ಚೆನ್ನೈ: ತಮಿಳುನಾಡಿನ ಸೇಲಂನಲ್ಲಿ ಇಬ್ಬರು ಚಾಲಕರು ಹಾಗೂ ಒಬ್ಬ ನಿರ್ವಾಹಕ ಸೇರಿ ಪ್ರೈವೇಟ್ ಬಸ್‍ನಲ್ಲಿ 14 ವರ್ಷದ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರವೆಸಗಿದ್ದಾರೆ ಎನ್ನಲಾಗಿದ್ದು, ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ.
ಈ ವರ್ಷ 9ನೇ ತರಗತಿ ಪೂರೈಸಿರೋ ಬಾಲಕಿ ಸೇಲಂನಲ್ಲಿನ ತನ್ನ ಮನೆಯಿಂದ ಓಡಿಹೋಗಿದ್ದು, ಸೋಮವಾರ ಮಧ್ಯಾಹ್ನ ಬಸ್ ಹತ್ತಿದ್ದಳು. ಮುಂದಿನ 7 ಗಂಟೆಗಳ ಕಾಲ ಬಸ್ ಸೇಲಂನಿಂದ ಓಮಲೂರಿಗೆ ಹಾಗೂ ಓಮಲೂರಿನಿಂದ ಸೇಲಂಗೆ ಸುಮಾರು 20 ಕಿಲೋಮೀಟರ್‍ನಷ್ಟು ಹೋಗಿ ಬಂದಿದ್ದು ಈ ವೇಳೆ ಬಾಲಕಿ ಬಸ್‍ನಲ್ಲೇ ಇದ್ದಳು.
ಕೊನೆಯ ಟ್ರಿಪ್ ನಂತರ ಬಸ್ಸಿನ ನೌಕರರು ಒಮಲೂರಿನಿಂದ ಸುಮಾರು 7 ಕಿ.ಮೀ ದೂರದಲ್ಲಿ ನಿರ್ಜನ ಪ್ರದೇಶದಲ್ಲಿ ಬಸ್ಸನ್ನು ನಿಲ್ಲಿಸಿ, ಒಬ್ಬರಾದ ನಂತರ ಒಬ್ಬರು ಬಾಲಕಿಗೆ ಲೈಂಗಿಕ ಕಿರುಕುಳ ನೀಡಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.
ಬಸ್‍ನಿಂದ ಕೆಳಗಿಳಿಯದಂತೆ ಬಾಲಕಿಗೆ ಹೆದರಿಸಿದ್ದರು. ಮೂರನೆಯ ವ್ಯಕ್ತಿ ಆಕೆಯ ಮೇಲೆ ದೌರ್ಜನ್ಯವೆಸಗಿದಾಗ ಆಕೆ ಅವರಿಂದ ತಪ್ಪಿಸಿಕೊಂಡು ಕಿರುಚಾಡಿದ್ದಾಳೆ. ನಂತರ ಸ್ಥಳೀಯರು ಆಕೆಯನ್ನು ರಕ್ಷಿಸಿ ಆರೋಪಿಗಳನ್ನು ಪೊಲೀಸರಿಗೆ ಒಪ್ಪಿಸಿದ್ದಾರೆಂದು ಹಿರಿಯ ಅಧಿಕಾರಿಯೊಬ್ಬರು ಪತ್ರಿಕೆಯೊಂದಕ್ಕೆ ತಿಳಿಸಿದ್ದಾರೆ.
ಬಾಲಕಿಯ ಪೋಷಕರು ಸೇಲಂನಲ್ಲಿ ದಿನಗೂಲಿ ಕಾರ್ಮಿಕರಾಗಿದ್ದು, ಬಾಲಕಿ ಈ ಹಿಂದೆಯೂ ಎರಡು ಬಾರಿ ಮನೆಯಿಂದ ಓಡಿಹೋಗಿದ್ದಳು ಎಂದು ಪೊಲೀಸರು ಹೇಳಿದ್ದಾರೆ. ಸದ್ಯ ಬಾಲಕಿಯನ್ನು ಕೌನ್ಸೆಲಿಂಗ್ ಮಾಡಲಾಗುತ್ತಿದ್ದು, ಮಕ್ಕಳ ರಕ್ಷಣಾ ಗೃಹದಲ್ಲಿದ್ದಾಳೆ.
ಘಟನೆಗೆ ಸಂಬಂಧಿಸಿದಂತೆ ಪೋಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ.
