ನವದೆಹಲಿ: ತಾಯಿಯನ್ನು ಹೀಯಾಳಿಸಿದ ಸಂಬಂಧಿಕರಿಗೆ ಮಗನೋರ್ವ ಇನ್ಸ್ಟಾ ಮೂಲಕ ತರಾಟೆಗೆ ತೆಗೆದುಕೊಂಡಿರುವ ಪೋಸ್ಟ್ವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
54 ವರ್ಷದ ತಾಯಿ ಕುಟುಂಬದ ಒಂದು ಕಾರ್ಯಕ್ರಮದಲ್ಲಿ ರೆಡ್ ಲಿಪ್ಸ್ಟಿಕ್ ಹಾಕಿ ಹೋಗಿರುತ್ತಾರೆ. ಈ ಕಾರಣಕ್ಕೆ ಅಲ್ಲಿಂದ ಅವರ ಸಂಬಂಧಿಕರು ಅವರನ್ನು ಹೀಯಾಳಿಸುತ್ತಾರೆ. ಆಗ ತಾಯಿಯ ಪರವಾಗಿ ನಿಂತ ಮಗ ತಾನು ರೆಡ್ ಲಿಪ್ಸ್ಟಿಕ್ ಹಾಕಿ ಸಂಬಂಧಿಕರಿಗೆ ಶಾಕ್ ನೀಡಿದ್ದಾರೆ. ಸದ್ಯ ಈ ಬಗ್ಗೆ ಮಗ ಹಾಕಿರುವ ಇನ್ಸ್ಟಾಗ್ರಾಮ್ ಪೋಸ್ಟ್ ವೊಂದು ಸಖತ್ ವೈರಲ್ ಆಗಿದೆ.
ಪೋಸ್ಟ್ ನಲ್ಲಿ ಏನಿದೆ?
ಪುಷ್ಪಕ್ ಸೆನ್ ತಮ್ಮ ತಾಯಿಯ ಬಗ್ಗೆ ಪೋಸ್ಟಿನಲ್ಲಿ ಬರೆದಿದ್ದು, 54 ವರ್ಷದ ನನ್ನ ತಾಯಿ ಫ್ಯಾಮಿಲಿ ಕಾರ್ಯಕ್ರಮದಲ್ಲಿ ರೆಡ್ ಲಿಪ್ಸ್ಟಿಕ್ ಹಾಕಿದ್ದಕ್ಕೆ ನಮ್ಮವರೇ ಆದ ಕೆಲ ಸಂಬಂಧಿಕರು ಹೀಯಾಳಿಸಿದರು. ನಂತರ ನಾನು ರೆಡ್ ಲಿಪ್ಸ್ಟಿಕ್ ತೊಟ್ಟು ನಮ್ಮ ಸಂಬಂಧಿಕರಿಗೆ ಗುಡ್ ಮಾರ್ನಿಂಗ್, ಬೇಗ ಮೇಲೇಳಿ ಎಂದು ಫೋಟೋ ಕಳುಹಿಸಿದ್ದೆ. ನಮ್ಮ ಸಂಬಂಧಿಕರ ಮಕ್ಕಳು ಕೂಡ ಸಾಮಾಜಿಕ ಜಾಲತಾಣದಲ್ಲಿ ಗಾಸಿಪ್ಗೆ ಒಳಗಾಗಿದ್ದಾರೆ. ಆದರೆ ಅದರ ಬಗ್ಗೆ ನಮ್ಮ ಸಂಬಂಧಿಕರು ಮಾತನಾಡುವುದಿಲ್ಲ ಎಂದು ಬರೆದುಕೊಂಡಿದ್ದಾರೆ.
ಜೊತೆಗೆ ನಾನು ಮುಖದ ತುಂಬ ಗಡ್ಡ ಇದ್ದರೂ ರೆಡ್ ಲಿಪ್ಸ್ಟಿಕ್ ಹಾಕಿದ್ದೇನೆ. ಸಾಮಾಜದಲ್ಲಿ ನನ್ನ ತಾಯಿಯಂತೆ ಮಾತಿನ ಬೆದರಿಕೆಗೆ ಒಳಗಾಗುವ ಎಲ್ಲ ತಾಯಿಯರು, ತಂಗಿಯರು ಮತ್ತು ಮಗಳು ಜೊತೆಗೆ ನಾನು ನಿಂತಿದ್ದೇನೆ. ಜೊತೆಗೆ ನನ್ನಂತೆ ಎಲ್ಲ ನನ್ನ ಸಹೋದರರು ನನ್ನ ತಾಯಿಯಂತೆ ಮಾತಿನ ಬೆದರಿಕೆಗೆ ಒಳಾಗಾದ ಎಲ್ಲ ಹೆಣ್ಣುಮಕ್ಕಳ ಪರವಾಗಿ ನಿಲ್ಲುವಂತೆ ಕೇಳಿಕೊಳ್ಳುತ್ತೇನೆ ಎಂದು ಮನವಿ ಮಾಡಿದ್ದಾರೆ.
ಪುಷ್ಪಕ್ ಅವರ ಈ ಪೋಸ್ಟ್ ನೆಟ್ಟಿಗರ ಮನ ಗೆದ್ದಿದ್ದು, ಈಗಾಗಲೇ 4 ಸಾವಿರ ಜನ ಪೋಸ್ಟ್ ಅನ್ನು ಶೇರ್ ಮಾಡಿಕೊಂಡಿದ್ದಾರೆ. ಜೊತೆಗೆ ಸುಮಾರು 13 ಸಾವಿರ ಜನ ಪೋಸ್ಟ್ ಅನ್ನು ಇಷ್ಟಪಟ್ಟಿದ್ದಾರೆ. ಹಲವರು ಕಮೆಂಟ್ ಮಾಡಿ ಪುಷ್ಪಕ್ ಅವರ ತೀರ್ಮಾನಕ್ಕೆ ಮೆಚ್ಚುಗೆ ಸೂಚಿಸಿದ್ದಾರೆ.