ಚಿಕ್ಕಮಗಳೂರು: ಉಸಿರಾಟದ ಸಮಸ್ಯೆಯಿಂದ ಆಸ್ಪತ್ರೆಗೆ ಬರುವ ರೋಗಿಗಳಿಗೆ ಆಸ್ಪತ್ರೆ ಬಾಗಿಲಲ್ಲೇ ಆಕ್ಸಿಜನ್ ಕೊಡುವ ವ್ಯವಸ್ಥೆಗೆ ಕಾಫಿನಾಡು ಚಿಕ್ಕಮಗಳೂರಿನಲ್ಲಿ ತಯಾರಿ ನಡೆಸಲಾಗಿದ್ದು, ಅದಕ್ಕಾಗಿ ಸರ್ಕಾರಿ ಬಸ್ನ್ನು ಆಕ್ಸಿಜನ್ ಬಸ್ ಆಗಿ ಮಾರ್ಪಡಿಸಲಾಗಿದೆ.
ಈಗಾಗಲೇ ರಾಜಧಾನಿಯಲ್ಲಿ ಈ ಯೋಜನೆ ಜಾರಿಯಲ್ಲಿದ್ದು, ಬೆಂಗಳೂರಿನ ಬಳಿಕ ಈ ಯೋಜನೆಯನ್ನು ಚಿಕ್ಕಮಗಳೂರಿನಲ್ಲೂ ಜಾರಿಗೆ ತರಲು ಈಗಾಗಲೇ ಜಿಲ್ಲಾಡಳಿತ ಸಾರಿಗೆ ಇಲಾಖೆ ಅಧಿಕಾರಿಗಳ ಜೊತೆ ಮಾತನಾಡಿದ್ದು, ಸರ್ಕಾರಿ ಬಸ್ನ್ನು ಆಕ್ಸಿಜನ್ ಬಸ್ ಆಗಿ ರೆಡಿ ಮಾಡಲು ಮುಂದಾಗಿದೆ. ಈ ಆಕ್ಸಿಜನ್ ಬಸ್ನಲ್ಲಿ ಆರರಿಂದ ಎಂಟು ಜನ ರೋಗಿಗಳಿಗೆ ಏಕಕಾಲದಲ್ಲಿ ಆಕ್ಸಿಜನ್ ನೀಡಬಹುದಾಗಿದೆ. ಬಸ್ನಲ್ಲಿ ಈ ಯೋಜನೆಗೆ ಬೇಕಾದ ಕೆಲ ತಾಂತ್ರಿಕ ಕೆಲಸಗಳು ನಡೆಯುತ್ತಿದ್ದ ಸೋಮವಾರ ಇದು ಸೇವೆಗೆ ಲಭ್ಯವಾಗಲಿದೆ.
ಆಸ್ಪತ್ರೆಗೆ ಬರುವ ರೋಗಿಗಳಿಗೆ ಕೂಡಲೇ ಆಕ್ಸಿಜನ್ ಬೆಡ್ ನೀಡಲು ಸಾಧ್ಯವಾಗದಿರಬಹುದು. ಈ ವೇಳೆ ಅವರಿಗೆ ಯಾವಾಗಲು ಆಸ್ಪತ್ರೆ ಮುಂಭಾಗವೇ ಇರುವ ಬಸ್ನಲ್ಲಿ ಕೂರಿಸಿ ಆಕ್ಸಿಜನ್ ನೀಡಲಾಗುತ್ತದೆ. ತದನಂತರ ವೈದ್ಯರ ಪರೀಕ್ಷೆ ಮೂಲಕ ಆವರ ಆರೋಗ್ಯದ ಸ್ಥಿತಿಗತಿ ಆಧಾರದ ಮೇಲೆ ಅವರಿಗೆ ಮುಂದಿನ ಚಿಕಿತ್ಸೆ ನೀಡಬಹುದು. ರೋಗಿಗಳಿಗೆ ಈ ರೀತಿ ಬಂದ ಕೂಡಲೇ ಆಕ್ಸಿಜನ್ ಸೌಲಭ್ಯ ನೀಡಿದರೆ ಅವರಿಗೆ ಅರ್ಧ ಧೈರ್ಯ ಬರುತ್ತದೆ. ಅನ್ನೋದು ಜಿಲ್ಲಾಡಳಿತ ನಂಬಿಕೆ. ಈಗಾಗಲೇ ಆಕ್ಸಿಜನ್ ಬಸ್ ಕೆಲಸ ಬಹುತೇಕ ಮುಗಿದಿದ್ದು ನಾಳೆ ಮಧ್ಯಾಹ್ನ ಈ ಆಕ್ಸಿಜನ್ ಆನ್ ವೀಲ್ಸ್ ಯೋಜನೆಗೆ ಚಾಲನೆ ಸಿಗಲಿದೆ ಎಂದು ಜಿಲ್ಲಾಡಳಿತ ಮಾಹಿತಿ ನೀಡಿದೆ.
