆ ಸಾಥ್ ನೀಡಿದ ತಂದೆಯನ್ನ ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ.
ಐದು ವರ್ಷದ ಯಶ್ ಪ್ರತಾಪ್ ಕೊಲೆಯಾದ ಮಗು. ತಾಯಿ ಇಲ್ಲದ ಕಾರಣ ಯಶ್ ತಂದೆ ರಾಮ್ ಬಹದ್ದೂರ್ ಮಗನನ್ನು ಸೋದರನ ಮನೆಯಲ್ಲಿ ಬಿಟ್ಟಿದ್ದರು. ಓರ್ವ ಮಗಳ ಜೊತೆಯಲ್ಲಿ ಯಶ್ ಜುಜುಟಾ ಗ್ರಾಮದಲ್ಲಿ ವಾಸವಾಗಿದ್ದರು. ದೊಡ್ಡಮ್ಮನ ಆರೈಕೆಯಲ್ಲಿ ಮಗ ಚೆನ್ನಾಗಿ ಬೆಳೆಯುತ್ತಾನೆಂಬ ಭರವಸೆಯಲ್ಲಿ ಯಶ್ ತಂದೆ ನಂಬಿದ್ದರು. ಆದ್ರೆ ರಾಕ್ಷಸಿ ದೊಡ್ಡಮ್ಮ ಕ್ಷುಲ್ಲಕ ಕಾರಣಕ್ಕೆ ಮಗುವಿನ ಉಸಿರನ್ನೇ ನಿಲ್ಲಿಸಿದ್ದಾಳೆ.
ಫರೂಖಾಬದ್ ನಗರದ ನ್ಯೂ ಫೌಜಿ ಕಾಲೋನಿಯ ದೊಡ್ಡಪ್ಪ-ದೊಡ್ಡಮ್ಮನೊಂದಿಗೆ ಯಶ್ ವಾಸವಾಗಿದ್ದನು. ಆದ್ರೆ ಯಶ್ ರಾತ್ರಿ ಹಾಸಿಗೆಯಲ್ಲಿಯೇ ಶೌಚ ಮಾಡುತ್ತಿದ್ದನು. ಬೆಳಗ್ಗೆ ದೊಡ್ಡಮ್ಮನಿಗೆ ಇದನ್ನ ಸ್ವಚ್ಛಗೊಳಿಸುವುದು ದೊಡ್ಡ ಕೆಲಸವಾಗಿತ್ತು. ಫೆಬ್ರವರಿ 6ರಂದು ಎಂದಿನಂತೆ ಯಶ್ ಹಾಸಿಗೆಯಲ್ಲಿಯೇ ಶೌಚ ಮಾಡಿದ್ದನು. ಇದರಿಂದ ರಾಕ್ಷಸಿ ರೂಪ ತಾಳಿದ ದೊಡ್ಡಮ್ಮ ಮಗುವನ್ನ ಮನಸೋಯಿಚ್ಛೆ ಥಳಿಸಿದ್ದಾಳೆ. ಪರಿಣಾಮ ಯಶ್ ಸಾವನ್ನಪ್ಪಿದ್ದಾನೆ.
ಮಗು ಸಾವನ್ನಪ್ಪುತ್ತಲೇ ಮಹಿಳೆ ತನ್ನ ತಂದೆಗೆ ವಿಷಯ ತಿಳಿಸಿ ಸಹಾಯ ಮಾಡುವಂತೆ ಕೇಳಿಕೊಂಡಿದ್ದಾಳೆ. ಮಗಳ ಸಹಾಯಕ್ಕೆ ಬಂದ ವೃದ್ಧ, ಶವವನ್ನ ಬ್ಯಾಗಿನಲ್ಲಿ ತುಂಬಿಕೊಂಡು ಅರಣ್ಯ ಪ್ರದೇಶದಲ್ಲಿ ಹೂತು ಹಾಕಿ ಬಂದಿದ್ದನು. ಸಂಜೆ ಯಶ್ ಕಾಣಿಸುತ್ತಿಲ್ಲ ಎಂದು ದೊಡ್ಡಮ್ಮ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಳು.
ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ ಪೊಲೀಸರಿಗೆ ಆರಂಭದಲ್ಲಿಯೇ ದೊಡ್ಡಮ್ಮಳ ಮೇಲೆ ಅನುಮಾನ ವ್ಯಕ್ತಪಡಿಸಿದರು. ವಶಕ್ಕೆ ಪಡೆದು ವಿಚಾರಣೆ ತೀವ್ರಗೊಳಿಸಿದಾಗ ಸತ್ಯ ಬಾಯಿ ಬಿಟ್ಟದ್ದಾಳೆ. ಮಹಿಳೆ ಹೇಳಿಕೆಯನ್ನಾಧಾರಿಸಿ ಆಕೆಯ ತಂದೆಯನ್ನ ಸಹ ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.
