– ವೀಡಿಯೋ ವೈರಲ್ ಬಳಿಕ ಎಚ್ಚೆತ್ತ ಪೊಲೀಸರು
– ಶಾಂತಿ ಉಲ್ಲಂಘನೆಯಡಿ ಪ್ರಕರಣ
ಮುಂಬೈ: ಗೆಳೆಯನ ಹುಟ್ಟುಹಬ್ಬದಲ್ಲಿ ಯುವಕರು ಸೇರಿ ಮೊಟ್ಟೆ ಎಸೆಯುವ ಪಾರ್ಟಿ ಮಾಡಲಾಗಿತ್ತು. ಇದರ ವೀಡಿಯೋ ವೈರಲ್ ಆದ ನಂತರ ಆರು ಜನ ಸ್ನೇಹಿತರ ಮೇಲೆ ಪೊಲೀಸರು ಪ್ರಕರಣ ದಾಖಲಿಸಿ ಬಂಧಿಸಿರುವ ಘಟನೆ ಪುಣೆಯಲ್ಲಿ ನಡೆದಿದೆ.
ಈ ಘಟನೆ ಜುನ್ನಾರ್ ತಹಸಿಲ್‍ನ ನಾರಾಯಣ್ ಗ್ರಾಮದಲ್ಲಿ ನಡೆದಿದೆ. ಬಂಧಿತರನ್ನು ಸಕ್ಲೀನ್ ನಾಸಿರ್ ಅತಾರ್, ಶಕೀರ್ ಆಮೆನ್ ಜಮದಾರ್, ಅರ್ಮಾನ್ ಖಾಲಿದ್ ಶೇಖ್, ಮೊಯಿನ್ ಎಕ್ಲಾಕ್ ಅಟಾರ್, ಮೊಹ್ಸೆನ್ ಫಿರೋಜ್ ಇನಾಮ್ದಾರ್ ಮತ್ತು ಜಾಹಿದ್ ಪಿರ್ ಮೊಹಮ್ಮದ್ ಪಟೇಲ್ ಎಂದು ಗುರುತಿಸಲಾಗಿದೆ. ಈ ಯುವಕರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
ಗೆಳೆಯನ ಹುಟ್ಟುಹಬ್ಬದ ಸಂಭ್ರಮವನ್ನು ವಿಭಿನ್ನವಾಗಿ ಆಚರಿಸಲು ಯುವಕರು ಪ್ಲ್ಯಾನ್ ಮಾಡಿಕೊಂಡರು. ಅಂತೆಯೇ ಒಬ್ಬರಿಗೊಬ್ಬರು ಮೊಟ್ಟೆ ಎಸೆದುಕೊಂಡು ಸಂಭ್ರಮಿಸಿದ್ದಾರೆ. ಈ ಸೆಲೆಬ್ರೆಷನ್ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಪುಣೆಯ ಜುನ್ನಾರ್ ಪೊಲೀಸರ ಗಮನಕ್ಕೆ ಈ ವೀಡಿಯೋ ಬಂದಿದೆ. ನಂತರ ಪೊಲೀಸರು ಈ 6 ಜನ ಯುವಕರ ಮೇಲೆ ಶಾಂತಿ ಉಲ್ಲಂಘನೆ ಪ್ರಕರಣ ದಾಖಲಿಸಿ ಬಂಧಿಸಿದ್ದಾರೆ.
ಪೊಲೀಸರು ಹೇಳುವ ಪ್ರಕಾರ ಸಕ್ಲೀನ್ ನಾಸಿರ್ ಅತಾರ್ ಎಂಬ ಯುವಕನ ಹುಟ್ಟುಹಬ್ಬದ ಸಂಭ್ರಮವನ್ನು ಸ್ನೇಹಿತರೆಲ್ಲ ಸೇರಿ ಈ ರೀತಿಯಾಗಿ ಆಚರಿಸಿದ್ದಾರೆ. ಇದು ಮೊದಲ ಪ್ರಕರಣವಲ್ಲದಿದ್ದರು, ಇಂಹತ ಅನೇಕ ಪ್ರಕರಣಗಳು ನಡೆದಿವೆ ಎಂದು ಹೇಳಿದ್ದಾರೆ.
