ಕೋಳಿ ಬಾಜಿ ಕಟ್ಟಿ ಆಡುತ್ತಿದ್ದವರ ಬಂಧನ

ಮಡಿಕೇರಿ: ‘ಬಾಜಿ ಕಟ್ಟಿ ಆಡುಬಾರಾ ಮೀಸೆ ಮಾವ..’ ಅನ್ನೋದು ಕನ್ನಡ ಸಿನಿಮಾವೊಂದರ ಫೇಮಸ್ ಗೀತೆ. ಆದರೆ ಇಲ್ಲಿ ಇದೇ ನಾಟಿ ಕೋಳಿ ಹುಂಜಗಳನ್ನು ಬಳಸಿ ಬಾಜಿ ಆಡಲು ಹೋಗಿ ಅಂದರ್ ಆಗಿದ್ದಾರೆ.

ಕೊಡಗು ಜಿಲ್ಲೆಯ ಮಡಿಕೇರಿ ತಾಲೂಕಿನ ಚೆಂಬು ಗ್ರಾಮದ ಊರುಬೈಲ್ ನಲ್ಲಿ 10 ಜನರನ್ನು ಕೊಡಗು ಡಿಸಿಐಬಿ ಪೊಲೀಸರು ಬಂಧಿಸಿದ್ದಾರೆ. ಪ್ರತಿ ಕೋಳಿಗಳ ಮೇಲೆ ಸಾವಿರಾರು ರೂಪಾಯಿ ಬಾಜಿ ಕಟ್ಟಿ ಜೂಜಾಡುತ್ತಿದ್ದರು. ಖಚಿತ ಮಾಹಿತಿ ಆಧರಿಸಿ ದಾಳಿ ಮಾಡಿದ ಕೊಡಗು ಡಿಸಿಐಬಿ ಪೊಲೀಸರು ರೆಡ್ ಹ್ಯಾಂಡ್ ಆಗಿ 10 ಜನರನ್ನು ಬಂಧಿಸಿದ್ದಾರೆ.

ಪೊಲೀಸರು ದಾಳಿ ಮಾಡುತಿದ್ದಂತೆಯೇ ಜೂಜಾಡುತ್ತಿದ್ದ ಇನ್ನೂ ಕೆಲವರು ಅಲ್ಲಿಂದ ಎಸ್ಕೇಪ್ ಆಗಿದ್ದಾರೆ. ಇನ್ನು ಬಂಧಿತ ಖದೀಮರಿಂದ 35 ಸಾವಿರ ಮೌಲ್ಯದ 15 ಕೋಳಿಗಳು ಮತ್ತು ಬಾಜಿ ಕಟ್ಟಿದ್ದ 20,300 ರೂಪಾಯಿ ನಗದನ್ನು ವಶಕ್ಕೆ ಪಡೆದಿದ್ದಾರೆ.

ಘಟನೆ ಸಂಬಂಧ ಮಡಿಕೇರಿ ಗ್ರಾಮಾಂತರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.