ಬೆಂಗಳೂರು : ನೀರು ಮನುಷ್ಯನಿಗೆ ಅಗತ್ಯವಾದ ವಸ್ತು. ಆಹಾರ ಇಲ್ಲದೆ ಇದ್ದರು ಬದುಕಬಹುದು ಆದ್ರೆ ನೀರು ಇಲ್ಲದೆ ಬದುಕೋದು ಕಷ್ಟ. ಹಾಗೇ ಉತ್ತಮ ಆರೋಗ್ಯಕ್ಕೂ ನೀರು ಅತ್ಯವಶ್ಯಕ. ನೀರಿನ ಅಂಶ ಮನುಷ್ಯನ ದೇಹದಲ್ಲಿ ಹೆಚ್ಚು ಇರಬೇಕು ಅಂತ ವೈದ್ಯರು ಹೇಳೋದು ನೀವು ಕೇಳಿರುತ್ತೀರಾ. ಈಗ ಈ ನೀರಿನ ವಿಷಯ ಮಾತಾಡೋಕು ಕಾರಣ ಇದೆ. ಇನ್ನುಂದೆ ಶಾಲೆಗಳಲ್ಲಿ ಮಕ್ಕಳಿಗೆ ಕುಡಿಯುವ ನೀರಿಗಾಗಿ ವಿಶೇಷ ಕುಡಿಯುವ ನೀರಿನ ಬೆಲ್ ಜಾರಿಗೆ ತರಲಾಗಿದೆ.
ಮಕ್ಕಳ ಉತ್ತಮ ಆರೋಗ್ಯಕ್ಕೆ ನೀರು ಅತ್ಯವಶ್ಯಕ. ಹೀಗಾಗಿ ಸರಿಯಾದ ಸಮಯಕ್ಕೆ ನೀರು ಕುಡಿತ ಬೇಕು ಅಂತ ಶಿಕ್ಷಣ ಇಲಾಖೆ ಹೊಸ ಸುತ್ತೋಲೆ ಹೊರಡಿಸಿದೆ. ದಿನಕ್ಕೆ ಎರಡು ಬಾರಿ ಕಡ್ಡಾಯವಾಗಿ ಕುಡಿಯುವ ನೀರಿನ ಬೆಲ್ ಮಾಡಬೇಕು ಅಂತ ಸುತ್ತೋಲೆ ಹೊರಡಿಸಿದೆ. ಸಾರ್ವಜನಿಕ ಶಿಕ್ಷಣ ಇಲಾಖೆ ಹೊಸದಾಗಿ ಆದೇಶ ಹೊರಡಿಸಿದ್ದ ಬೆಳಗ್ಗೆಯ ಅವಧಿಯ 2 ಮತ್ತು 3 ಅವಧಿಯ ಮಧ್ಯದಲ್ಲಿ ಒಂದು ಕುಡಿಯುವ ನೀರಿನ ಬೆಲ್, ಮಧ್ಯಾಹ್ನ 3 ಮತ್ತು 4 ನೇ ಅವಧಿಯ ಮಧ್ಯೆ ಒಂದು ಕುಡಿಯುವ ನೀರಿನ ಬೆಲ್ ಮಾಡಬೇಕು. ಈ ಅವಧಿಯಲ್ಲಿ ಮಕ್ಕಳು ನೀರು ಕುಡಿಯಲು ಶಿಕ್ಷಕರು ಅನುವು ಮಾಡಿಕೊಡಬೇಕು ಅಂತ ಆದೇಶ ಹೊರಡಿಸಿದೆ.
ಎಲ್ಲಾ ಶಾಲೆಗಳು ಈ ಸೂಚನೆ ಪಾಲನೆ ಮಾಡೋದು ಕಡ್ಡಾಯವಾಗಿದೆ. 10 ನಿಮಿಷ ಕುಡಿಯುವ ನೀರಿಗಾಗಿ ಮೀಸಲಿಡಲು ಇಲಾಖೆಯ ಆದೇಶದಲ್ಲಿ ತಿಳಿಸಲಾಗಿದೆ. ಮಕ್ಕಳ ಆರೋಗ್ಯ ಕಾಪಾಡಲು ಶಿಕ್ಷಣ ಇಲಾಖೆಯ ಈ ಆದೇಶ ಸಹಾಯ ಆಗೋದು ಗ್ಯಾರೆಂಟಿ.
