ಕೋಲ್ಕತ್ತಾ: ಪಾರ್ಕ್ ಮಾಡಿದ್ದ ಬಸ್ಸಿನೊಳಗೆ 3 ವರ್ಷದ ಬಾಲಕಿಯನ್ನು ಎಳೆದು ಬಳಿಕ ಆಕೆಯ 5ರ ಅಣ್ಣನ ಎದುರೇ 45 ವರ್ಷದ ಬಸ್ ಕ್ಲೀನರ್ ಅತ್ಯಾಚಾರ ಎಸಗಿರುವ ಆಘಾತಕಾರಿ ಘಟನೆ ಉತ್ತರ ಕೊಲ್ಕತ್ತಾದ ಕಾನಾಲ್ ರಸ್ತೆಯಲ್ಲಿ ನಡೆದಿದೆ.
ಶೇಖ್ ಮುನ್ನಾ ಎಂಬಾತನೇ ಬಾಲಕಿಯ ಮೇಲೆ ಅತ್ಯಾಚಾರವೆಸಗಿದ ಕಾಮುಕ ಬಸ್ ಕ್ಲೀನರ್. ಈತ ಸೋಮವಾರ ಬಾಲಕಿಯ ಮೇಲೆ ಅತ್ಯಾಚಾರವೆಸಗಿದ್ದು, ಸದ್ಯ ಪ್ರಕರಣ ಸಂಬಂಧ ಆರೋಪಿಯನ್ನು ಬಂಧಿಸಲಾಗಿದೆ. ಬಾಲಕಿ ಬಸ್ ನಿಂದ ಹೊರಗೆ ಓಡದಂತೆ ಬಸ್ ಬಾಗಿಲು ಹಾಕಿಕೊಂಡು ಆರೋಪಿ ಈ ಕೃತ್ಯ ಎಸಗಿದ್ದಾನೆ.
ಸೋಮವಾರ ಮಧ್ಯಾಹ್ನ ಸಂತ್ರಸ್ತ ಬಾಲಕಿ ತನ್ನ ಸಹೋದರನ ಜೊತೆ ಮನೆಯ ಮುಂಭಾಗದಲ್ಲಿ ಆಟವಾಡುತ್ತಿದ್ದಳು. ಈ ವೇಳೆ ಚೆಂಡು ಪಾರ್ಕ್ ಮಾಡಿದ್ದ ಬಸ್ ಬಳಿ ಬಿದ್ದಿದ್ದರಿಂದ ಅದನ್ನು ತರಲು ಆಕೆ ಅಲ್ಲಿಗೆ ತೆರಳಿದ್ದಾಳೆ. ಈ ವೇಳೆ ಕಾಮುಕ ಕ್ಲೀನರ್ ಮಗುವನ್ನು ಒಳಗೆ ಎಳೆದುಕೊಂಡು ಬಾಗಿಲು ಹಾಕಿದ್ದಾನೆ.
ಇತ್ತ ಬಾಲಕಿಯ ಸಹೋದರ ಆಕೆಯನ್ನು ಹಿಂಬಾಲಿಸಿ ಹೋಗಿದ್ದಾನೆ. ಬಾಲಕಿ ಕೂಗಾಡುತ್ತಿದ್ದಾಗ ಸಹೋದರ ಮುಚ್ಚಿದ ಬಾಗಿಲನ್ನು ತೆರೆಯುವಂತೆ ಬಡಿದಿದ್ದಾನೆ. ಆದರೆ ಆತ ಎಷ್ಟೇ ಬಾಗಿಲು ಬಡಿದು ಮನವಿ ಮಾಡಿಕೊಂಡ್ರೂ, ಆರೋಪಿ ಮಾತ್ರ ಬಾಗಿಲು ತೆರೆಯಲಿಲ್ಲ. ಕೊನೆಗೆ ಆತ ಬಾಗಿಲು ತೆರೆಯುವುದಿಲ್ಲ ಎಂಬುದನ್ನು ಅರಿತುಕೊಂಡ ಸಹೋದರ, ಬಾಲಕಿಯನ್ನು ಅಲ್ಲೇ ಬಿಟ್ಟು ಮನೆಗೆ ದೌಡಾಯಿಸಿದ್ದಾನೆ. ಅಲ್ಲದೇ ಕೂಡಲೇ ತಾಯಿಗೆ ನಡೆದ ವಿಚಾರವನ್ನು ಹೇಳಿದ್ದಾನೆ ಎಂದು ಬಾಲಕಿಯ ಚಿಕ್ಕಪ್ಪ ಹೇಳಿದ್ದಾರೆ.
ವಿಚಾರ ತಿಳಿದ ತಾಯಿ ಮಗನ ಜೊತೆಯಲ್ಲಿ ಕೂಗಿಕೊಂಡು ಬಸ್ ಬಳಿ ಓಡಿಹೋಗಿದ್ದಾರೆ. ತಕ್ಷಣ ಆಕೆಯ ಕೂಗು ನೆರೆಹೊರೆಗೆ ಕೇಳಿಸಿದ್ದು, ಅವರೆಲ್ಲರೂ ಒಟ್ಟಾಗಿ ಬಸ್ ಬಾಗಿಲನ್ನು ತೆರೆದಿದ್ದಾರೆ. ಆಗ ಬಸ್ ಸೀಟಿನಲ್ಲಿ ಮಲಗಿದ್ದ ಬಾಲಕಿಯನ್ನು ನೋಡಿದ್ದಾರೆ. ಬಾಲಕಿ ರಕ್ತಸ್ರಾವವಾಗುತ್ತಿದ್ದು, ತಕ್ಷಣ ಆಕೆಯನ್ನು ಖಾಸಗಿ ಆಸ್ಪತ್ರೆಯ ದಾಖಲಿಸಿದ್ದಾರೆ. ಅಲ್ಲಿಂದ ಆರ್ ಜಿ ಜಿ ವೈದ್ಯಕೀಯ ಕಾಲೇಜು ಮತ್ತು ಆಸ್ಪತ್ರೆಗೆ ರವಾನಿಸಿದ್ದಾರೆ. ಆದರೆ ಬಾಲಕಿಗೆ ತೀವ್ರ ರಕ್ತಸ್ರಾವವಾಗಿದ್ದು, ಚೇತರಿಸಿಕೊಳ್ಳಲು ಸಮಯ ಬೇಕು ಎಂದು ವೈದ್ಯರು ತಿಳಿಸಿದ್ದಾರೆ.
ಪೊಲೀಸರು ಆರೋಪಿಯನ್ನು ಬಂಧಿಸುವ ಮೊದಲು ಎಲ್ಲರೂ ಸೇರಿ ಕಾಮುಕನನ್ನು ಹಿಡಿದು ಥಳಿಸಿದ್ದಾರೆ. ನಂತರ ಬಾಲಕಿಯನ್ನು ಆಸ್ಪತ್ರೆಗೆ ದಾಖಲು ಮಾಡಿದ್ದಾರೆ.
ಬಂಧಿತ ಆರೋಪಿ ಮುನ್ನಾನ ತನಿಖೆಗೆ ಸಹಾಯವಾಗುತ್ತದೆ ಎಂದು ಬಸ್ಸಿನಲ್ಲಿದ್ದ ರಕ್ತದ ಕಲೆಗಳನ್ನು ಸಂಗ್ರಹಿಸಿದ್ದು, ಬಸ್ ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
