– ಅರವಳಿಕೆ ಇಂಜೆಕ್ಷನ್ ನೀಡಿ ಬ್ಲೇಡ್‍ನಿಂದ ಗಾಯ
ಹೈದರಾಬಾದ್‍: ಟೆಕ್ಕಿಯೊಬ್ಬ ಮದುವೆಯ ಮೊದಲ ರಾತ್ರಿ ಪತ್ನಿಗೆ ಅರವಳಿಕೆಯ ಇಂಜೆಕ್ಷನ್ ನೀಡಿ ಚಿತ್ರ ಹಿಂಸೆ ಕೊಟ್ಟು, ಸೈಕೋ ನಂತೆ ವರ್ತಿಸಿರುವ ಘಟನೆ ನಡೆದಿದೆ.
ಹೈದರಾಬಾದ್‍ನಲ್ಲಿ ಸಾಫ್ಟ್‍ವೇರ್ ಎಂಜಿನಿಯರ್ ಆಗಿ ಕೆಲಸ ಮಾಡುವ ಗುಂಟೂರು ಮೂಲದ ಯುವತಿ, ಹೈದರಾಬಾದ್‍ನಲ್ಲಿ ಟೆಕ್ಕಿ ಆಗಿರುವ ಪ್ರಕಾಶಂ ಜಿಲ್ಲೆಯ ಯುವಕನನ್ನು ಮದುವೆಯಾಗಿದ್ದಳು.
ಮದುವೆ ನಂತರ ಹೊಸ ಜೀವನಕ್ಕೆ ಕಾಲಿಟ್ಟ ಯುವತಿ ವೈವಾಹಿಕ ಜೀವನದ ಕನಸು ಕಂಡಿದ್ದಳು. ಆದರೆ ಟೆಕ್ಕಿ ಪತಿ, ಪತ್ನಿಗೆ ಅರವಳಿಕೆ ಇಂಜೆಕ್ಷನ್ ನೀಡಿ, ಬ್ಲೇಡ್ ನಿಂದ ಆಕೆಗೆ ಗಾಯವನ್ನು ಮಾಡಿದ್ದಾನೆ. ಪತಿ ವಿಚಿತ್ರ ವರ್ತನೆಯನ್ನು ನೋಡಿ ಪತ್ನಿ ಹೆದರಿದ್ದಾಳೆ. ಪತಿ ಸರಿ ಹೋಗ ಬಹುದು ಎಂದು ಕಾದಿದ್ದಾಳೆ. ಆದರೆ ಪತಿಯ ವರ್ತನೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಾ ಹೋದಾಗ ಯುವತಿ ಪೋಷಕರಿಗೆ ತಿಳಿಸಿದ್ದಾಳೆ.
ವಧುವಿನ ತಂದೆ ವರನ ಪೋಷಕರಲ್ಲಿ ಪ್ರಶ್ನೆ ಮಾಡಿದ್ದಾರೆ. ಆದರೆ ಇದರಿಂದ ಕುಪಿತಗೊಂಡ ವರನ ತಂದೆ ನಿಮ್ಮ ಮಗಳು ಕೆಲಸಕ್ಕೆ ಬಾರದವಳು ಎಂದು ಹೀಯಾಳಿಸಿದ್ದಾರೆ. ಇದಾದ ಬಳಿಕ ವಧುವಿನ ಪಾಲಕರು ಗುಂಟೂರು ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ದೂರಿಗೆ ಸ್ಪಂದಿಸಿರುವ ಎಸ್‍ಪಿ ಪ್ರಕರಣವನ್ನು ನರಸರಾವ್‍ಪೇಟೆಗೆ ವರ್ಗಾಹಿಸಿ ತನಿಖೆಗೆ ಆದೇಶಿಸಿದ್ದಾರೆ.
