Thursday, 14th November 2019

ಮರದ ಕೊಂಬೆಗಳ ಮಧ್ಯೆ ಕುತ್ತಿಗೆ ಸಿಲುಕಿ ಗಂಡು ಜಿರಾಫೆ ಸಾವು

ಬೀಜಿಂಗ್: ಮರದ ಕೊಂಬೆಗಳ ಮಧ್ಯೆ ಕುತ್ತಿಗೆ ಸಿಲುಕಿ ಜಿರಾಫೆ ಸಾವನ್ನಪ್ಪಿರೋ ಘಟನೆ ಚೀನಾದ ಪ್ರಾಣಿ ಸಂಗ್ರಹಾಲಯದಲ್ಲಿ ನಡೆದಿದೆ.

ಮರದ ಕೊಂಬೆಗಳ ಮಧ್ಯೆ ಸಿಲುಕಿ ಒದ್ದಾಡುತ್ತಿದ್ದ ಜಿರಾಫೆಯನ್ನು ರಕ್ಷಿಸಲು ಮೃಗಾಲಯದ ಸಿಬ್ಬಂದಿ ಸತತ 5 ಗಂಟೆಗಳ ಕಾಲ ಹರಸಾಹಸಪಟ್ಟಿದ್ದಾರೆ. ಕೊನೆಗೆ ಮರದ ಒಂದು ಕಡೆಯ ಕೊಂಬೆಯನ್ನು ತುಂಡರಿಸಿದ್ದಾರೆ. ಆದ್ರೆ ಜಿರಾಫೆ ಅದಾಗಲೇ ಮೃತಪಟ್ಟಿದೆ ಅಂತ ಸಿಬ್ಬಂದಿ ತಿಳಿಸಿದ್ದಾರೆ.

ಚೀನಾದ ಯುನ್ನಾನ್ ಪ್ರಾಂತ್ಯದಲ್ಲಿರುವ ಕುನ್ನಿಂಗ್ ಪ್ರಾಣಿ ಸಂಗ್ರಹಾಲಯದ 4 ಜಿರಾಫೆಗಳಿವೆ. ಇವುಗಳಲ್ಲಿ ಹಾಯ್ ರಾಂಗ್ ಹಿರಿಯ ಜಿರಾಫೆಯಾಗಿದೆ. ಕಳೆದ 5 ವರ್ಷದಿಂದ ರಾಂಗ್ ಇದೇ ಝೂನಲ್ಲಿ ವಾಸಿಸುತ್ತಿದೆ.

ಹಾಯ್ ರಾಂಗ್ ಯಾವತ್ತೂ ಉತ್ಸಾಹದಿಂದ ಇರುತ್ತಿದ್ದ. ಝೂ ಆವರಣದಲ್ಲಿ ಮರದ ಸುತ್ತ ಆಟವಾಡುತ್ತಿದ್ದ ಸಂದರ್ಭದಲ್ಲಿ ಆತನ ಕುತ್ತಿಗೆ ಮರದ ಕೊಂಬೆಗಳ ಮಧ್ಯೆ ಸಿಲುಕಿ ಟ್ವಿಸ್ಟ್ ಆಗಿದೆ. ಆತನ ರಕ್ಷಣೆಗೆ ಹರಸಾಹಸಪಟ್ರೂ ಆತನನ್ನು ಉಳಿಸಿಕೊಳ್ಳಲು ಸಾಧ್ಯವಾಗಿಲ್ಲ ಅಂತ ಸಿಬ್ಬಂದಿ ಬೇಸರ ವ್ಯಕ್ತಪಡಿಸಿದ್ದಾರೆ.

ಮೃಗಾಲಯದ 6 ಮಂದಿ ಸಿಬ್ಬಂದಿ ಜಿರಾಫೆಯನ್ನು ರಕ್ಷಿಸಲು ಪ್ರಯತ್ನಿಸುವ ದೃಶ್ಯವನ್ನು ಇತರ ಸಿಬ್ಬಂದಿ ಸೆರೆಹಿಡಿದಿದ್ದು, ಈ ದೃಶ್ಯವನ್ನು ಚೀನಾ ವೆಬ್ ಸೈಟ್ ಗಳು ಪ್ರಕಟಿಸಿದೆ. ವಿಡಿಯೋದಲ್ಲಿ 5 ಗಂಟೆಗಳ ಕಾಲ ಜಿರಾಫೆಯ ಕುತ್ತಿಗೆಯನ್ನು ಕೊಂಬೆಗಳ ಮಧ್ಯದಿಂದ ಯಾವುದೇ ಅಪಾಯವಾಗದಂತೆ ಹೊರತೆಗೆಯಲು ಪ್ರಯತ್ನಿಸಿದ್ದಾರೆ. ಆದ್ರೆ ಇವರ ಪ್ರಯತ್ನ ವಿಫಲವಾಗಿದೆ. ಜಿರಾಫೆಯನ್ನು ರಕ್ಷಿಸಲು ಹೋಗಿ ಸಿಬ್ಬಂದಿಯ ಕೈಗೆ ಗಾಯಗಳಾಗಿದೆ. ಕೂಡಲೇ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಗಿದೆ ಎಂಬುದಾಗಿ ವರದಿಯಾಗಿದೆ.

Leave a Reply

Your email address will not be published. Required fields are marked *