ಪ್ರಿಯತಮನ ಜೊತೆ ಸೇರಿ ಪತಿಯನ್ನು ಕೊಲೆ ಮಾಡಿದ್ದ ಪತ್ನಿ ಅರೆಸ್ಟ್

ಬೆಂಗಳೂರು: ಪ್ರಿಯತಮನೊಂದಿಗೆ ಸೇರಿಕೊಂಡು ತನ್ನ ಸ್ವಂತ ಪತಿಯನ್ನೆ ಮಾರಕಾಸ್ತ್ರಗಳಿಂದ ಕೊಲೆ ಮಾಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುದ್ದಗುಂಟೆಪಾಳ್ಯ ಠಾಣೆ ಪೊಲೀಸರು ಪತ್ನಿ ತಸ್ಲೀಮ್ ಬಾನು ಸೇರಿ 9 ಮಂದಿಯನ್ನು ಬಂಧಿಸಿದ್ದಾರೆ.

ಮೊಹಮ್ಮದ್ ಶಫಿ ಎಂಬಾತನನ್ನು ಮಾರ್ಚ್ 19 ರಂದು ಮಾರಕಾಸ್ತ್ರಗಳಿಂದ ಕೊಲೆ ಮಾಡಲಾಗಿತ್ತು. ಈ ಪ್ರಕರಣವನ್ನು ಭೇದಿಸಿರುವ ಪೊಲೀಸರು ಮೃತ ಮೊಹಮ್ಮದ್ ಶಫಿ ಪತ್ನಿ ತಸ್ಲೀಮ್ ಬಾನು ಸೇರಿ ಇತರ ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ತಸ್ಲೀಮ್ ಬಾನು ಮದುವೆಯಾಗಿದ್ದರು ಕೂಡ, ಅಫ್ಸರ್ ಖಾನ್ ಎಂಬಾತನನ್ನ ಇಷ್ಟಪಡುತ್ತಿದ್ದಳು. ರಿಯಲ್ ಎಸ್ಟೇಟ್ ಉದ್ಯಮಿಯಾಗಿದ್ದ ಆರೋಪಿ ಅಫ್ಸರ್ ಖಾನ್, ಮೃತ ಮೊಹಮ್ಮದ್ ಶಫಿ ಮೂಲಕ ರಿಯಲ್ ಎಸ್ಟೇಟ್ ನಲ್ಲಿ 75 ಲಕ್ಷ ರೂ. ಹಣವನ್ನು ಹೂಡಿಕೆ ಮಾಡಿದ್ದ. ನಂತರ ಐದು ಲಕ್ಷ ಹಣವನ್ನು ಕಮಿಷನ್ ಕೊಡೋದಾಗಿ ಮಹಮ್ಮದ್ ಶಫಿಯನ್ನು ಕರೆಸಿದ್ದ ಅಫ್ಸರ್ ಖಾನ್, ಸಹಚರರೊಂದಿಗೆ ಸೇರಿ ಕೊಲೆ ಮಾಡಿದ್ದ.

ಮೊಹಮ್ಮದ್ ಶಫಿಯನ್ನು ಕೊಲೆ ಮಾಡಲು ತಬ್ರೇಜ್ ಹಾಗೂ ವಸೀಂ ಎಂಬುವವರಿಗೆ ಸುಪಾರಿ ನೀಡಿದ್ದ ಅಫ್ಸರ್ ಖಾನ್ ಕಮಿಷನ್ ಹಣ ಕೊಡ್ತಿನಿ ಅಂತ ಗುರಪ್ಪನಪಾಳ್ಯ ಬಳಿ ಕರೆಸಿಕೊಂಡು ಮಾರಕಾಸ್ತ್ರಗಳಿಂದ ದಾಳಿ ಮಾಡಿ ಮೊಹಮ್ಮದ್ ಶಫಿ ಅವರನ್ನು ಕೊಚ್ಚಿ ಕೊಲೆ ಮಾಡಿದ್ದಾನೆ. ಪ್ರಕರಣದ ಜಾಡು ಹಿಡಿದು ಪೊಲೀಸರು ತನಿಖೆ ನಡೆಸಿದ ವೇಳೆ ಪ್ರಕರಣದಲ್ಲಿ ಪತ್ನಿ ತಸ್ಲೀಮ್ ಬಾನು ಮತ್ತು ಆಕೆಯ ಪ್ರಿಯಕರ ಅಫ್ಸರ್ ಖಾನ್ ಸೇರಿ 9 ಮಂದಿಯ ಕೈವಾಡವಿರುವುದು ಬೆಳಕಿಗೆ ಬಂದಿದೆ. ಕೂಡಲೇ ಸುದ್ದಗುಂಟೆಪಾಳ್ಯ ಠಾಣೆ ಪೊಲೀಸರು ಆರೋಪಿಗಳನ್ನು ಬಂಧಿಸಿದ್ದಾರೆ.