– ಒಂದು ಗ್ಯಾಂಗ್ ರೇಪ್, ಇನ್ನೊಂದು ಕೊಲೆ ಶಂಕೆ
ಲಕ್ನೋ: ಉತ್ತರ ಪ್ರದೇಶದ ಎರಡು ಪ್ರತ್ಯೇಕ ಜಿಲ್ಲೆಯಲ್ಲಿ ವಿಚಿತ್ರವಾಗಿ ಕೊಲೆ ಮಾಡಲಾದ ಇಬ್ಬರು ಮಹಿಳೆಯರ ಶವಗಳು ಸಿಕ್ಕಿವೆ. ಒಂದು ಗ್ಯಾಂಗ್ ರೇಪ್ ಹಾಗೂ ಇನ್ನೊಂದು ಕೊಲೆ ಎಂದು ಪೊಲೀಸರು ಶಂಕಿಸಿದ್ದಾರೆ.
ಮೊದಲ ಮಹಿಳೆಯ ಶವ ಶುಕ್ರವಾರ ರಾತ್ರಿ ಬಿಜ್ನೋರ್ ಜಿಲ್ಲೆಯ ಗಜ್ರೋಲ ಎಂಬ ಹಳ್ಳಿಯಲ್ಲಿ ಸಿಕ್ಕಿದೆ. ಈ ಪ್ರಕರಣದಲ್ಲಿ ಮಹಿಳೆಯನ್ನು ಕೊಲೆ ಮಾಡಿ ಮೃತದೇಹವನ್ನು ಸುಟ್ಟು ಮಂಚವೊಂದಕ್ಕೆ ಕಟ್ಟಿಹಾಕಲಾಗಿದೆ. ನೋಯ್ಡಾದ ನಿವಾಸಿ ಒಡೆತನದಲ್ಲಿ ಇರುವ ಮಾವಿನ ತೋಟದಲ್ಲಿ ಸಂತ್ರಸ್ತೆಯ ಶವ ಸಿಕ್ಕಿದೆ.
ಈ ಘಟನೆಯ ಬಗ್ಗೆ ಮಾವಿನ ತೋಟಕ್ಕೆ ವಾಚ್‍ಮ್ಯಾನ್ ಆಗಿ ಕಾರ್ಯನಿರ್ವಹಿಸುತ್ತಿದ್ದ ವ್ಯಕ್ತಿ ಪೊಲೀಸರಿಗೆ ಮಾಹಿತಿ ನೀಡಿದ್ದಾನೆ. ಆಗ ಸ್ಥಳಕ್ಕೆ ಬಂದ ಪೊಲೀಸರಿಗೆ ಶವದ ಬಳಿ ಎರಡು ಗುಂಡುಗಳು ಸಿಕ್ಕಿದ್ದು, ಮಹಿಳೆಯನ್ನು ಮಂಚಕ್ಕೆ ಕಟ್ಟಿ ಅವಳನ್ನು ಗುಂಡಿಕ್ಕಿ ಕೊಂದು. ನಂತರ ಅವಳ ಮೃತ ದೇಹವನ್ನು ಬೆಂಕಿ ಹಚ್ಚಿ ಸುಟ್ಟು ಹಾಕಲಾಗಿದೆ. ಮಹಿಳೆಯ ಶವ ಸಂಪೂರ್ಣ ಸುಟ್ಟು ಹೋಗಿದ್ದು, ಗುರುತಿಸುವುದು ಕಷ್ಟವಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ.
ಆ್ಯಸಿಡ್ ಹಾಕಿ ಸುಟ್ಟಿರುವ ಶಂಕೆ:
ಎರಡನೇ ಮಹಿಳೆ ಶವ ಬೆತ್ತಲಾದ ಸ್ಥಿತಿಯಲ್ಲಿ ಬಹ್ರೇಚ್ ಜಿಲ್ಲೆಯ ನೌಬಾನಾ ಗ್ರಾಮದ ಬಳಿ ಪತ್ತೆಯಾಗಿದೆ. ಮಹಿಳೆಯನ್ನು ಕೊಂದು ಆಕೆಯ ಮುಖದ ಮೇಲೆ ಆ್ಯಸಿಡ್ ಹಾಕಿ ಮುಖವನ್ನು ಸಂಪೂರ್ಣ ಸುಡಲಾಗಿದೆ. ಶನಿವಾರ ಈ ಶವ ದನಗಾಹಿಗಳ ಕಣ್ಣಿಗೆ ಬಿದ್ದಿದ್ದು, ಅವರು ಪೊಲೀಸರಿಗೆ ಮಾಹಿತಿ ತಿಳಿಸಿದ್ದಾರೆ.
ಸ್ಥಳಕ್ಕೆ ಬಂದು ಪರಿಶೀಲನೆ ಮಾಡಿರುವ ಪೊಲೀಸರು, ಸಂತ್ರಸ್ತೆಯನ್ನು ಯಾರೋ ಕಿಡಿಗೇಡಿಗಳು ಗ್ಯಾಂಗ್ ರೇಪ್ ಮಾಡಿ ಆ್ಯಸಿಡ್ ಹಾಕಿ ಕೊಲೆಮಾಡಿದ್ದಾರೆ ಎಂದು ಶಂಕಿಸಿದ್ದಾರೆ. ಸಾವನ್ನಪ್ಪಿರುವ ಮಹಿಳೆಯ ಶವವನ್ನು ಗುರುತಿಸಬಹುದು. ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.
