ಬೆಂಗಳೂರು: ಕುಟುಂಬದ ಜೊತೆ ಟೆಸ್ಟ್ ಡ್ರೈವ್ ಮಾಡಲು ಹೋದಾಗ ಅಪಘಾತವಾಗಿ ವ್ಯಕ್ತಿ ಸಾವನ್ನಪ್ಪಿದ್ದು, ಪತ್ನಿ ಮತ್ತು ಮಗನಿಗೆ ಗಾಯವಾಗಿರುವ ಘಟನೆ ಸಿಲಿಕಾನ್ ಸಿಟಿಯಲ್ಲಿ ನಡೆದಿದೆ.
ಹೊಸಕೆರೆಹಳ್ಳಿಯ ಟೋಲ್ ಬಳಿ ಈ ಅಪಘಾತ ನಡೆದಿದ್ದು, ಸಾಗರ್ ಮೃತ ದುರ್ದೈವಿ. ಇವರು ನಗರದ ಪ್ರತಿಷ್ಠಿತ ಉದ್ಯಮಿ ಜಯರಾಮ್ ರಾವ್ ಮಗನಾಗಿದ್ದಾರೆ. ತಂದೆ ತನ್ನ ಮಗ ಸಾಗರ್ ಗೆ ರೇಂಜ್ ರೋವರ್ ಕಾರನ್ನು ಕೊಡಿಸುವುದಾಗಿ ನೈಸ್ ರೋಡ್‍ಗೆ ಟೆಸ್ಟ್ ಡ್ರೈವ್ ಕಳಿಸಿದ್ದರು. ಸಾಗರ್ ತನ್ನ ಆರು ವರ್ಷದ ಮಗು ಮತ್ತು ಪತ್ನಿ ಸಂಧ್ಯಾರನ್ನ ಜೊತೆಯಲ್ಲಿಯೇ ಕೂರಿಸಿಕೊಂಡು ಟೆಸ್ಟ್ ಡ್ರೈವ್ ಹೋಗಿದ್ದಾರೆ.
ರೇಂಜ್ ರೋವರ್ ಕಾರಲ್ಲಿ ಕೂತ ತಕ್ಷಣ ಪತ್ನಿ ಮಗು ಇದ್ದಾರೆ ಅನ್ನೋದನ್ನು ಮರೆತ ಸಾಗರ್ ಅತೀವೇಗವಾಗಿ ಕಾರನ್ನು ಚಲಾಯಿಸಿದ್ದಾರೆ. ಪತ್ನಿ ನಿಧಾನವಾಗಿ ಕಾರು ಓಡಿಸಿ ಅಂದರು ಕೇಳಿಸಿಕೊಳ್ಳದೇ ಸಾಗರ್ ಮತ್ತಷ್ಟು ಜೋರಾಗಿ ಓಡಿಸಿದ್ದಾರೆ.
ಈ ವೇಳೆ ಕಾರು ಹೊಸಕೆರೆಹಳ್ಳಿಯ ಟೋಲ್ ಬಳಿ ಬಂದಾಗ ಡಿವೈಡರ್ ಗೆ ಡಿಕ್ಕಿ ಹೊಡೆದು ಪಲ್ಟಿಯಾಗಿದೆ. ಡಿಕ್ಕಿಯಾದ ರಭಸಕ್ಕೆ ಹೊಸ ಕಾರು ಗುರುತೇ ಸಿಗದಂತೆ ನಜ್ಜುಗುಜ್ಜಾಗಿದೆ. ಸೀಟ್ ಬೆಲ್ಟ್ ಹಾಕಿ ಏರ್ ಬ್ಯಾಗ್‍ಗಳು ಓಪನ್ ಆದರು ಕೂಡ ಪಲ್ಟಿ ಹೊಡೆದಿದೆ. ಅಪಘಾತದ ರಭಸಕ್ಕೆ ಸಾಗರ್ ಗೆ ಗಂಭೀರವಾಗಿ ಪೆಟ್ಟು ಬಿದ್ದಿದೆ. ತಕ್ಷಣ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಸಾಗರ್ ಮೃತಪಟ್ಟಿದ್ದಾರೆ.
