ಅಹಮದಾಬಾದ್: ಮಲತಾಯಿಯೊಬ್ಬಳು 6 ವರ್ಷದ ಮಗನನ್ನು ಕೊಲೆ ಮಾಡಿ ಸೂಟ್‍ಕೇಸ್ ನಲ್ಲಿ ಶವವನ್ನ ತುಂಬಿದ್ದ ಘಟನೆ ಗುಜರಾತ್‍ನ ಕೃಷ್ಣನಗರ್ ನಲ್ಲಿ ನಡೆದಿದೆ.
ಝೀನಲ್ ಮಗನನ್ನು ಕೊಲೆ ಮಾಡಿದ ಪಾಪಿ ತಾಯಿ. 6 ವರ್ಷದ ಧ್ರುವ್ ನನ್ನು ಕೊಂದ ಬಳಿಕ ಸೂಟ್‍ಕೇಸ್‍ನಲ್ಲಿ ಶವವನ್ನ ತುಂಬಿದ್ದ ಈಕೆ, 2 ಗಂಟೆಗಳಿಂದ ಮಗ ಕಾಣೆಯಾಗಿದ್ದಾನೆಂದು ಹುಡುಕಾಡುವ ನಾಟಕವಾಡಿದ್ದಳು. ಗಂಡ ಶಾಂತಿಲಾಲ್ ಜೊತೆ ಸೇರಿ ಎಲ್ಲಾ ಕಡೆ ಮಗನಿಗಾಗಿ ಹುಡುಕಾಡಿ ಕೊನೆಗೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.
ಪೊಲೀಸರು ಮನೆಗೆ ಬಂದು ತಪಾಸಣೆ ಮಾಡಿದಾಗ ಸೂಟ್‍ಕೇಸ್ ಪತ್ತೆಯಾಗಿತ್ತು. ಅದನ್ನ ತೆಗೆದು ನೋಡಿದಾಗ ಬಾಲಕನ ಮೃತದೇಹವಿತ್ತು. ಬಾಲಕನನ್ನ ದಾವಣಿಯಿಂದ ಸುತ್ತಲಾಗಿತ್ತು. ಪೊಲೀಸರಿಗೆ ಮಲತಾಯಿ ಝೀನಲ್ ಮೇಲೆ ಅನುಮಾನ ಬಂದು ಕೂಡಲೇ ಆಕೆಯನ್ನ ವಿಚಾರಣೆಗೆ ಒಳಪಡಿಸಿದಾಗ ಮಗನನ್ನು ಕೊಲೆ ಮಾಡಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾಳೆ.
ಝೀನಲ್ ಹಾಗೂ ಶಾಂತಿಲಾಲ್ ಒಂದು ವರ್ಷದ ಹಿಂದೆ ಮದುವೆಯಾಗಿದ್ದರು. ಇಬ್ಬರಿಗೂ ಇದು ಎರಡನೇ ಮದುವೆಯಾಗಿತ್ತು. ಶಾಂತಿಲಾಲ್‍ಗೆ ಮೊದಲನೇ ಮದುವೆಯಿಂದ ಮಗನಿದ್ದರೆ, ಝೀನಲ್‍ಗೆ ಮಗಳಿದ್ದಳು. ಇಬ್ಬರೂ ಮೂರನೇ ಮಗು ಬೇಡವೆಂಬ ಷರತ್ತಿನ ಮೇಲೆ ಮದುವೆಯಾಗಿದ್ದರು. ಆದ್ರೆ ಝೀನಲ್ ಯಾವಾಗ್ಲೂ ತನ್ನ ಮಗಳ ಬಗ್ಗೆಯೇ ಚಿಂತಿಸುತ್ತಿದ್ದು, ಕೊನೆಗೆ ಬಾಲಕನನ್ನು ಕೊಲೆ ಮಾಡಿದ್ದಾಳೆ.
ಶಾಂತಿಲಾಲ್ ಅವರ ಎಲ್ಲಾ ಆಸ್ತಿ ಮಗನಿಗೆ ಸೇರಿದ್ದಾಗಿದ್ದು, ಮಗಳ ಪಾಡೇನು ಎಂದು ಝೀನಲ್ ಚಿಂತೆಯಲ್ಲಿದ್ದಳು. ಇದೇ ಕಾರಣದಿಂದ ಧ್ರುವ್ ನನ್ನು ಆತನ ಪ್ಯಾಂಟ್ ನಿಂದಲೇ ಕುತ್ತಿಗೆ ಬಿಗಿದು ಕೊಲೆ ಮಾಡಿದ್ದು, ನಂತರ ಜನರ ಮುಂದೆ ನಾಟಕವಾಡಿದ್ದಾಳೆ.
ಸದ್ಯ ಝೀನಲ್ ಳನ್ನು ಪಲೀಸರು ಬಂಧಿಸಿದ್ದಾರೆ.
