ಕನ್ನಡ ಚಿತ್ರರಂಗದಲ್ಲಿ ಯಶಸ್ವಿ ಜೋಡಿಯಾಗಿ ಗುರುತಿಸಿಕೊಂಡಿರುವವರು ಸುದೀಪ್ ಮತ್ತು ರವಿಚಂದ್ರನ್. ಮಾಣಿಕ್ಯ, ಹೆಬ್ಬುಲಿ, ಅಪೂರ್ವ ಚಿತ್ರಗಳಲ್ಲಿ ಒಟ್ಟಾಗಿ ನಟಿಸಿದ್ದ ಇವರೀಗ ರವಿ ಬೋಪಣ್ಣ ಚಿತ್ರದಲ್ಲಿ ನಾಲ್ಕನೇ ಬಾರಿ ಒಂದಾಗುತ್ತಿದ್ದಾರೆ. ಇಂಥಾದ್ದೊಂದು ಸುದ್ದಿ ವಾರದ ಹಿಂದೆ ಜಾಹೀರಾಗಿತ್ತು. ಇದೀಗ ಈ ಚಿತ್ರದಲ್ಲಿ ಸುದೀಪ್ ಅವರ ಪಾತ್ರ ಕೂಡಾ ರಿವೀಲ್ ಆಗಿದೆ.
ರವಿ ಬೋಪಣ್ಣ ಚಿತ್ರದಲ್ಲಿ ಸುದೀಪ್ ಲಾಯರ್ ಆಗಿ ನಟಿಸಿದ್ದಾರೆ. ತಮ್ಮ ಭಾಗದ ಚಿತ್ರೀಕರಣವನ್ನೂ ಕೂಡಾ ಮುಗಿಸಿಕೊಂಡಿದ್ದಾರೆ. ಇದು ರವಿಚಂದ್ರನ್ ನಿರ್ದೇಶನದಲ್ಲಿ ಸುದೀಪ್ ನಟಿಸುತ್ತಿರೋ ಎರಡನೇ ಚಿತ್ರ. ಈ ಹಿಂದೆ ಅಪೂರ್ವ ಚಿತ್ರದಲ್ಲಿಯೂ ಅತಿಥಿ ಪಾತ್ರದಲ್ಲಿ ಅವರು ನಟಿಸಿದ್ದರು. ಈಗ ರವಿ ಬೋಪಣ್ಣದಲ್ಲಿಯೂ ಅತಿಥಿ ಪಾತ್ರವನ್ನೇ ನಿರ್ವಹಿಸಿದ್ದಾರೆ. ಪಾತ್ರ ಚಿಕ್ಕದಿರಲಿ, ದೊಡ್ಡದೇ ಇರಲಿ… ರವಿಚಂದ್ರನ್ ನಿರ್ದೇಶನದಲ್ಲಿ ನಟಿಸೋದೇ ಖುಷಿಯ ವಿಚಾರ ಎಂಬ ಅಭಿಪ್ರಾಯವನ್ನೂ ಸುದೀಪ್ ವ್ಯಕ್ತಪಡಿಸಿದ್ದಾರೆ.
ಇನ್ನುಳಿದಂತೆ ಸುದೀಪ್ ಪಾತ್ರದ ಬಗ್ಗೆ ಒಂದಷ್ಟು ಮಾಹಿತಿಗಳನ್ನು ರವಿಚಂದ್ರನ್ ಕೂಡಾ ಹಂಚಿಕೊಂಡಿದ್ದಾರೆ. ಸುದೀಪ್ ಲಾಯರ್ ಆಗಿ ಎಂಟ್ರಿ ಕೊಡೋದು ಕ್ಲೈಮ್ಯಾಕ್ಸ್‍ನಲ್ಲಂತೆ. ಹೀಗೆ ಸುದೀಪ್ ಪಾತ್ರ ಎಂಟ್ರಿ ಕೊಟ್ಟಾಗಲೇ ಚಿತ್ರದ ಕಥೆ ಮತ್ತೊಂದು ಹಂತಕ್ಕೆ ಹೋಗುತ್ತದೆ. ಸುದೀಪ್ ಪಾತ್ರದ ಚಿತ್ರೀಕರಣ ಸುಂದರ ಕನಸಿನಂತೆ ಮುಗಿದು ಹೋಗಿದೆ. ಯಾವುದೇ ಪಾತ್ರ ನೀಡಿದರೂ ಅದನ್ನು ಆವಾಹಿಸಿಕೊಂಡು ನಟಿಸೋ ಸುದೀಪ್‍ಗಾಗಿ ನಿರ್ದೇಶನ ಮಾಡೋದೇ ಖುಷಿಯ ವಿಚಾರವೆಂದೂ ರವಿಚಂದ್ರನ್ ಹೇಳಿದ್ದಾರೆ. ಈ ಚಿತ್ರದಲ್ಲಿ ಲಾಯರ್ ಆಗಿ ಕಾಣಿಸಿಕೊಂಡಿರೋ ಸುದೀಪ್ ಲುಕ್ ಕೂಡಾ ಚೆನ್ನಾಗಿದೆ. ಅದು ಅವರ ಈ ವರೆಗಿನ ವೆರೈಟಿ ಲುಕ್‍ಗಳಿಗಿಂತಲೂ ಭಿನ್ನವಾಗಿದೆ.
