ವಾಷಿಂಗ್ಟನ್: ಅಮೆರಿಕ-ಇಸ್ರೇಲ್ (USA- Isreal) ನಡೆಸಿದ ವೈಮಾನಿಕ ದಾಳಿಯಿಂದ ಇರಾನ್ನ ಸರ್ವೋಚ್ಚ ನಾಯಕ ಮೊಜ್ತಾಬಾ ಖಮೇನಿ(Mojtaba Khamenei) ಅವರ ಮುಖ ವಿರೂಪಗೊಂಡಿದ್ದು, ಅವರಿಗೆ ಪ್ಲಾಸ್ಟಿಕ್ ಸರ್ಜರಿ (Plastic Surgery) ಅಗತ್ಯವಿದೆ ಎಂದು ವರದಿಯಾಗಿದೆ.
ಮೊಜ್ತಾಬಾ ಅವರ ಮುಖ ಮತ್ತು ತುಟಿಗಳು ತೀವ್ರವಾಗಿ ಸುಟ್ಟುಹೋಗಿವೆ. ಈ ಕಾರಣದಿಂದ ಅವರಿಗೆ ಮಾತನಾಡಲು ಕಷ್ಟವಾಗುತ್ತಿದ್ದು, ಮುಖದ ಪುನರ್ರಚನೆಗಾಗಿ ಶೀಘ್ರದಲ್ಲೇ ಪ್ಲಾಸ್ಟಿಕ್ ಸರ್ಜರಿ ಮಾಡಲು ಇರಾನ್ ಆಡಳಿತ ಮುಂದಾಗಿದೆ ಎಂದು ನ್ಯೂಯಾರ್ಕ್ ಟೈಮ್ಸ್ ವರದಿ ಮಾಡಿದೆ.
ಮುಖದ ಗಾಯಗಳಿಂದಾಗಿ ಅವರಿಗೆ ಸ್ಪಷ್ಟವಾಗಿ ಮಾತನಾಡಲು ಕಷ್ಟವಾಗುತ್ತಿದೆ. ಈ ಕಾರಣದಿಂದಲೇ ಅವರು ಯಾವುದೇ ಆಡಿಯೋ ಅಥವಾ ವಿಡಿಯೋ ಸಂದೇಶಗಳನ್ನು ಬಿಡುಗಡೆ ಮಾಡುತ್ತಿಲ್ಲ.
ಮೊಜ್ತಾಬಾ ಅವರ ಒಂದು ಕಾಲಿಗೆ ಈಗಾಗಲೇ ಮೂರು ಬಾರಿ ಶಸ್ತ್ರಚಿಕಿತ್ಸೆ ಮಾಡಲಾಗಿದ್ದು, ಪ್ರಸ್ತುತ ಅವರು ಕೃತಕ ಕಾಲು (Prosthetic leg) ಅಳವಡಿಕೆಗೆ ಕಾಯುತ್ತಿದ್ದಾರೆ. ಅವರ ಒಂದು ಕೈಗೂ ಶಸ್ತ್ರಚಿಕಿತ್ಸೆಯಾಗಿದ್ದು, ಅದು ಈಗ ನಿಧಾನವಾಗಿ ಚಲನೆಯನ್ನು ಕಂಡುಕೊಳ್ಳುತ್ತಿದೆ. ಇದನ್ನೂ ಓದಿ: ಇರಾನ್ ಬೋಟ್ಗಳನ್ನು ನೋಡಿದ ಕೂಡಲೇ ಗುಂಡು ಹಾರಿಸಿ ಹೊಡೆದು ಹಾಕಿ: ಟ್ರಂಪ್ ಆದೇಶ
ಸದ್ಯಕ್ಕೆ ಅವರು ಭದ್ರತಾ ಕಾರಣಗಳಿಗಾಗಿ ಮತ್ತು ತಮ್ಮ ಸುಟ್ಟ ಮುಖದೊಂದಿಗೆ ಕಾಣಿಸಿಕೊಳ್ಳಲು ಇಷ್ಟಪಡದ ಕಾರಣ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿಲ್ಲ. ದೇಹ ತೀವ್ರ ಗಾಯಗೊಂಡಿದ್ದರೂ ಮೊಜ್ತಾಬಾ ಅವರು ಮಾನಸಿಕವಾಗಿ ಚುರುಕಾಗಿದ್ದಾರೆ ಮತ್ತು ದೇಶದ ಪ್ರಮುಖ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಭದ್ರತಾ ಕಾರಣಗಳಿಗಾಗಿ ಅವರು ಡಿಜಿಟಲ್ ಮಾಧ್ಯಮಗಳನ್ನು ಬಳಸುತ್ತಿಲ್ಲ. ಬದಲಾಗಿ ಕಾಗದದಲ್ಲಿ ಬರೆದ ಸಂದೇಶಗಳನ್ನು ವಿಶ್ವಾಸಾರ್ಹ ವ್ಯಕ್ತಿಗಳ ಮೂಲಕ ರವಾನಿಸುತ್ತಿದ್ದಾರೆ.
ಸದ್ಯಕ್ಕೆ ಅವರು ಗುಪ್ತ ಸ್ಥಳವೊಂದರಲ್ಲಿ ವೈದ್ಯರ ಕಠಿಣ ನಿಗಾದಲ್ಲಿದ್ದಾರೆ. ಹೃದಯ ಶಸ್ತ್ರಚಿಕಿತ್ಸಕರೂ ಆಗಿರುವ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯನ್ ಮತ್ತು ಅಲ್ಲಿನ ಆರೋಗ್ಯ ಸಚಿವರು ನೇರವಾಗಿ ಅವರ ಚಿಕಿತ್ಸೆಯನ್ನು ಮೇಲ್ವಿಚಾರಣೆ ಮಾಡುತ್ತಿದ್ದಾರೆ. ಸದ್ಯಕ್ಕೆ ಅವರು ಸಾರ್ವಜನಿಕವಾಗಿ ಕಾಣಿಸಿಕೊಳ್ಳದ ಕಾರಣ ಇರಾನ್ನ ಮಿಲಿಟರಿ (IRGC) ಆಡಳಿತದಲ್ಲಿ ಹೆಚ್ಚಿನ ಪ್ರಭಾವ ಬೀರುತ್ತಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಇದನ್ನೂ ಓದಿ: Explained| ಇರಾನ್ ಅಮೆರಿಕದ F-15E Strike Eagle ವಿಮಾನವನ್ನು ಹೊಡೆದು ಹಾಕಿದ್ದು ಹೇಗೆ? ರಷ್ಯಾದ ಪಾತ್ರ ಏನು?
ತಂದೆಯ ನಿವಾಸದ ಮೇಲೆ ನಡೆದ ಭೀಕರ ವೈಮಾನಿಕ ದಾಳಿಯಿಂದ ಮೊಜ್ತಾಬಾ ಖಮೇನಿ ಅವರು ಕೆಲ ಸೆಕೆಂಡ್ ಅಂತರದಲ್ಲಿ ಪ್ರಾಣಾಪಾಯದಿಂದ ಪಾರಾಗಿದ್ದರು. ಫೆಬ್ರವರಿ 28 ರಂದು ಟೆಹ್ರಾನ್ನಲ್ಲಿರುವ ಖಮೇನಿ ನಿವಾಸದ ಮೇಲೆ ಅಮೆರಿಕ-ಇಸ್ರೇಲ್ ವೈಮಾನಿಕ ದಾಳಿ ನಡೆಸಿತ್ತು.
ಕ್ಷಿಪಣಿಗಳು ಅವರ ಮನೆಯ ಮೇಲ್ಮಹಡಿಗೆ ಅಪ್ಪಳಿಸುವ ಮೊದಲು ಮೊಜ್ತಾಬಾ ಅವರು ಏನೋ ಕೆಲಸದ ಮೇಲೆ ಅಥವಾ ತೋಟದಲ್ಲಿ ಅಡ್ಡಾಡಲು ಮನೆಯಿಂದ ಹೊರಬಂದಿದ್ದರು.
ಲೀಕ್ ಆಗಿರುವ ಆಡಿಯೋ ವರದಿಗಳ ಪ್ರಕಾರ, ಅವರು ಮನೆಯಿಂದ ಹೊರಬಂದ ಕೆಲವೇ ಕ್ಷಣಗಳಲ್ಲಿ ಅಮೆರಿಕ ಮತ್ತು ಇಸ್ರೇಲ್ನ ‘ಬ್ಲೂ ಸ್ಪ್ಯಾರೋ’ (Blue Sparrow) ಕ್ಷಿಪಣಿಗಳು ಅವರ ನಿವಾಸವನ್ನು ನೆಲಸಮಗೊಳಿಸಿದ್ದವು. ಈ ದಾಳಿಯಲ್ಲಿ ಅವರ ತಂದೆ ಅಲಿ ಖಮೇನಿ, ಅವರ ಪತ್ನಿ ಝಹ್ರಾ ಹದಾದ್-ಅಡೆಲ್ ಮತ್ತು ಅವರ ಮಗ ಸೇರಿದಂತೆ ಕುಟುಂಬದ ಆರು ಸದಸ್ಯರು ಸ್ಥಳದಲ್ಲೇ ಮೃತಪಟ್ಟಿದ್ದರು.
