ಮುಂಬೈ: ಬಾಲಿವುಡ್ ನಟಿ ಶಿಲ್ಪಾ ಶೆಟ್ಟಿ ದಂಪತಿ ನಟಿ ಶೆರ್ಲಿನ್ ಚೋಪ್ರಾ ಮೇಲೆ 50 ಕೋಟಿ ರೂಪಾಯಿ ಮಾನನಷ್ಟ ಮೊಕದ್ದಮೆಯನ್ನು ಹೂಡಿದ್ದಾರೆ.
ಲೈಂಗಿಕ ದೌರ್ಜನ್ಯ, ಮೋಸ, ಕ್ರಿಮಿನಲ್ ಬೆದರಿಕೆ ಆರೋಪ ಹೊರಿಸಿ ರಾಜ್ ಕುಂದ್ರಾ ವಿರುದ್ಧ ಅಕ್ಟೋಬರ್ 14ರಂದು ಶೆರ್ಲಿನ್ ಚೋಪ್ರಾ ದೂರು ನೀಡಿದ್ದರು. ಜುಹು ಪೊಲೀಸ್ ಠಾಣೆಯ ಹೊರಭಾಗ ಪತ್ರಕರ್ತರ ಜೊತೆ ಮಾತನಾಡಿದ್ದ ಶೆರ್ಲಿನ್ ಚೋಪ್ರಾ , ಲೈಂಗಿಕ ದೌರ್ಜನ್ಯ, ಮೋಸ ಮಾಡಿದ್ದಾರೆ ಎಂದು ರಾಜ್ ಕುಂದ್ರಾ ವಿರುದ್ಧ ದೂರು ನೀಡಿದ್ದೇನೆ ಎಂದು ಹೇಳಿದ್ದಾರೆ. 2019ರ ಮಾರ್ಚ್ 17ರಂದು ರಾಜ್ ಕುಂದ್ರಾ ಅವರು ನನ್ನ ಮನೆಗೆ ಬಂದು ಲೈಂಗಿಕ ದೌರ್ಜನ್ಯ ಮಾಡಿದ್ದಾರೆ ಎಂದು ಶೆರ್ಲಿನ್ ಹೇಳಿದ್ದಾರೆ.
ಪ್ರಾಜೆಕ್ಟ್‌ವೊಂದರ ಸಲುವಾಗಿ ಮಾರ್ಚ್ 27, 2019 ರಂದು ಬಿಸಿನೆಸ್ ಮೀಟಿಂಗ್ ನಡೆದ ನಂತರದಲ್ಲಿ ಮೆಸೇಜ್‍ಗಳ ವಿನಿಮಯ ವೇಳೆ ನನ್ನ ಹಾಗೂ ರಾಜ್ ಕುಂದ್ರಾ ಮಧ್ಯೆ ವಾಗ್ವಾದ ನಡೆದಿತ್ತು. ಈ ವೇಳೆ ಹೇಳದೇ ಕೇಳದೆ ರಾಜ್ ಕುಂದ್ರಾ ನನ್ನ ಮನೆಗೆ ಬಂದಿದ್ದರು ಎಷ್ಟೇ ವಿರೋಧಿಸಿದರೂ ಕೂಡ, ರಾಜ್ ಕುಂದ್ರಾ ನನ್ನನ್ನು ಚುಂಬಿಸಿದರು ಎಂದು ಶೆರ್ಲಿನ್ ಚೋಪ್ರಾ ಹೇಳಿದ್ದರು.
ಶೆರ್ಲಿನ್ ಚೋಪ್ರಾಗೆ ಲೀಗಲ್ ನೋಟಿಸ್:
ಈಗಾಗಲೇ ಶೆರ್ಲಿನ್ ಚೋಪ್ರಾ ಅವರಿಗೆ ಶಿಲ್ಪಾ ಶೆಟ್ಟಿ ದಂಪತಿ ಲೀಗಲ್ ನೋಟಿಸ್ ನೀಡಲಾಗಿದೆ. ಸುಳ್ಳು, ಆಧಾರ ರಹಿತ ದೂರು ನೀಡಲಾಗಿದೆ. ಹಣ ಗಳಿಸಲು ಹೆಸರು ಹಾಳು ಮಾಡುವ ಮಾರ್ಗ ಅನುಸರಿಸಲಾಗುತ್ತಿದೆ ಎಂದು ಶಿಲ್ಪಾ ಶೆಟ್ಟಿ ವಕೀಲರು ಹೇಳಿದ್ದಾರೆ. ಶಿಲ್ಪಾ ದಂಪತಿ ವಿರುದ್ಧ ಶೆರ್ಲಿನ್ ಚೋಪ್ರಾ ಅವರು ಮಾಧ್ಯಮ ಹಾಗೂ ಸೋಶಿಯಲ್ ಮೀಡಿಯಾದಲ್ಲಿ ಹೇಳಿಕೆ ನೀಡಿದ್ದರು. ಟಿಆರ್‍ಪಿಗಳಿಸಲು, ಅನಗತ್ಯ ಕಾಂಟ್ರವರ್ಸಿ ಸೃಷ್ಟಿ ಮಾಡಲು ಶೆರ್ಲಿನ್ ಈ ಮಾರ್ಗ ಅನುಸರಿಸಿದ್ದಾರೆ ಎಂದು ಲೀಗಲ್ ನೋಟೀಸ್‍ನಲ್ಲಿ ನಮೂದಿಸಲಾಗಿದೆ.
ಅಶ್ಲೀಲ ಸಿನಿಮಾಗಳ ಚಿತ್ರಿಕರಣ ಆರೋಪ ರಾಜ್ ಕುಂದ್ರಾ ಮೇಲಿದೆ. ಈ ಪ್ರಕರಣದಲ್ಲಿ ಶೆರ್ಲಿನ್ ಚೋಪ್ರಾ ಕೂಡ ಹೆಸರು ಕೇಳಿ ಬಂದಿತ್ತು. ಮುಂಬೈ ಪೊಲೀಸರು ರಾಜ್ ಕುಂದ್ರಾ ಅವರು ಈ ಪ್ರಕರಣದಲ್ಲಿ ಮುಖ್ಯ ಪಾತ್ರ ವಹಿಸಿದ್ದಾರೆ ಎಂದು ಆರೋಪ ಮಾಡಿದ್ದರು, ಅಷ್ಟೇ ಅಲ್ಲದೆ ಚಿತ್ರರಂಗಕ್ಕೆ ಬರುವ ಮಹಿಳೆಯನ್ನು ಈ ರೀತಿ ಸಿನಿಮಾ ಮಾಡುವಂತೆ ಒತ್ತಾಯ ಮಾಡಲಾಗುವುದು ಎಂದು ಕೂಡ ಹೇಳಲಾಗಿದೆ.
