ನಿಯಮ ಉಲ್ಲಂಘಿಸಿ ಟಗರಿನ ಕಾಳಗ- ಎಂಟು ಯುವಕರು, 2 ಟಗರು ಪೊಲೀಸರ ವಶಕ್ಕೆ

ಹಾವೇರಿ: ಸಂಡೇ ಲಾಕ್‍ಡೌನ್ ನಿಯಮ ಉಲ್ಲಂಘಿಸಿ ಟಗರಿನ ಕಾಳಗ ನಡೆಸ್ತಿದ್ದ ಎಂಟು ಜನ ಯುವಕರು ಮತ್ತು ಎರಡು ಟಗರುಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಜಿಲ್ಲೆಯ ರಾಣೆಬೆನ್ನೂರು ತಾಲೂಕಿನ ಹುಣಸೀಕಟ್ಟಿ ಗ್ರಾಮದಲ್ಲಿ ಘಟನೆ ನಡೆದಿದ್ದು, ಕೊರೊನಾ ಭೀತಿ ಹಾಗೂ ಸಂಡೇ ಲಾಕ್‍ಡೌನ್ ಲೆಕ್ಕಿಸದೆ ಯುವಕರು ಟಗರಿನ ಕಾಳಗ ನಡೆಸುತ್ತಿದ್ದರು. ಈ ಕುರಿತು ಮಾಹಿತಿ ಲಭ್ಯವಾಗುತ್ತಿದ್ದಂತೆ ಪೊಲೀಸರು ದಾಳಿ ನಡೆಸಿದ್ದಾರೆ.

ಟಗರಿನ ಕಾಳಗ ನಡೆಸುತ್ತಿದ್ದ ದಾವಣಗೆರೆ, ಹರಿಹರ ಮತ್ತು ಹಾವೇರಿ ಮೂಲದ ಯುವಕರನ್ನು ರಾಣೆಬೆನ್ನೂರು ಗ್ರಾಮೀಣ ಪೊಲೀಸ್ ಠಾಣೆಯ ವಶಕ್ಕೆ ಪಡೆದುಕೊಂಡಿದ್ದಾರೆ. ರಾಣೆಬೆನ್ನೂರು ಗ್ರಾಮೀಣ ಪೊಲೀಸ್ ಠಾಣೆಯ ವ್ಯಾಪ್ತಿಯಲ್ಲಿ ಪ್ರಕರಣ ನಡೆದಿದೆ.