Connect with us

Cricket

ಕೊರೊನಾದಿಂದ ಹೆಚ್ಚಾಯ್ತು ಐಪಿಎಲ್ ಜಾಹೀರಾತು ದರ – 10 ಸೆಕೆಂಡ್‍ಗೆ ಎಷ್ಟು ಹಣ ಕೊಡ್ಬೇಕು?

Published

on

ಮುಂಬೈ: ಮುಂದಿನ ತಿಂಗಳಿನಿಂದ ಪ್ರಪಂಚದ ದುಬಾರಿ ಕ್ರಿಕೆಟ್ ಲೀಗ್ ಐಪಿಎಲ್ ಸೆಟ್ಟೇರಲು ಸಜ್ಜಾಗಿದೆ. ಇದರ ಜೊತೆಗೆ ಐಪಿಎಲ್ ಅನ್ನು ಪ್ರಸಾರ ಮಾಡುತ್ತಿರುವ ಸ್ಟಾರ್ ಸ್ಪೋರ್ಟ್ಸ್ ವಾಹಿನಿ ತನ್ನ ಜಾಹೀರಾತು ದರವನ್ನು ನಿಗದಿ ಮಾಡಿದೆ.

ಈ ಬಾರಿಯ ಐಪಿಎಲ್ ಸೆಪ್ಟಂಬರ್ 19ರಿಂದ ಯುಎಇಯಲ್ಲಿ ಆರಂಭವಾಗಲಿದ್ದು, ಮೊದಲ ಬಾರಿಗೆ ಜನರೇ ಇಲ್ಲದೇ ಖಾಲಿ ಮೈದಾನದಲ್ಲಿ ಐಪಿಎಲ್ ನಡೆಸಲು ಬಿಸಿಸಿಐ ತೀರ್ಮಾನ ಮಾಡಿದೆ. ಹೀಗಾಗಿ ಜನರು ಐಪಿಎಲ್ ಅನ್ನು ಈ ಬಾರಿ ಟಿವಿಯಲ್ಲಿ ನೋಡಬೇಕಿದೆ. ಇದನ್ನೇ ಬಂಡವಾಳ ಮಾಡಿಕೊಂಡ ಸ್ಟಾರ್ ಕಂಪನಿ 10 ಸೆಕೆಂಡ್ ಇರುವ ಜಾಹೀರಾತಿಗೆ 12.5 ಲಕ್ಷ ರೂ. ಪಡೆಯಲು ಮುಂದಾಗಿದೆ.

2019ರ ಐಪಿಎಲ್ ವೇಳೆ 10 ಸೆಕೆಂಡ್ ಇರುವ ಜಾಹೀರಾತಿಗೆ 10 ಲಕ್ಷ ರೂಪಾಯಿಗಳನ್ನು ಪಡೆದುಕೊಂಡಿತ್ತು. ಆದರೆ ಈ ಮೊತ್ತವನ್ನು ಈ ಬಾರಿ ಶೇ.20ರಷ್ಟು ಜಾಸ್ತಿ ಮಾಡಿರುವ ಸ್ಟಾರ್ ವಾಹಿನಿ, ಈ ಬಾರಿ 12.5 ಲಕ್ಷ ಪಡೆಯಲು ಮುಂದಾಗಿದೆ. ಜೊತೆಗೆ ಕೊರೊನಾ ಕಾರಣದಿಂದ ಜನರು ಮನರಂಜನೆಯಿಂದ ವಂಚಿತರಾಗಿದ್ದು, ಈ ಬಾರಿಯ ಐಪಿಎಲ್‍ಗಾಗಿ ಕಾಯುತ್ತಿದ್ದಾರೆ. ಹೆಚ್ಚು ಜನ ವೀಕ್ಷಣೆ ಮಾಡಲಿದ್ದಾರೆ ಎಂದು ವಾಹಿನಿ ಅಂದಾಜಿಸಿದೆ.

ಜಾಹೀರಾತು ವೆಚ್ಚವನ್ನು ಜಾಸ್ತಿ ಮಾಡಿರುವುದನ್ನು ಸಮರ್ಥನೆ ಮಾಡಿಕೊಂಡಿರುವ ವಾಹಿನಿ, ಭಾರತ ಮತ್ತು ಪಾಕಿಸ್ತಾನ ವಿರುದ್ಧದ ವಿಶ್ವಕಪ್ ಪಂದ್ಯಗಳ ಸಮಯದಲ್ಲಿ 10 ಸೆಕೆಂಡ್‍ಗಳ ಜಾಹೀರಾತಿಗೆ 25 ಲಕ್ಷ ರೂ. ಮತ್ತು ವಿಶ್ವಕಪ್‍ನ ಇತರ ಪಂದ್ಯಗಳಿಗೆ 16 ರಿಂದ 18 ಲಕ್ಷ ರೂ. ಪಡೆದುಕೊಳ್ಳುತ್ತೇವೆ. ಇದಕ್ಕೆ ಹೋಲಿಸಿಕೊಂಡರೆ ಐಪಿಎಲ್ ಜಾಹೀರಾತಿಗೆ ನಿಗದಿ ಮಾಡಿದ ಹಣ ದುಬಾರಿಯಲ್ಲ ಎಂದು ತಿಳಿಸಿದೆ. ಇದನ್ನು ಓದಿ: ಭಾರೀ ಮೊತ್ತಕ್ಕೆ ಐಪಿಎಲ್ ಪ್ರಾಯೋಜಕತ್ವ ಪಡೆದ ಡ್ರೀಮ್ 11 ಕಂಪನಿ

ಈ ಬಾರಿಯ ಐಪಿಎಲ್ ಅನ್ನು ಮನೆಯಲ್ಲೇ ಕುಳಿತು ಜಾಸ್ತಿ ಜನ ವೀಕ್ಷಣೆ ಮಾಡುತ್ತಾರೆ ಎಂದು ಅಂದಾಜಿಸಲಾಗಿದೆ. ಜೊತೆಗೆ ಐಪಿಎಲ್ ಫೈನಲ್ ಪಂದ್ಯಗಳು ದೀಪಾವಳಿ ಸಮಯದಲ್ಲಿ ಬರುವ ಕಾರಣ ಹೆಚ್ಚು ಜನರು ಐಪಿಎಲ್ ಅನ್ನು ನೋಡುತ್ತಾರೆ ಎಂಬ ಕಾರಣಕ್ಕೆ ವಾಹಿನಿ ತನ್ನ ಜಾಹೀರಾತು ದರವನ್ನು ಏರಿಸಿದೆ. ಮುಂದಿನ 10 ದಿನದ ಒಳಗೆ ಜಾಹೀರಾತಿಗೆ ಸಂಬಂಧಪಟ್ಟ ಡೀಲ್ಸ್ ಗಳು ಮುಕ್ತಾಯವಾಗಲಿವೆ.

ಐಪಿಎಲ್ ಅನ್ನು ಸೆಪ್ಟೆಂಬರ್ 19ರಿಂದ ನವೆಂಬರ್ 10ರವರೆಗೆ ಯುಎಇಯಲ್ಲಿ ನಡೆಸಲು ಬಿಸಿಸಿಐ ತೀರ್ಮಾನ ಮಾಡಿದೆ. 60 ಪಂದ್ಯ, 51 ದಿನ ಯಾವುದೇ ಪಂದ್ಯಗಳ ಕಡಿತವಿಲ್ಲದೇ ಸಂಪೂರ್ಣ ಟೂರ್ನಿ ನಡೆಯಲಿದೆ. ಈಗಾಗಲೇ ತಂಡಗಳು ಟೂರ್ನಿಗಾಗಿ ಸಿದ್ಧತೆ ನಡೆಸಿದ್ದು, ಕೊರೊನಾ ಪರೀಕ್ಷೆಯ ನಂತರ ಯುಎಇಗೆ ಹಾರಲು ರೆಡಿಯಾಗಿವೆ.

ಸ್ಟಾರ್ ವಾಹಿನಿ ಎರಡು ರೀತಿಯಲ್ಲಿ ಐಪಿಎಲ್‍ನಿಂದ ಆದಾಯಗಳಿಸುತ್ತದೆ. ಹಾಟ್‍ಸ್ಟಾರ್ ಅಪ್ಲಿಕೇಶನ್‍ನಲ್ಲಿ ಬರುವ ಆನ್‍ಲೈನ್ ಜಾಹೀರಾತು ಬೇರೆ ಬೇರೆ ಆಗಿರುತ್ತದೆ. ಅಷ್ಟೇ ಅಲ್ಲದೇ ಲೈವ್ ಸ್ಕೋರ್, ಚಾಟ್ ಸಮಯದಲ್ಲಿ ಜಾಹೀರಾತುಗಳನ್ನು ಪ್ರದರ್ಶನ ಮಾಡುತ್ತದೆ. 2019ರ ಐಪಿಎಲ್‍ನ್ನು ದೇಶದಲ್ಲಿ 42 ಕೋಟಿ ಜನ ವೀಕ್ಷಣೆ ಮಾಡಿದ್ದರು. ಟಿವಿ ವೀಕ್ಷಣೆಯ ಶೇ.51 ರಷ್ಟು ವೀಕ್ಷಕರು ಈ ಅವಧಿಯಲ್ಲಿ ಐಪಿಎಲ್ ವೀಕ್ಷಿಸಿದ್ದರು.

ಬಿಡ್‌ ಗೆದಿದ್ದ ಸ್ಟಾರ್‌ ಇಂಡಿಯಾ:
2018ರಿಂದ 2022ರವರೆಗಿನ ಇಂಡಿಯನ್ ಪ್ರೀಮಿಯರ್ ಲೀಗ್(ಐಪಿಎಲ್) ಜಾಗತಿಕ ಪ್ರಸಾರದ ಹಕ್ಕನ್ನು ಸ್ಟಾರ್ ಇಂಡಿಯಾ ಪಡೆದುಕೊಂಡಿದೆ. 2017ರಲ್ಲಿ ನಡೆದ ಹರಾಜು ಪ್ರಕ್ರಿಯೆಯಲ್ಲಿ 16,347 ಕೋಟಿ ರೂ. ನೀಡಿ ಟಿವಿ ಮತ್ತು ಡಿಜಿಟಲ್ ಮೀಡಿಯಾದ ಹಕ್ಕನ್ನು ಸ್ಟಾರ್ ಇಂಡಿಯಾ ಪಡೆದುಕೊಂಡಿತ್ತು.

ಭಾರತದಲ್ಲಿ ಪ್ರಸಾರದ ಹಕ್ಕಿಗಾಗಿ ಸೋನಿ ಪಿಕ್ಚರ್ಚ್ 11,050 ಕೋಟಿ ರೂ. ಹಣವನ್ನು ಬಿಡ್ ಮಾಡಿದ್ದರೆ ಸ್ಟಾರ್ ಇಂಡಿಯಾ 6,196.94 ಕೋಟಿ ರೂ. ಹಣವನ್ನು ಭಾರತದ ಪ್ರಸಾರಕ್ಕೆ ಬಿಡ್ ಮಾಡಿತ್ತು. ಆದರೆ ಸೋನಿ ಪಿಕ್ಚರ್ಸ್ ಇತರ ಹಕ್ಕು ಗಳಿಗೆ ಬಿಡ್ ಮಾಡದ ಕಾರಣ ಅಂತಿಮವಾಗಿ ಐಪಿಎಲ್ ಪ್ರಸಾರದ ಹಕ್ಕನ್ನು ಸ್ಟಾರ್ ಇಂಡಿಯಾ ಪಡೆದುಕೊಂಡಿತ್ತು.

ಈ ಬಿಡ್ ಪ್ರಕ್ರಿಯೆಯಲ್ಲಿ ಯುಪ್ ಟಿವಿ, ಗಲ್ಫ್ ಡಿಟಿಎಚ್ ಒಎಸ್‍ಎನ್, ಪರ್‍ಫಾರ್ಮ್ ಮೀಡಿಯಾ, ಏರ್‌ಟೆಲ್‌ , ರಿಲಯನ್ಸ್ ಜಿಯೋ, ಟೈಮ್ಸ್ ಇಂಟರ್ ನೆಟ್, ಫೇಸ್‍ಬುಕ್, ಅಮೆಜಾನ್, ಇಎಸ್‍ಪಿಎನ್ ಡಿಜಿಟಲ್ ಮೀಡಿಯಾಗಳು ಭಾಗವಹಿಸಿತ್ತು. ಭಾರತದಲ್ಲಿ ಡಿಜಿಟಲ್ ಪ್ರಸಾರದ ಹಕ್ಕಿಗೆ ಏರ್‌ಟೆಲ್, ರಿಲಯನ್ಸ್ ಜಿಯೋ, ಟೈಮ್ಸ್ ಇಂಟರ್ ನೆಟ್, ಫೇಸ್‍ಬುಕ್ ಬಿಡ್ ಮಾಡಿತ್ತು.

ಹಕ್ಕು ಇಷ್ಟೊಂದು ಮೊತ್ತಕ್ಕೆ ಹರಾಜು ಆದ ಕಾರಣ ಐಪಿಎಲ್ ಪ್ರತಿ ಪಂದ್ಯದ ಟಿವಿ ಶುಲ್ಕ 2018ರಿಂದ ಹೆಚ್ಚಾಗಲಿದೆ. ಈ ಹಿಂದೆ ಒಂದು ಪಂದ್ಯಕ್ಕೆ 15 ಕೋಟಿ ರೂ. ಆಗಿದ್ದರೆ, ಇನ್ನು ಮುಂದೆ ಈ ಮೌಲ್ಯ ಮೂರು ಪಟ್ಟು ಹೆಚ್ಚಾಗಬಹುದು ಎಂದು ಅಂದಾಜಿಸಲಾಗಿದೆ. ಪ್ರಸ್ತುತ ಈಗ ಭಾರತದ ಒಂದು ಏಕದಿನ ಪಂದ್ಯಕ್ಕೆ ಟಿವಿ ಶುಲ್ಕ 45 ಕೋಟಿ ರೂ. ಇದ್ದರೆ, ಐಪಿಎಲ್ ನಲ್ಲಿ 55 ಕೋಟಿ ರೂ.ಗೆ ಏರಿಕೆಯಾಗಬಹುದು ಎಂದು ಕ್ರಿಕೆಟ್ ಸಂಖ್ಯಾಶಾಸ್ತ್ರಜ್ಞ ಮೋಹನ್ ದಾಸ್ ಮೆನನ್ ಹೇಳಿದ್ದರು.

Click to comment

Leave a Reply

Your email address will not be published. Required fields are marked *