ಬೆಂಗಳೂರು: ಬಿಗ್ ಬಾಸ್ ಮನೆಯಲ್ಲಿ ನಾಲ್ಕು ದಿನಗಳು ಕಳೆದಿವೆ. ಕೆಲವರು ಮೊದಲ ನೋಟ, ಭೇಟಿಯಲ್ಲೇ ಬೆರೆತುಕೊಂಡಿದ್ದಾರೆ. ಅಂತೆಯೇ ಯಾರನ್ನು ನೀವು ಎಷ್ಟು ಅರಿತುಕೊಂಡಿದ್ದಾರೆ ಎನ್ನುವುದಕ್ಕೆ ಸೂಕ್ತ ಕಾರಣವನ್ನು ಕೊಟ್ಟು ಲೈಕ್ ಮತ್ತು ಡಿಸ್‍ಲೈಕ್‍ಗಳನ್ನು ಮನೆಯ ಸದಸ್ಯರಿಗೆ ನೀಡಬೇಕು ಎಂದು ಬಿಗ್‍ಬಾಸ್ ಸೂಚಿಸಿದ್ದರು.
ಮನೆಯಲ್ಲಿರುವ ಸದಸ್ಯರಲ್ಲಿ ಪ್ರಶಾಂತ್ ಸಂಬರ್ಗಿ ಕೊಂಚ ಡಿಫ್ರೆಂಟ್ ಎನ್ನುವುದರಲ್ಲಿ ಎರಡು ಮಾತಿಲ್ಲ. ಪ್ರಶಾಂತ್ ನಡವಳಿಕೆ ಕುರಿತಾಗಿ ಮನೆಯ ಸದಸ್ಯರಲ್ಲಿ ಭಿನ್ನವಾದ ಅಭಿಪ್ರಾಯಗಳಿವೆ. ಮನೆಯ ಸದಸ್ಯರು ಯಾರು ಮೆಚ್ಚಿಕೊಳ್ಳಲ್ಲ ಎಂದು ವೀಕ್ಷಕರು ಅಂದುಕೊಂಡಿದ್ದರು. ಆದರೆ ಮನೆಯ ಒಳಗೆ ಇರುವ ಒಬ್ಬ ಸದಸ್ಯೆ ಮಾತ್ರ ಸಂಬರ್ಗಿಗೆ ಲೈಕ್ ಒತ್ತಿದ್ದಾರೆ.
ಬಿಗ್ ಮನೆಯಲ್ಲಿ ಪ್ರಶಾಂತ್ ಸಂಬರ್ಗಿ ನೇರ ವ್ಯಕ್ತಿತ್ವ, ಖಡಕ್ ಆಗಿ ಮಾತನಾಡುವುದು, ಕೆಲವಷ್ಟು ವಿಚಾರಗಳಿಗೆ ಮನೆಯಲ್ಲಿರುವ ಸದಸ್ಯರ ವಿರುದ್ಧವಾಗಿ ನಡೆದುಕೊಳ್ಳುವ ನಡುವಳಿಕೆ ಸ್ಪರ್ಧಿಗಳಿಗೆ ಮಾತ್ರವಲ್ಲದೆ ವೀಕ್ಷಕರಿಗೂ ಅಚ್ಚರಿಯನ್ನು ಮೂಡಿಸಿರುವುದಂತೂ ಸತ್ಯ.
ಆದರೆ ಬಿಗ್ ಬಾಸ್ ನೀಡಿದ ಟಾಸ್ಕ್ ಅನ್ವಯ ಪ್ರಶಾಂತ್ ಅವರಿಗೆ ಲೈಕ್ ಬರುವುದೆ ಇಲ್ಲ ಎಂದುಕೊಂಡಿದ್ದ ವೇಳೆ ಅವರಿಗೂ ಒಂದು ಲೈಕ್ ಬಂದಿದೆ. ಹೌದು ಧನುಶ್ರೀ ಅವರು ಪ್ರಶಾಂತ್ ಸಂಬರ್ಗಿ ಅವರನ್ನು ಮೆಚ್ಚಿ ಲೈಕ್ ಕೊಟ್ಟಿದ್ದಾರೆ. ಈ ವೇಳೆ ಮಂಜು ಪಾವಗಡ ಬದಲಾಗ್ಬೇಡ ಮಾವ ನೀನು ಎಂದು ಜೋರಾಗಿ ಹೇಳಿದ್ದಾರೆ. ಈ ವೇಳೆ ಮನೆ ಮಂದಿ ಎಲ್ಲಾ ನಕ್ಕು ಸಂತೋಷಪಟ್ಟಿದ್ದಾರೆ.
ತನಗೆ ಲೈಕ್ ನೀಡಿದ ಧನುಶ್ರೀಯನ್ನು ಪ್ರಶಾಂತ್ ಸಂಬರ್ಗಿ ಎತ್ತಿಕೊಂಡು ಸಂತೋಷಪಟ್ಟಿದ್ದಾರೆ. ಈ ಮನೆಯಲ್ಲಿ ಕೃತಜ್ಞತೆಗೆ ಅವಕಾಶ ಇಲ್ಲ ಎಂಬುದು ತಿಳಿಯಿತ್ತು ಎಂದು ಮನೆಯ ಸದಸ್ಯರೊಂದಿಗೆ ಪ್ರಶಾಂತ್ ಹೇಳಿಕೊಂಡಿದ್ದಾರೆ. ಯಾಕಂದ್ರೆ ಈ ಹಿಂದೆ ನಿರ್ಮಲಾ ಅವರಿಗೆ ಬ್ಯಾಗ್ ನೀಡುವ ಮೂಲಕ ಹೆಲ್ಪ್ ಮಾಡಿದ್ದರು. ಆದರೆ ಇದೀಗ ನಿರ್ಮಲಾ, ಪ್ರಶಾಂತ್ ಅವರಿಗೆ ಡಿಸ್‍ಲೈಕ್ ನೀಡಿರುವುದು ಬೇಸರ ತರಿಸಿದೆ.
