– ಆಶಾ ಕಾರ್ಯಕರ್ತೆಯರಿಗೆ ಬಾಗಿನ ನೀಡಿ ಗೌರವ ಸಮರ್ಪಣೆ
ಚಿಕ್ಕಮಗಳೂರು: ನಕ್ಸಲ್ ಪೀಡಿತ ಪ್ರದೇಶ ಹಾಗೂ ಕುಗ್ರಾಮಗಳಲ್ಲಿರುವ ಬಡವರು, ನಿರ್ಗತಿಕರು, ವಿಕಲಚೇತನರನ್ನ ಗುರುತಿಸಿ ಅವರ ಮನೆ ಬಾಗಿಲಿಗೆ ಹೋಗಿ ಕಿಟ್ ವಿತರಿಸಿರುವಂತಹ ಹೃದಯ ವೈಶಾಲ್ಯತೆಯ ಘಟನೆಗೆ ಜಿಲ್ಲೆಯ ಕೊಪ್ಪ ತಾಲೂಕಿನ ಜಯಪುರ ಹೋಬಳಿ ಸಾಕ್ಷಿಯಾಗಿದೆ.
ಜಯಪುರದಲ್ಲಿರುವ ಸ್ಪಂದನಾ ಟ್ರಸ್ಟ್ನ ಸದಸ್ಯರು ತಮ್ಮ ಹೋಬಳಿ ವ್ಯಾಪ್ತಿಯಲ್ಲಿ ಬರುವ ನಿರ್ಗತಿಕರು, ನಿರಾಶ್ರಿತರು, ಅಂಗವಿಕಲರು, ವೃದ್ಧರಿಗೆ ಕಿಟ್ ನೀಡಿ ಧೈರ್ಯ ತುಂಬಿದ್ದಾರೆ. ಜೊತೆಗೆ ಮೆಣಸಿನ ಹಾಡ್ಯ, ಇಡಗುಂದ ಸೇರಿದಂತೆ ಹೋಬಳಿ ವ್ಯಾಪ್ತಿಯಲ್ಲಿರುವ ವಿವಿಧ ನಕ್ಸಲ್ ಪೀಡಿತ ಪ್ರದೇಶಗಳ ಬಡವರಿಗೂ ಕಿಟ್ ನೀಡಿದ್ದಾರೆ. ಇದೇ ವೇಳೆ, ಜೀವದ ಹಂಗನ್ನ ತೊರೆದು ಕುಗ್ರಾಮಗಳ ಜನರ ಜೀವವನ್ನು ಉಳಿಸುತ್ತಿರುವ ಆಶಾ ಕಾರ್ಯಕರ್ತೆಯರಿಗೂ ಬಾಗಿನ ನೀಡಿ ಗೌರವಿಸಿದ್ದಾರೆ.
ಹೆಮ್ಮಾರಿ ಕೊರೊನಾ ಇಡೀ ಜಗತ್ತನ್ನೇ ತಲ್ಲಣಗೊಳಿಸಿದೆ. ಎರಡನೇ ಅಲೆಯ ಅಬ್ಬರ ಗ್ರಾಮೀಣ ಭಾಗದ ಜನರ ಕಷ್ಟವನ್ನು ಹೇಳುವಂತಿಲ್ಲ. ಅದರಲ್ಲೂ ಮಲೆನಾಡ ಕುಗ್ರಾಮಗಳು, ನಕ್ಸಲ್ ಪೀಡಿತ ಪ್ರದೇಶದ ಜನರ ಪರಿಸ್ಥಿತಿ ಮತ್ತಷ್ಟು ಶೋಚನೀಯವಾಗಿದೆ. ಮಲೆನಾಡ ಬಹುತೇಕ ಭಾಗದಲ್ಲಿ ಜನ ಅಂದೇ ದುಡಿದು ಅಂದೇ ಊಟ ಮಾಡುವವರೇ ಹೆಚ್ಚು. ಕೊರೊನಾ ಕಾಲದಲ್ಲಂತೂ ಕೈಯಲ್ಲಿ ಹಣವಿಲ್ಲ, ಕೂಲಿಯೂ ಇಲ್ಲ. ಸಾರಿಗೆ ಸಂಪರ್ಕವೂ ಇಲ್ಲ. ನಗರ ಪ್ರದೇಶಕ್ಕೂ ಬರುವಂತಿಲ್ಲ. ಹೀಗಾಗಿ ಜನರ ಕಷ್ಟವನ್ನು ಕಣ್ಣಲ್ಲಿ ನೋಡದಿದ್ದರೂ ಸಹ ಸ್ಪಂದನ ಟ್ರಸ್ಟ್ನ ಸದಸ್ಯರು ಅವರ ಸಂಕಟವನ್ನ ಮನಗಂಡು ಕಿಟ್ ನೀಡಿ ಅವರ ನೆರವಿಗೆ ನಿಂತಿದ್ದಾರೆ. ದಟ್ಟ ಕಾನನ, ರಸ್ತೆ ಸಂಪರ್ಕವೂ ಇರಲ್ಲ. ಸಾರಿಗೆ ವ್ಯವಸ್ಥೆಯಂತೂ ಮೊದಲೇ ಇಲ್ಲ. ಅಂತಹ ಹಲವು ಗ್ರಾಮಗಳಿವೆ. ಗ್ರಾಮಗಳ ಬಡಕುಟುಂಬಗಳನ್ನು ಗುರುತಿಸಿ ಕಿಟ್ ನೀಡಲು ಕಾಡು-ಮೇಡು ಸುತ್ತಿ ಹಸಿದವರ ಹೊಟ್ಟೆ ತುಂಬಿಸುತ್ತಿದ್ದಾರೆ.
ಕೊರೊನಾ ಲಾಕ್ಡೌನ್ನಲ್ಲಿ ನಗರಕ್ಕೆ ಬರಲು ಸಾಧ್ಯವಾಗದೆ ಹಸಿವಿನ ಸಂಕಟದಲ್ಲಿರುವ ಜನರ ನೆರವಿಗೆ ನಿಂತಿದ್ದಾರೆ. ಗುಡ್ಡಗಾಡಿನ ಸ್ಥಳಗಳಿಗೆ ಹೋಗಿ ಅಲ್ಲಿರುವ ಬಡ ಕುಟುಂಬಗಳಿಗೆ ಕಿಟ್ ವಿತರಿಸಿ ಅವರಿಗೆ ಸಹಾಯದ ಹಸ್ತ ತೋರಿದ್ದಾರೆ. ಸ್ಪಂದನ ಟ್ರಸ್ಟ್ನ ಈ ಸೇವಾ ಕಾರ್ಯಕ್ಕೆ ರಾಷ್ಟ್ರೀಯ ಸ್ವಯಂ ಸೇವಕರ ತಂಡ ಕೂಡ ಸಹಕಾರ ನೀಡಿದೆ.
ಸ್ಪಂದನ ಟ್ರಸ್ಟಿಗಳ ಕೆಲಸಕ್ಕೆ ಅಲ್ಲಿನ ಜನ ಕೂಡ ಅಭಿನಂದನೆ ಸಲ್ಲಿಸಿದ್ದಾರೆ. ಇದರ ಜೊತೆ, ಜೀವದ ಹಂಗು ತೊರೆದು ಕೊರೋನಾ ವಿರುದ್ಧ ಹೋರಾಡುತ್ತಿರುವ ಆಶಾ ಕಾರ್ಯಕರ್ತೆಯರಿಗೂ ಸೀರೆ ಸೇರಿದಂತೆ ಬಾಗಿನ ನೀಡಿ ಗೌರವಿಸಿ ಅವರ ಸೇವೆಯನ್ನ ಶ್ಲಾಘಿಸಿದರು.
