ಓವರ್ ಟೇಕ್ ಪೈಪೋಟಿ – ಗದ್ದೆಗೆ ಇಳಿದ ಕಾರ್, ಬೈಕ್

ಚಿಕ್ಕಮಗಳೂರು: ನಿನಗಿಂತ ನಾನು ಮೊದಲು ಹೋಗ್ತೀನಿ ಅಂತ ರಸ್ತೆ ಮಧ್ಯೆ ಪೈಪೋಟಿಗೆ ಬಿದ್ದಿದ್ದ ಕಾರ್-ಬೈಕ್ ಸವಾರರಿಬ್ಬರೂ ನಿಯಂತ್ರಣ ತಪ್ಪಿ ಗದ್ದೆಯೊಳಗೆ ಇಳಿದಿರೋ ಘಟನೆ ಜಿಲ್ಲೆಯ ಮೂಡಿಗೆರೆ ತಾಲೂಕಿನ ಕೊಟ್ಟಿಗೆಹಾರ ಸಮೀಪದ ಅತ್ತಿಗೆರೆ ಬಳಿ ನಡೆದಿದೆ.

ಕಾರ್ ಮೂಡಿಗೆರೆಯಿಂದ ಕೊಟ್ಟಿಗೆಹಾರದ ಮಾರ್ಗವಾಗಿ ಕಳಸ ಸಮೀಪದ ಹಿರೇಬೈಲಿಗೆ ಹೊರಟಿತ್ತು. ಅದೇ ವೇಳೆ ಬೈಕ್ ಸವಾರ ಕೂಡ ಕೊಟ್ಟಿಗೆಹಾರದ ಮೂಲಕ ಮಾಗುಂಡಿಗೆ ಹೊರಟಿದ್ದ. ಮೂಡಿಗೆರೆಯಿಂದ ನೀನಾ-ನಾನಾ ಅಂತ ಹೊರಟ ಕಾರು-ಬೈಕ್ ನವರು ಬಿದ್ದವಂರಂತೆ ಚಾಲನೆ ಮಾಡಿಕೊಂಡು ಹೋಗಿದ್ದಾರೆ. ಆದರೆ ಕಾರು ಹಾಗೂ ಬೈಕ್ ಅತ್ತಿಗೆರೆಯತ್ತ ಬರುತ್ತಿದ್ದಂತೆ ಬೈಕನ್ನ ನೋಡುತ್ತಿದ್ದ ಕಾರು ಚಾಲಕ ನಿಯಂತ್ರಣ ತಪ್ಪಿ ಗದ್ದೆಯೊಳಕ್ಕೆ ಇಳಿದಿದ್ದಾನೆ. ಕಾರನ್ನು ಓವರ್ ಟೇಕ್ ಮಾಡಲು ಹೋದ ಬೈಕ್ ಸವಾರ ಕೂಡ ಕಾರನ್ನ ನೋಡಿಕೊಂಡು ಅದೇ ಕಾರಿನ ಹಿಂದೆ ಗದ್ದೆಗೆ ಇಳಿದಿದ್ದಾನೆ.

ಅದೃಷ್ಟವಶಾತ್ ಯಾವುದೇ ದೊಡ್ಡ ಅನಾಹುತ ಸಂಭವಿಸಿಲ್ಲ. ಕಾರಿನ ಕೆಲ ಭಾಗಕ್ಕೆ ಹಾನಿಯಾಗಿದ್ದು ಚಾಲಕನಿಗೆ ಸಣ್ಣಪುಟ್ಟ ಗಾಯಳಾಗಿವೆ. ಇನ್ನು ವೇಗವಾಗಿದ್ದ ಬೈಕಿನ ಸಮೇತ ಗದ್ದೆಗೆ ಇಳಿದಿರೋ ಬೈಕ್ ಸವಾರ ಪಲ್ಟಿಯಾಗಿ ಬಿದಿದ್ದಾನೆ. ಬೈಕಿಗೂ ಕೂಡ ಅಲ್ಲಲ್ಲೇ ಡ್ಯಾಮೇಜ್ ಆಗಿದ್ದು, ಬೈಕ್ ಸವಾರನು ಅನಾಹುತದಿಂದ ಪಾರಾಗಿದ್ದಾನೆ. ಬೈಕ್ ಸವಾರನಿಗೆ ಸ್ವಲ್ಪ ಹೆಚ್ಚಾಗಿ ಪೆಟ್ಟು ಬಿದ್ದಿದೆ ಎಂದು ಸ್ಥಳೀಯರು ಮಾಹಿತಿ ನೀಡಿದ್ದಾರೆ. ಬಣಕಲ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದ್ದು, ಪ್ರಕರಣ ದಾಖಲಾಗಿಲ್ಲ.