Sunday, 15th December 2019

ಫಿಲಿಪೈನ್ಸ್‌ನಿಂದ ಬಂದ ಅಭಿಮಾನಿಯನ್ನು ಭೇಟಿ ಮಾಡಿ ಸಿಹಿ ತಿನಿಸಿದ ಯಶ್

ಬೆಂಗಳೂರು: ಪ್ರೀತಿಯಿಂದ ಭೇಟಿ ಮಾಡಲು ಫಿಲಿಪೈನ್ಸ್‌ನಿಂದ ಬಂದ ಅಭಿಮಾನಿಯನ್ನು ಕೊನೆಗೂ ರಾಕಿಂಗ್ ಸ್ಟಾರ್ ಯಶ್ ಭೇಟಿ ಮಾಡಿದ್ದಾರೆ. ಅಭಿಮಾನಿ ಜೊತೆ ಮಾತನಾಡಿ ಸಿಹಿಯನ್ನೂ ತಿನಿಸಿದ್ದಾರೆ.

ಪೇಟೆ ಅಶೋಕ್ ಜೋರ್ನಲ್ ಎಂಬ ಅಭಿಮಾನಿ ವಿದೇಶದಿಂದ ಯಶ್ ಭೇಟಿ ಮಾಡಲು ಬಂದಿದ್ದರು. ಈ ಬಗ್ಗೆ ತಿಳಿದ ಯಶ್ ಅಭಿಮಾನಿಯನ್ನು ಭೇಟಿ ಮಾಡಿ, ಅವರೊಂದಿಗೆ ಕೆಲ ಸಮಯ ಮಾತನಾಡಿದ್ದಾರೆ.

ಈ ವೇಳೆ ಅಭಿಮಾನಿ ತನ್ನ ನೆಚ್ಚಿನ ನಟನಿಗಾಗಿ ತಂದಿದ್ದ ತಿಂಡಿಯನ್ನು ತಿನ್ನಿಸಿದ್ದಾರೆ. ಯಶ್ ಕೂಡ ಸಿಹಿ ತಿನ್ನಿಸಿ ಅಭಿಮಾನಿಯೊಂದಿಗೆ ಕ್ಯಾಮೆರಾಗೆ ಪೋಸ್ ಕೊಟ್ಟಿದ್ದಾರೆ. ಯಶ್ ವಿದೇಶದಿಂದ ಬಂದಿದ್ದ ಅಭಿಮಾನಿಯನ್ನು ಭೇಟಿ ಮಾಡಿರುವುದು ಎಲ್ಲರ ಮನ ಗೆದ್ದಿದೆ.

ಪೇಟೆ ಅಶೋಕ್ ಜೋರ್ನಲ್ ಏರ್ ಫೋರ್ಟ್ ನರ್ಸ್ ಆಗಿ ಕೆಲಸ ಮಾಡುತ್ತಿದ್ದಾರೆ. ಯಶ್ ನೋಡಲು ಬೆಂಗಳೂರಿಗೆ ಫಿಲಿಪೈನ್ಸ್‌ನಿಂದ ಬಂದಿದ್ದರು. ನಾನು ಯಶ್ ಅಭಿಮಾನಿ ಅವರನ್ನು ನೋಡಬೇಕು ಎಂದು ಬಂದ್ದಿದ್ದೇನೆ, ಸಹಾಯ ಮಾಡಿ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದರು. ಅಷ್ಟೇ ಅಲ್ಲದೆ ಯಶ್‍ಗಾಗಿ ಕನ್ನಡವನ್ನು ಕೂಡ ಕಲಿಯುತ್ತಿದ್ದಾರೆ. ಜೊತೆಗೆ ಕೆಜಿಎಫ್ ಸಿನಿಮಾದಲ್ಲಿ ಯಶ್ ಅಭಿನಯ ಹಾಗೂ ಯಶೋಮಾರ್ಗದ ಮೂಲಕ ಅವರು ಜನಸೇವೆ ಮಾಡುತ್ತಿರುವುದಕ್ಕೆ ಮೆಚ್ಚಿಕೊಂಡಿದ್ದರು.

ಇದೇ ತಿಂಗಳ 20ರಂದು ಬುಧವಾರ ಅಭಿಮಾನಿ ವಾಪಸ್ ಫಿಲಿಪೈನ್ಸ್‌ಗೆ ತೆರಳಬೇಕಿದೆ. ಹೀಗಾಗಿ ಅದಕ್ಕೂ ಮುನ್ನ ಯಶ್ ಅವರನ್ನ ಭೇಟಿ ಮಾಡಿಸಿ ಎಂದು ಮಾಧ್ಯಮ ಮತ್ತು ಅಭಿಮಾನಿಗಳಲ್ಲಿ ಮನವಿ ಮಾಡಿಕೊಂಡಿದ್ದರು. ಈಗ ಅಭಿಮಾನಿ ತನ್ನ ಆಸೆಯಂತೆ ಯಶ್ ಅವರನ್ನು ಭೇಟಿ ಮಾಡಿ ಖುಷಿಪಟ್ಟಿದ್ದಾರೆ.

Leave a Reply

Your email address will not be published. Required fields are marked *