ಡಾಬಾ ಶೈಲಿಯ ಆಲೂ ಎಗ್ ಬುರ್ಜಿ ಮಾಡುವ ವಿಧಾನ

ಬ್ಯಾಚೂಲರ್ ಗಳಿಗೆ ಪ್ರತಿ ದಿನ ಊಟಕ್ಕೆ ಏನು ಮಾಡಿಕೊಳ್ಳುವುದು ಅನ್ನೋದು ದೊಡ್ಡ ಪ್ರಶ್ನೆ. ಇತ್ತ ಗೃಹಿಣಯರಿಗೆ ಪ್ರತಿದಿನ ಹೊಸ ರುಚಿ ಕೇಳುವ ಮಕ್ಕಳಿಗೆ ಏನ್ ಮಾಡಿ ಕೊಡಬೇಕು ಅನ್ನೋದರ ಬಗ್ಗೆ ಉತ್ತರ ಹುಡುಕುತ್ತಿರುತ್ತಾರೆ. ಎಗ್ ಕರ್ರಿ, ಎಗ್ ಸಾಂಬಾರ್ ಮಾಡಿ ಬೇಜಾರು ಆಗಿದ್ರೆ ಒಮ್ಮೆ ಡಾಬಾ ಶೈಲಿಯ ಆಲೂ ಎಗ್ ಬುರ್ಜಿ ಟ್ರೈ ಮಾಡಿ.

ಬೇಕಾಗುವ ಸಾಮಾಗ್ರಿಗಳು
* ಆಲೂಗಡ್ಡೆ- 1 (ಮಧ್ಯಮ ಗಾತ್ರದ್ದು)
* ಮೊಟ್ಟೆ- 2
* ಈರುಳ್ಳಿ- 2 (ಮಧ್ಯಮ ಗಾತ್ರದ್ದು)
* ಟೊಮ್ಯಾಟೋ -1
* ಹಸಿಮೆಣಸಿನಕಾಯಿ – 2 ರಿಂದ 3
* ಗರಂ ಮಸಾಲಾ
* ಕೋತಂಬರಿ ಸೊಪ್ಪು
* ಕರಿಬೇವು- 3 ರಿಂದ 4 ದಳ
* ಜೀರಿಗೆ- 1/2 ಟೀ ಸ್ಪೂನ್
* ಸಾಸವೆ-1-/ ಟೀ ಸ್ಪೂನ್
* ಅರಿಶಿನ- ಚಿಟಿಕೆ
* ಉಪ್ಪು- ರುಚಿಗೆ ತಕ್ಕಷ್ಟು
* ಎಣ್ಣೆ

ಮಾಡುವ ವಿಧಾನ:
* ಮೊದಲಿಗೆ ಆಲೂಗಡೆಯ ಸಿಪ್ಪೆ ತೆಗೆದು ಸಣ್ಣದಾಗಿ ಕತ್ತರಿಸಿಕೊಳ್ಳಿ. ನಂತರ ಈರುಳ್ಳಿ, ಟೊಮ್ಯಾಟೋ ಮತ್ತು ಹಸಿ ಮೆಣಸಿನಕಾಯಿ ಸಣ್ಣದಾಗಿ ಕತ್ತರಿಸಿಕೊಂಡು ಎತ್ತಿಟ್ಟುಕೊಳ್ಳಿ.
* ಸ್ಟೌವ್ ಆನ್ ಮಾಡಿಕೊಂಡು ಪ್ಯಾನ್ ಇಟ್ಟುಕೊಳ್ಳಿ. ಪ್ಯಾನ್ ಬಿಸಿಯಾಗುತ್ತಿದ್ದಂತೆ ಎಣ್ಣೆ ಹಾಕಿ. ಎಣ್ಣೆ ಬಿಸಿಯಾಗುತ್ತಿದ್ದಂತೆ ಕರಿಬೇವು, ಜೀರಿಗೆ, ಸಾಸವೆ ಹಾಕಿ ಫ್ರೈ ಮಾಡಿಕೊಳ್ಳಿ. ತದನಂತರ ಕತ್ತರಿಸಿಕೊಂಡಿರುವ ಆಲೂಗಡ್ಡೆ ಮತ್ತು ಈರುಳ್ಳಿ ಸೇರಿಸಿ ಹಸಿ ವಾಸನೆ ಹೋಗುವರೆಗೂ ಬೇಯಿಸಿಕೊಳ್ಳಿ.
* ಈರುಳ್ಳಿ ಮತ್ತು ಆಲೂಗಡ್ಡೆ ಬೇಯಿಸಿದ ಬಳಿಕ ಅದೇ ಪ್ಯಾನ್ ಗೆ ಟೊಮ್ಯಾಟೋ ಮಿಕ್ಸ್ ಮಾಡಿ. ನಂತರ ಅರಿಶಿನ, ಉಪ್ಪು, ಗರಂ ಮಸಲಾ ಸೇರಿಸಿ ಕಡಿಮೆ ಉರಿಯಲ್ಲಿ ಮೂರರಿಂದ ನಾಲ್ಕು ನಿಮಿಷ ಫ್ರೈ ಮಾಡಿಕೊಳ್ಳಿ.
* ಮಿಶ್ರಣ ಫ್ರೈ ಆಗ್ತಿದ್ದಂತೆ ಎರಡು ಮೊಟ್ಟೆಯ ಒಡೆದು ಹಾಕಿ ಚೆನ್ನಾಗಿ ಕಲಕಬೇಕು. ಎರಡರಿಂದ ಮೂರು ನಿಮಿಷ ಮಸಲಾ ಬೇಯಿಸಿದ್ರೆ ಆಲೂ ಎಗ್ ಬುರ್ಜಿ ರೆಡಿ.
(ಇದನ್ನು ಚಪಾತಿ, ರೊಟ್ಟಿ ಅಥವಾ ದೋಸೆ ಜೊತೆ ತಿನ್ನಬಹುದು)