Connect with us

Crime

ಆಲೂಗಡ್ಡೆ ಕರಿ ತಿನ್ನಲ್ಲ ಎಂದ ಪತಿಗೆ ಹಿಗ್ಗಾಮುಗ್ಗ ಥಳಿಸಿದ ಪತ್ನಿ!

Published

on

– ಬಲ ಭುಜಕ್ಕೆ ಗಂಭೀರ ಗಾಯ

ಅಹಮದಾಬಾದ್: ರಾತ್ರಿ ಊಟಕ್ಕೆ ಮಾಡಿದ್ದ ಆಲೂಗಡ್ಡೆ ಕರಿ ತಿನ್ನಲ್ಲ ಎಂದ ಪತಿಗೆ ಪತ್ನಿ ಹಿಗ್ಗಾಮುಗ್ಗ ಥಳಿಸಿದ ಪ್ರಸಂಗವೊಂದು ಅಹಮದಾಬಾದಿನ ವಸ್ನಾ ಪ್ರದೇಶದಲ್ಲಿ ನಡೆದಿದೆ.

40 ವರ್ಷದ ಹರ್ಷದ್ ಗೊಹೆಲ್ ತನ್ನ ಪತ್ನಿ ತಾರಾ ಗೊಹೆಲ್ ನಿಂದ ಹಲ್ಲೆಗೊಳಗಾಗಿದ್ದಾನೆ. ಹರ್ಷದ್ ತರಕಾರಿ ಮಾರಾಟ ಮಾಡುತ್ತಾ ಜೀವನ ಸಾಗಿಸುತ್ತಿದ್ದಾನೆ. ಇದೀಗ ಪತ್ನಿಯ ರೌದ್ರವತಾರಕ್ಕೆ ಗಾಯಗೊಂಡಿರುವ ಪತಿ ಆಸ್ಪತ್ರೆಗೆ ದಾಖಲಾಗಿದ್ದಾನೆ.

ನಡೆದಿದ್ದೇನು?:
ಶುಕ್ರವಾರ ರಾತ್ರಿ ಹರ್ಷದ್ ತನ್ನ ಪತ್ನಿಯ ಬಳಿ ಊಟಕ್ಕೆ ಏನು ಮಾಡಿದ್ದಿ ಎಂದು ಕೇಳಿದ್ದಾನೆ. ಈ ವೇಳೆ ಪತ್ನಿ ಆಲೂಗಡ್ಡೆ ಕರಿ ಹಾಗೂ ಚಪಾತಿ ಮಾಡಿರುವುದಾಗಿ ತಿಳಿಸಿದ್ದಾಳೆ.

ಹರ್ಷದ್ ಮಧುಮೇಹ ಸಮಸ್ಯೆಯಿಂದ ಬಳಲುತ್ತಿದ್ದು, ಈ ಹಿನ್ನೆಲೆಯಲ್ಲಿ ಆಲೂಗಡ್ಡೆ ಸೇವಿಸಬೇಡಿ ಎಂದು ವೈದ್ಯರು ಸಲಹೆ ನೀಡಿದ್ದರು. ಇತ್ತ ಪತ್ನಿ ಆಲೂಗಡ್ಡೆ ಪಲ್ಯ ಅಂದಾಗ ಹರ್ಷದ್ ವೈದ್ಯರ ಮಾತನ್ನು ಹೇಳುತ್ತಾ ನನಗೆ ಬೇಡ ಎಂದಿದ್ದಾನೆ. ಅಲ್ಲದೆ ಆರೋಗ್ಯಕ್ಕೆ ಒಳ್ಳೆಯದಲ್ಲ, ನಾನು ತಿನ್ನಲ್ಲ ಎಂದು ಗೊತ್ತಿದ್ದರೂ ಯಾಕೆ ಆಲೂಗಡ್ಡೆ ಪಲ್ಯ ಮಾಡಿದ್ದೀಯಾ ಎಂದು ಪ್ರಶ್ನಿಸಿದ್ದಾನೆ. ಇಷ್ಟಕ್ಕೆ ಸಿಟ್ಟಿಗೆದ್ದ ಪತ್ನಿ ತಾರಾ, ಪತಿಯನ್ನು ನಿಂದಿಸಲು ಆರಂಭಿಸಿದ್ದಾಳೆ ಎಂದು ಹರ್ಷದ್ ಎಫ್‍ಐಆರ್ ನಲ್ಲಿ ದಾಖಲಿಸಿದ್ದಾನೆ.

ತನ್ನನ್ನು ನಿಂದಿಸುತ್ತಿದ್ದ ಪತ್ನಿಯನ್ನು ಹರ್ಷದ್ ತಡೆದಿದ್ದಾನೆ. ಇದರಿಂದ ಮತ್ತೆ ರೊಚ್ಚಿಗೆದ್ದ ತಾರಾ, ನೇರವಾಗಿ ಬಾತ್‍ರೂಮಿಗೆ ತೆರಳಿ ವಾಷಿಂಗ್ ಬ್ಯಾಟ್ ಹಿಡಿದುಕೊಂಡು ಬಂದು ಚೆನ್ನಾಗಿ ಥಳಿಸಿದ್ದಾಳೆ. ಪತ್ನಿ ಥಳಿಸುತಿದ್ದಂತೆಯೇ ಹರ್ಷದ್ ಚೀರಾಡುತ್ತಾ ಸಹಾಯಕ್ಕಾಗಿ ಕುಟುಂಬಸ್ಥರನ್ನು ಕರೆದಿದ್ದಾನೆ. ಕೂಡಲೇ ಎಲ್ಲರೂ ಸ್ಥಳಕ್ಕೆ ದೌಡಾಯಿಸಿ ತಾರಾಳನ್ನು ತಡೆದಿದ್ದಾರೆ.

ಘಟನೆಯಿಂದ ಹರ್ಷದ್ ಬಲ ಭುಜಕ್ಕೆ ಎಟ್ಟು ಬಿದ್ದಿದ್ದು, ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ. ಇದೀಗ ಘಟನೆ ಸಂಬಂಧ ತಾರಾ ವಿರುದ್ಧ ಪತಿ ಮೇಲೆ ದೌರ್ಜನ್ಯ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

Click to comment

Leave a Reply

Your email address will not be published. Required fields are marked *