ಬೆಂಗಳೂರು: ಲಿವಿಂಗ್ ರಿಲೇಷನ್‍ಶಿಪ್‍ನಲ್ಲಿದ್ದು ತನ್ನ ತಂಗಿಗೆ ಮೋಸ ಮಾಡಿದ್ದಕ್ಕೆ ಸಹೋದರರು ಸೇರಿ ಯುವಕನ ಕಾಲು ಮುರಿದ ಘಟನೆ ಬೆಂಗಳೂರಿನ ಜೆಜೆಆರ್ ನಗರದಲ್ಲಿ ನಡೆದಿದೆ.
ರಿಜ್ವಾನ್ ಷರೀಫ್(24) ಎರಡೂ ಕಾಲು ಕಳೆದುಕೊಂಡ ಯುವಕ. ರಿಜ್ವಾನ್ ಷರೀಫ್ ಯುವತಿಯೊಬ್ಬಳ ಜೊತೆ ಮನೆ ಬಿಟ್ಟು ಓಡಿ ಹೋಗಿದ್ದನು. 15 ದಿನದ ನಂತರ ಯುವತಿ ಜೊತೆ ವಾಪಸ್ ಬಂದು ಈಕೆಯನ್ನು ಮದುವೆ ಆಗುವುದಿಲ್ಲ ಎಂದು ಹೇಳಿದ್ದನು.
ಇದರಿಂದ ಸಿಟ್ಟಿಗೆದ್ದ ಯುವತಿ ಮೋಸ ಮಾಡಿದ ಯುವಕನ ಮೇಲೆ ರೇಪ್ ಕೇಸ್ ಹಾಕಿ ಜೈಲಿಗೆ ಕಳುಹಿಸಿದ್ದಳು. ಈ ನಡುವೆ ಯುವತಿಯ ಮನೆಯವರು ಆಕೆಗೆ ಮತ್ತೊಂದು ಮದುವೆ ಮಾಡಿಸಿದ್ದಾರೆ. ಬಳಿಕ ಜೈಲಿನಿಂದ ಬಿಡುಗಡೆಯಾಗಿದ್ದ ರಿಜ್ವಾನ್‍ನನ್ನು ಕರೆದು ಯುವತಿಯ ಸಹೋದರರು ಹಲ್ಲೆ ಮಾಡಿದ್ದಾರೆ.
ಯುವತಿಯ ಅಣ್ಣಂದಿರು ರಿಜ್ವಾನ್‍ಗೆ ಕಬ್ಬಿಣದ ರಾಡ್‍ನಿಂದ ಹೊಡೆದು ಕಾಲು ಮುರಿದಿದ್ದಾರೆ. ಹಲ್ಲೆಯಿಂದ ಗಂಭೀರವಾಗಿ ಗಾಯಗೊಂಡ ರಿಜ್ವಾನ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ. ಈ ಬಗ್ಗೆ ಜೆಜೆಆರ್ ನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
