Thursday, 22nd August 2019

ಸ್ವಾತಂತ್ರ್ಯ ದಿನದಿಂದ ಶುರುವಾಗಲಿದೆ ಸ್ಟಾರ್ ಕನ್ನಡಿಗನ ಹಾಡುಹಬ್ಬ!

ಬೆಂಗಳೂರು: ಸ್ಟಾರ್ ಕನ್ನಡಿಗ ಎಂಬ ಸಿನಿಮಾ ಪೋಸ್ಟರ್‍ಗಳೂ ಸೇರಿದಂತೆ ಒಂದಷ್ಟು ಕ್ರಿಯೇಟಿವ್ ಕೆಲಸ ಕಾರ್ಯಗಳಿಂದ ಆಗಾಗ ಸದ್ದು ಮಾಡುತ್ತಾ ಸಾಗಿ ಬಂದಿತ್ತು. ಇದೀಗ ಸ್ಟಾರ್ ಕನ್ನಡಿಗ ಸಂಪೂರ್ಣ ಚಿತ್ರೀಕರಣ ಮುಗಿಸಿಕೊಂಡು ಬಿಡುಗಡೆಗೆ ರೆಡಿಯಾಗಿ ನಿಂತಿದೆ. ಇದೇ ಹೊತ್ತಿನಲ್ಲಿ ಸ್ವಾತಂತ್ರ್ಯೋತ್ಸವದ ದಿನದಿಂದ ಹಂತ ಹಂತವಾಗಿ ಒಂದೊಂದೇ ಹಾಡುಗಳನ್ನು ಪ್ರೇಕ್ಷಕರಿಗೆ ಕೇಳಿಸಲು ಚಿತ್ರತಂಡ ನಿರ್ಧರಿಸಿದೆ.

ಇದು ವಿ.ಆರ್ ಮಂಜುನಾಥ್ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಚಿತ್ರ. ಈಗಾಗಲೇ ಹಲವಾರು ಚಿತ್ರಗಳಲ್ಲಿ ಕಾರ್ಯ ನಿರ್ವಹಿಸಿರೋ ಅನುಭವ ಹೊಂದಿರುವ ಮಂಜುನಾಥ್ ಇಲ್ಲಿ ಹಲವಾರು ಜವಾಬ್ದಾರಿಗಳನ್ನು ಹೊತ್ತುಕೊಂಡು ಈ ಚಿತ್ರವನ್ನು ರೂಪಿಸಿದ್ದಾರೆ. ನಿರ್ದೇಶನದ ಜೊತೆಗೆ ನಿರ್ಮಾಣದ ಜವಾಬ್ದಾರಿಯನ್ನೂ ವಹಿಸಿಕೊಂಡು ನಾಯಕನಾಗಿಯೂ ನಟಿಸೋ ಮೂಲಕ ಅವರು ಅಚ್ಚರಿಗೆ ಕಾರಣರಾಗಿದ್ದಾರೆ. ಕಥೆಗೆ ಪೂರಕವಾಗಿ ಹೊಸತನದೊಂದಿಗೆ ರೂಪುಗೊಂಡಿರೋ ಹಾಡುಗಳನ್ನು ಒಂದೊಂದಾಗಿ ಪ್ರೇಕ್ಷಕರ ಮುಂದಿಡಲು ಮಂಜುನಾಥ್ ಮುಂದಾಗಿದ್ದಾರೆ.

ಸ್ಟಾರ್ ಕನ್ನಡಿಗ ಎಂಬ ಹೆಸರು ಕೇಳಿದರೇನೇ ಇದು ಕನ್ನಡಾಭಿಮಾನದ ತಿರುಳು ಹೊಂದಿರೋ ಕಥಾನಕ ಎಂಬ ಸೂಚನೆ ಸಿಗುತ್ತದೆ. ಆದರೆ ಅದನ್ನು ಇಲ್ಲಿ ಸಿನಿಮಾದೊಳಗೊಂದು ಸಿನಿಮಾ ತೋರಿಸಿ, ಅದರಲ್ಲೊಂದು ವಿಶೇಷವಾದ ಪ್ರೇಮಕಥಾನಕವನ್ನು ಸಾದರಪಡಿಸಿ ಆ ಮೂಲಕವೇ ಪ್ರೇಕ್ಷಕರಲ್ಲಿ ಹೊಸಾ ಬಗೆಯ ಚಿತ್ರ ನೋಡಿದ ಅನುಭೂತಿ ಹುಟ್ಟಿಸುವಂತೆ ಈ ಸಿನಿಮಾ ಮೂಡಿ ಬಂದಿದೆಯಂತೆ. ಮಂಜುನಾಥ್ ಈ ಚಿತ್ರವನ್ನು ತಮ್ಮ ಹಲವಾರು ಸಮಾನಮನಸ್ಕ ಸ್ನೇಹಿತರ ಸಾಥ್‍ನೊಂದಿಗೆ ರೂಪಿಸಿದ್ದಾರೆ. ತಿಂಗಳೊಪ್ಪತ್ತಿನಲ್ಲಿಯೇ ಬಿಡುಗಡೆಯಾಗಲಿರೋ ಈ ಚಿತ್ರವೀಗ ಹಾಡುಗಳ ಒಡ್ಡೋಲಗದೊಂದಿಗೆ ಥೇಟರಿನತ್ತ ಪಯಣ ಬೆಳೆಸಲು ರೆಡಿಯಾಗಿದೆ.

Leave a Reply

Your email address will not be published. Required fields are marked *