– ತನಿಖೆಯ ವೇಳೆ ಬಯಲಾಯ್ತು ಸತ್ಯ
– ಪೊಲಿಸರ ಮುಂದೆ ಆರೋಪಿ ಹೇಳಿದ್ದೇನು..?
ಗಾಂಧಿನಗರ: ಗರ್ಭಿಣಿ ಲಿವ್ ಇನ್ ಪಾರ್ಟ್ನರ್ ನ ಕೊಲೆಗೈದ ಪ್ರಕರಣಕ್ಕೆ ಸಂಬಂಧಿಸಿದಂತೆ ವ್ಯಕ್ತಿಯೊಬ್ಬನನ್ನು ಗುಜರಾತ್ ಪೊಲೀಸರು ಬಂಧಿಸಿದ್ದಾರೆ.
ಮೃತ ದುರ್ದೈವಿಯನ್ನು ರಶ್ಮಿ ಕಟಾರಿಯಾ ಎಂದು ಗುರುತಿಸಲಾಗಿದೆ. ಈಕೆಯ ಮೃತದೇಹ ಆರೋಪಿ ಜೊತೆ ವಾಸವಾಗಿರುವ ಮನೆಯಿಂದ 22 ಕಿ.ಮೀ ದೂರದಲ್ಲಿರುವ ಆಕೆಯ ತಂದೆಯ ಕೃಷಿ ಭೂಮಿಯಲ್ಲಿ ದೊರೆತಿದೆ.
ನವೆಂಬರ್ 14ರಂದು ರಶ್ಮಿ ತನ್ನ 3 ವರ್ಷದ ಮಗನನ್ನು ತಾಯಿ ಮನೆಯಲ್ಲಿ ಬಿಟ್ಟು ಬಳಿಕ ಅಲ್ಲಿಂದ ಯಾವುದೇ ಸುಳಿವು ಇಲ್ಲದೆ ಕಾಣೆಯಾಗಿಯಾಗಿದ್ದಳು. ರಶ್ಮಿ ಕಾಣೆಯಾದ ಬಳಿಕ ಹೆತ್ತವರು ಹುಡುಕಾಟ ಆರಂಭಿಸಿದ್ದಾರೆ. ಹಲವು ದಿನಗಳ ಕಾಲ ಹುಡುಕಾಡಿದರೂ ರಶ್ಮಿ ಎಲ್ಲಿಯೂ ಪತ್ತೆಯಾಗಿರಲಿಲ್ಲ. ಕೊನೆಗೆ ಆಕೆಯ ಕುಟುಂಬ ಪೊಲೀಸರಿಗೆ ದೂರು ನೀಡಿದೆ. ಆಗ ಆಕೆ 5 ತಿಂಗಳ ಗರ್ಭಿಣಿ ಎಂಬುದು ಬಯಲಾಯಿತು.
ಈಕೆ ಕಳೆದ 5 ವರ್ಷಗಳಿಂದ ಚಿರಾಗ್ ಪಟೇಲ್ ಎಂಬ ವ್ಯಕ್ತಿಯ ಜೊತೆ ಲಿವ್-ಇನ್-ರಿಲೇಷನ್‍ಶಿಪ್ ನಲ್ಲಿದ್ದಳು ಎಂಬುದಾಗಿ ಕುಟುಂಬ ಕೂಡ ತಿಳಿಸಿದೆ. ಇತ್ತ ರಶ್ಮಿ ನಾಪತ್ತೆ ದೂರನ್ನು ಸ್ವೀಕರಿಸಿದ ಪೊಲೀಸರು ಆಕೆಗಾಗಿ ಹುಡುಕಾಟ ಆರಂಭಿಸಿದರು. ಈ ಮಧ್ಯೆ ಚಿರಾಗ್ ನನ್ನು ಕೂಡ ಪೊಲೀಸರು ತನಿಖೆ ನಡೆಸಿದ್ದಾರೆ. ವಿಚಾರಣೆ ವೇಳೆ ರಶ್ಮಿಯನ್ನು ಕೊಂದಿದ್ದಾಗಿ ಚಿರಾಗ್ ಒಪ್ಪಿಕೊಂಡಿದ್ದಾನೆ.
ಕತ್ತು ಹಿಸುಕಿ ಕೊಲೆ ಮಾಡಿ ಆಕೆಯ ಶವವನ್ನು ತಂದೆಯ ಕೃಷಿಭೂಮಿಗೆ ಕೊಂಡೊಯ್ದು, ಜೆಸಿಬಿಯಿಂದ ಗುಂಡಿ ತೋಡಿ ದೇಹವನ್ನು ಹೂತುಹಾಕಿರುವುದಾಗಿ ಪೊಲೀಸರ ಬಳಿ ಚಿರಾಗ್ ತಿಳಿಸಿದ್ದಾನೆ. ಮೃತದೇಹವನ್ನು ವಶಕ್ಕೆ ಪಡೆದದುಕೊಂಡು, ಅದನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ.
ಈ ಮಧ್ಯೆ ಗುಜರಾತ್ ಪೊಲೀಸರು ಚಿರಾಗ್ ನನ್ನು ಬಂಧಿಸಿದ್ದಾರೆ. ಬಂಧಿಸಿದ ಬಳಿಕ ಹೆಚ್ಚಿನ ವಿಚಾರಣೆ ನಡೆಸಿದ ವೇಳೆ ಇತ್ತೀಚೆಗೆ ಆಕೆ ತನ್ನ ಜೊತೆ ಹೆಚ್ಚು ಜಗಳವಾಡುತ್ತಿದ್ದಳು. ಈ ಹಿನ್ನೆಲೆಯಲ್ಲಿ ತಾನು ಆಕೆಯನ್ನು ಕೊಲೆ ಮಾಡಿರುವುದಾಗಿ ಬಹಿರಂಗಪಡಿಸಿದ್ದಾನೆ.
ಕೃತ್ಯದಲ್ಲಿ ಚಿರಾಗ್ ಮೊದಲ ಪತ್ನಿಯ ಕೈವಾಡ ಇದೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಯಾಕಂದ್ರೆ ಕೆಲ ತಿಂಗಳ ಹಿಂದೆ ಆಕೆ ರಶ್ಮಿ ಜೊತೆ ಜಗಳವಾಡಿದ್ದಳು. ಅಲ್ಲದೆ ಥಳಿಸಿದ್ದಳು. ಸದ್ಯ ಈ ಕೃತ್ಯದಲ್ಲಿ ಚಿರಾಗ್ ಜೊತೆ ಇನ್ಯಾರಾದರೂ ಕೈ ಜೋಡಿಸಿದ್ದಾರೆಯೋ ಎಂಬುದನ್ನು ತನಿಖೆ ನಡೆಸುತ್ತಿದ್ದಾರೆ.
