ಕೋಲಾರ: ಕುಡಿದು ಪ್ರತಿನಿತ್ಯ ಪತ್ನಿಗೆ ಟಾರ್ಚರ್ ನೀಡುತ್ತಿದ್ದ ಗಂಡನಿಗೆ ಮಹಿಳಾ ಠಾಣೆ ಎಸ್‍ಐ ಥರ್ಡ್ ಡಿಗ್ರಿ ಟ್ರೀಟ್‍ಮೆಂಟ್ ನೀಡಿರೋ ಘಟನೆ ಕೋಲಾರದಲ್ಲಿ ನಡೆದಿದೆ.
ಕೋಲಾರ ಮಹಿಳಾ ಠಾಣೆಯ ಆವರಣದಲ್ಲಿ ಈ ಘಟನೆ ಕಳೆದ 1 ತಿಂಗಳ ಹಿಂದೆ ನಡೆದಿದ್ದು, ಹೇಮಾವತಿ ಎಂಬ ಎಸ್‍ಐ ಠಾಣೆ ಎದುರೇ ಕುಡುಕನಿಗೆ ಥಳಿಸಿದ್ದಾರೆ. ತನ್ನ ಪತಿ ಪ್ರತಿ ದಿನ ಕುಡಿದು ಬಂದು ಕಿರುಕುಳ ನೀಡುತ್ತಿದ್ದುದರಿಂದ ಮನನೊಂದ ಮಹಿಳೆಯೊಬ್ಬರು ಮಹಿಳಾ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.
ಈ ಹಿನ್ನೆಲೆಯಲ್ಲಿ ಮಹಿಳಾ ಎಸ್‍ಐ ದೂರು ನೀಡಿದ ಮಹಿಳೆಯ ಪತಿಯನ್ನು ಠಾಣೆಗೆ ಕರೆಸಿದ್ದಾರೆ. ಬಳಿಕ ಆತನಿಗೆ ಬುದ್ಧಿ ಹೇಳಿ ಠಾಣೆ ಆವರಣದಲ್ಲೇ ಚೆನ್ನಾಗಿ ಥಳಿಸಿದ್ದಾರೆ.
ವ್ಯಕ್ತಿಗೆ ಮಹಿಳಾ ಎಸ್‍ಐ ಲಾಠಿ ರುಚಿ ತೋರಿಸುತ್ತಿರುವ ದೃಶ್ಯವನ್ನು ಸ್ಥಳೀಯರು ತಮ್ಮ ಮೊಬೈಲ್ ನಲ್ಲಿ ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಕ್ಕೆ ಹರಿದು ಬಿಟ್ಟಿದ್ದಾರೆ. ವಿಡಿಯೋದಲ್ಲಿ ಹೀಗ್ ಮಾಡ್ತೀಯಾ.. ಮಾಡ್ತಿಯಾ ಎಂದು ವ್ಯಕ್ತಿಗೆ ಮಹಿಳಾ ಎಸ್‍ಐ ಥಳಿಸುವುದನ್ನು ಕಾಣಬಹುದು.
ಎಸ್‍ಐ ದೌರ್ಜನ್ಯಕ್ಕೆ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಾಕ ಆಕ್ರೋಶ ವ್ಯಕ್ತವಾಗಿದೆ. ಘಟನೆಯ ಬಳಿಕ ಸದ್ಯ ಪತಿ ಹಾಗೂ ಪತ್ನಿ ಒಟ್ಟಾಗಿ ಚೆನ್ನಾಗಿಯೇ ಜೀವನ ನಡೆಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.
