ವಿಂಡೋಸೀಟ್ ಚಿತ್ರದ `ಖಾಲಿ ಆಕಾಶ’ ಲಿರಿಕಲ್ ವಿಡಿಯೋ ಸಾಂಗ್ ರಿಲೀಸ್..!!

ಬೆಂಗಳೂರು: ರೋಮ್ಯಾಂಟಿಕ್ ಥ್ರಿಲ್ಲರ್ ಕಥಾ ಹಂದರ ಒಳಗೊಂಡಿರುವ `ವಿಂಡೋಸೀಟ್’ ಚಿತ್ರದ ಎರಡನೇ ಲಿರಿಕಲ್ ವಿಡಿಯೋ ಸಾಂಗ್ ಬಿಡುಗೆಯಾಗಿದೆ. ಅತಿ ಚೆಂದದ ಹೂ ಗೊಂಚಲು ಹಾಡಿನ ಸೂಪರ್ ಸಕ್ಸಸ್ ನಂತರ `ಖಾಲಿ ಆಕಾಶ ನನ್ನೇ ನೋಡಿದೆ’ ಹಾಡಿನ ಲಿರಿಕಲ್ ವಿಡಿಯೋವನ್ನು ಚಿತ್ರತಂಡ ಬಿಡುಗಡೆ ಮಾಡಿದೆ.

ಕವಿರಾಜ್ ಸಾಹಿತ್ಯ ಕೃಷಿಯಲ್ಲಿ ಅರಳಿದ ಪ್ಯಾಥೋ ಸಾಂಗ್‍ಗೆ ಮ್ಯಾಜಿಕಲ್ ಕಂಪೋಸರ್ ಅರ್ಜುನ್ ಜನ್ಯ ಸಂಗೀತ, ಸ್ವರ ಮಾಂತ್ರಿಕ ವಿಜಯ್ ಪ್ರಕಾಶ್ ದನಿ ಹೊಸದೊಂದು ಸ್ಪರ್ಶ ನೀಡಿದೆ. ಹೊಸತನದಿಂದ ಕೂಡಿದ ಈ ಹಾಡಿಗೆ ಗಾನಪ್ರಿಯರು ತಲೆದೂಗಿದ್ದಾರೆ.

ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ, ಗಾಯಕ ವಿಜಯ್ ಪ್ರಕಾಶ್ ಇಬ್ಬರ ತಲ್ಲೀನತೆ ಲಿರಿಕಲ್ ವಿಡಿಯೋದಲ್ಲಿ ನೋಡುಗರನ್ನು ಸೆಳೆಯದೇ ಇರದು. ವಿಶೇಷ ಅಂದ್ರೆ `ಖಾಲಿ ಆಕಾಶ’ `ವಿಂಡೋಸೀಟ್’ ಚಿತ್ರ ತಂಡಕ್ಕೂ ಬಲು ಅಚ್ಚುಮೆಚ್ಚಿನ ಸಾಂಗ್ ಆಗಿದೆ. ಈ ಬಗ್ಗೆ ಸ್ವತಃ ಚಿತ್ರದ ನಿರ್ದೇಶಕಿ ಶೀತಲ್ ಶೆಟ್ಟಿ ಸೋಶಿಯಲ್ ಮೀಡಿಯಾದಲ್ಲಿ ಹೇಳಿಕೊಂಡಿದ್ದಾರೆ.

ರಂಗಿತರಂಗ ಖ್ಯಾತಿಯ ನಿರೂಪ್ ಭಂಡಾರಿ ನಟನೆಯ ಬಹುನಿರೀಕ್ಷಿತ ಚಿತ್ರಕ್ಕೆ ಶೀತಲ್ ಶೆಟ್ಟಿ ಮೊದಲ ಬಾರಿ ಆ್ಯಕ್ಷನ್ ಕಟ್ ಹೇಳಿದ್ದು, ನಿರೂಪ್ ಭಂಡಾರಿಗೆ ಜೋಡಿಯಾಗಿ ಸಂಜನಾ ಆನಂದ್, ಅಮೃತ ಐಯ್ಯಂಗಾರ್ ನಾಯಕ ನಟಿಯರಾಗಿ ತೆರೆಹಂಚಿಕೊಂಡಿದ್ದಾರೆ. ಚಿತ್ರಕ್ಕೆ ಜಾಕ್ ಮಂಜು ಬಂಡವಾಳ ಹಾಕಿದ್ದು, ವಿಘ್ನೇಶ್ ರಾಜ್ ಕ್ಯಾಮೆರಾ ಕಣ್ಣಲ್ಲಿ ವಿಂಡೋಸೀಟ್ ಸಿನಿಮಾ ಸೆರೆಯಾಗಿದೆ. ಲೇಖಾ ನಾಯ್ಡು, ಮಧುಸೂದನ್ ರಾವ್, ರವಿಶಂಕರ್, ಸೂರಜ್ ಸೇರಿದಂತೆ ಹಲವು ಕಲಾವಿದರು ಚಿತ್ರದಲ್ಲಿ ಬಣ್ಣಹಚ್ಚಿದ್ದಾರೆ.