ಥಾಣೆ: ಪ್ರೇಮ ವೈಫಲ್ಯದಿಂದ ಬೇಸತ್ತು ಯುವಕನೊಬ್ಬ ತನ್ನ ಮಾಜಿ ಪ್ರೇಯಸಿಗೆ ವಿಡಿಯೋ ಕಾಲ್ ಮಾಡಿ ಆಕೆಯ ಕಣ್ಣೆದುರೇ ಆತ್ಮಹತ್ಯೆಗೆ ಮಾಡಿಕೊಂಡಿದ್ದು ತಡವಾಗಿ ಬೆಳಕಿಗೆ ಬಂದಿದೆ.
ಹನಿ ಅಸ್ವಾನಿ (26) ಆತ್ಮಹತ್ಯೆಗೆ ಶರಣಾದ ಯುವಕ. ಮೇ 21ರಂದು ಉಲ್ಲಾಸನಗರದಲ್ಲಿರುವ ತಮ್ಮ ನಿವಾಸದಲ್ಲಿ ಹನಿ ಅಸ್ವಾನಿ ನೇಣಿಗೆ ಶರಣಾಗಿದ್ದು, ಈಗ ಆತನ ತಂದೆ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.
ಏನಿದು ಲವ್ ಸ್ಟೋರಿ?
ಅಸ್ವಾನಿ ತನ್ನ ಕಾಲೇಜಿನ ಯುವತಿಯನ್ನು 6 ವರ್ಷದಿಂದ ಪ್ರೀತಿಮಾಡುತ್ತಿದ್ದ. ಯುವತಿ ಕೂಡ ಈತನನ್ನು ತುಂಬಾ ಪ್ರೀತಿಸುತ್ತಿದ್ದಳು. ಏನೋ ಒಂದು ಕಾರಣಕ್ಕೆ ಇಬ್ಬರ ಮಧ್ಯೆ ಭಿನ್ನಾಭಿಪ್ರಾಯ ಉಂಟಾಗಿ ಲವ್ ಬ್ರೇಕಪ್ ಆಗಿತ್ತು.
ಬ್ರೇಕಪ್ ಆಗಿದ್ದರೂ ಅಸ್ವಾನಿ ಪ್ರೀತಿ ಮಾಡಿದ ತನ್ನ ಹಳೇ ಪ್ರೇಯಸಿಯನ್ನು ಮರೆತಿರಲಿಲ್ಲ. ಮೇ 21 ರಂದು ಹನಿ ಅಸ್ವಾನಿ ಮತ್ತೆ ತನ್ನ ಮಾಜಿ ಪ್ರೇಯಸಿಯನ್ನು ಭೇಟಿಯಾಗಿದ್ದ. ಆ ವೇಳೆ ಇಬ್ಬರ ಮಧ್ಯೆ ಸಣ್ಣ ಜಗಳವಾಗಿತ್ತು. ಆತ ಇದರಿಂದ ನೊಂದು ತನ್ನ ಮನೆಗೆ ಬಂದು ತನ್ನ ಮಾಜಿ ಪ್ರೇಯಸಿಗೆ ವಿಡಿಯೋ ಕಾಲ್ ಮುಖಾಂತರ ಮಾತನಾಡುತ್ತಲೇ ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.
ವಿಡಿಯೋ ಈಗ ಸಿಕ್ಕಿತು:
ಹನಿ ನೇಣಿಗೆ ಶರಣಾಗುತ್ತಿರುವ ವಿಡಿಯೋ ಆತನ ಪೋಷಕರಿಗೆ ಕೆಲ ದಿನಗಳ ಹಿಂದೆ ಸಿಕ್ಕಿದೆ. ಈ ವಿಡಿಯೋವನ್ನು ಪೊಲೀಸರಿಗೆ ಜೂನ್ 18ರಂದು ತೋರಿಸಿ ದೂರು ನೀಡಿದ್ದಾರೆ. ಪೊಲೀಸರು ಹನಿ ಅಸ್ವಾನಿಯ ಮಾಜಿ ಪ್ರೇಯಸಿ ವಿರುದ್ಧ ಐಪಿಸಿ ಸೆಕ್ಷನ್ 306(ಆತ್ಮಹತ್ಯೆಗೆ ಪ್ರೇರಣೆ) ಅಡಿಯಲ್ಲಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
