ಬೀಜಿಂಗ್: 7 ತಿಂಗಳ ಗರ್ಭಿಣಿ ಬಾಲಕನೊಬ್ಬನಿಗೆ ಬುದ್ಧಿ ಕಲಿಸಲು ಕಾಲನ್ನು ಅಡ್ಡವಿಟ್ಟು ಆತನನ್ನು ಬೀಳಿಸಿದ ಘಟನೆ ಚೀನಾದಲ್ಲಿ ನಡೆದಿದೆ. ಈ ವಿಡಿಯೋ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ವಿಡಿಯೋ ನೋಡಿದ ಜನರು ಗರ್ಭಿಣಿಯನ್ನು ಟೀಕಿಸಿದ್ದಾರೆ.
4 ವರ್ಷದ ಅಪರಿಚಿತ ಬಾಲಕ ರೆಸ್ಟೋರೆಂಟ್ ಬಳಿ ಓಡಿ ಬರುತ್ತಿದ್ದ. ಓಡಿ ಬಂದು ಬಾಗಿಲಿಗೆ ಹಾಕಿದ ಪ್ಲಾಸ್ಟಿಕ್ ಕರ್ಟ್‍ನ್ ನನ್ನು ತಳ್ಳಿ ಒಳಗೆ ಪ್ರವೇಶಿಸಿದಾಗ ಅಲ್ಲಿಯೇ ತನ್ನ ಪತಿ ಜೊತೆ ಕುಳಿತ್ತಿದ್ದ ಗರ್ಭಿಣಿಗೆ ತಾಗಿ ಆಕೆಯ ಊಟ ಮೈಮೇಲೆ ಚೆಲ್ಲಿತ್ತು. ಆದರೆ ಬಾಲಕನಿಗೆ ಇದರ ಬಗ್ಗೆ ಅರಿವಿರಲಿಲ್ಲ.
ಬಾಲಕ ಓಡಿ ಹೋಗುವಾಗ ಆತನನ್ನು ಮಹಿಳೆ ಹಾಗೂ ಆಕೆಯ ಪತಿ ಗಮನಿಸುತ್ತಿದ್ದರು. ನಂತರ ಮತ್ತೆ ಬಾಲಕ ರೆಸ್ಟೋರೆಂಟ್‍ನಿಂದ ಹೊರ ಹೋಗುವಾಗ ಮಹಿಳೆ ತನ್ನ ಬಲಗಾಲನ್ನು ಅಡ್ಡವಿಟ್ಟು ಆತನನ್ನು ಬೀಳಿಸಿದ್ದಾಳೆ. ಮಹಿಳೆ ಕಾಲನ್ನು ಅಡ್ಡವಿಟ್ಟಿದ್ದನ್ನು ಬಾಲಕ ಗಮನಿಸದೇ ಓಡಿ ಹೋಗುವಾಗ ಬಿದ್ದಿದ್ದಾನೆ.
ಬಾಲಕ ಬಿದ್ದಿದ್ದರೂ ಮಹಿಳೆ ಹಾಗೂ ಆಕೆಯ ಪತಿ ಆತನಿಗೆ ಸಹಾಯ ಮಾಡದೇ ಊಟ ಮಾಡಿದ್ದಾರೆ. ನಂತರ ಬಾಲಕನ ಕಿರುಚಿದ ಧ್ವನಿ ಕೇಳಿ ತಾಯಿ ಓಡಿ ಬಂದು ಆತನನ್ನು ಎತ್ತಿದ್ದಾರೆ.
ಮಾಧ್ಯಮಗಳ ಪ್ರಕಾರ ಬಾಲಕ ಹೃದಯ ಸಂಬಂಧಿ ಕಾಯಿಲೆಯಿಂದ ಬಳಲುತ್ತಿದ್ದು, ರೆಸ್ಟೋರೆಂಟ್‍ನಲ್ಲಿ ಬಿದ್ದ ಮೇಲೆ ಆಸ್ಪತ್ರೆಯಲ್ಲಿ ಎರಡು ದಿನ ದಾಖಲಾಗಿದ್ದನು. ಘಟನೆ ಹೇಗಾಯ್ತು ಎಂದು ಕೇಳಿದಾಗ, ಬಾಲಕ ಕಾಲನ್ನು ಅಡ್ಡ ಇರಿಸಿ ಬೀಳಿಸಿದ ವಿಚಾರವನ್ನು ತಿಳಿಸಿದ್ದಾನೆ.
ಮಗನ ಮಾತು ಕೇಳಿ ತಾಯಿ ರೆಸ್ಟೋರೆಂಟ್‍ನ ಸಿಸಿಟಿವಿ ಕ್ಯಾಮೆರಾ ಪರಿಶೀಲಿಸಿದ್ದಾಗ ವಿಡಿಯೋ ನೋಡಿ ದಂಗಾಗಿ ಹೋಗಿದ್ದಾರೆ. ಸತ್ಯಾಂಶ ತಿಳಿದಾಗ ಬಾಲಕನ ತಾಯಿ ಪೊಲೀಸರಿಗೆ ಕರೆ ಮಾಡಿ ದೂರು ನೀಡಿದ್ದಾರೆ.
ಪೊಲೀಸರು 7 ತಿಂಗಳ ಗರ್ಭಿಣಿಯನ್ನು 10 ದಿನ ಬಂಧಿಸಿ 1000 ಯುವಾನ್ (10,500 ರೂ)ದಂಡ ವಿಧಿಸಿದ್ದಾರೆ. ಮಹಿಳೆ ಗರ್ಭಿಣಿಯಾಗಿದ್ದ ವಿಚಾರ ಮೊದಲೇ ತಿಳಿದಿದ್ದರೆ, ನಾನು ದೂರು ದಾಖಲಿಸುತ್ತಿರಲಿಲ್ಲ. ನನಗೂ ಮಕ್ಕಳಿದ್ದು, ಆಕೆಯ ಮಗುವಿಗೆ ನೋವು ಮಾಡಲು ಇಷ್ಟಪಡುತ್ತಿರಲಿಲ್ಲ ಎಂದು ಬಾಲಕನ ತಾಯಿ ತಿಳಿಸಿದ್ದಾರೆ.
ಸದ್ಯ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಮಹಿಳೆ ವಿರುದ್ಧ ಜನರು ತಮ್ಮ ಆಕ್ರೋಶವನ್ನು ಹೊರಹಾಕುತ್ತಿದ್ದಾರೆ. ಮಹಿಳೆ ಬಾಲಕನ ತಾಯಿಯ ಹತ್ತಿರ ಕ್ಷಮೆ ಕೇಳಿ, ಆಸ್ಪತ್ರೆಯ ವೆಚ್ಚವನ್ನು ನಾನೇ ಭರಿಸುತ್ತೇನೆ ಎಂದು ತಿಳಿಸಿದ್ದಾಳೆ.
