ಮುಂಬೈ: ಬಾಲಿವುಡ್ ಭಾಯ್‍ಜಾನ್, ಸುಲ್ತಾನ್ ಸಲ್ಮಾನ್ ಖಾನ್ 15 ಸಾವಿರ ರೂ. ಬೆಲೆಯ ಸ್ಮಾರ್ಟ್ ಫೋನ್ ಜಾಹೀರಾತಿಗಾಗಿ 7 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎಂದು ವರದಿಯಾಗಿದೆ.
ಸ್ಟಾರ್ ನಟರು ಜಾಹೀರಾತುಗಳಲ್ಲಿ ಕಾಣಿಸಿಕೊಳ್ಳುವುದು ಸಹಜ. ಕೆಲ ಉತ್ಪನ್ನಗಳಿಗೆ ರಾಯಭಾರಿಯಾಗಿಯೂ ಕೆಲಸ ಮಾಡುತ್ತಾರೆ. ಕಂಪನಿಗಳು ತಮ್ಮ ಉತ್ಪನ್ನಗಳ ಮಾರಾಟಕ್ಕಾಗಿ ಸ್ಟಾರ್ ನಟರನ್ನು ಜಾಹೀರಾತುಗಳಿಗೆ ಬಳಸಿಕೊಳ್ಳುತ್ತಾರೆ. ಸ್ಟಾರ್ ನಟರ ಮೂಲಕ ಉತ್ಪನ್ನಗಳಿಗೆ ಪ್ರಚಾರ ನೀಡಿದ್ರೆ ಮಾರುಕಟ್ಟೆಯಲ್ಲಿ ಕ್ಲಿಕ್ ಆಗುತ್ತೆ ಎಂಬ ಲೆಕ್ಕಾಚಾರಗಳಿರುತ್ತವೆ. ಇದೀಗ ರಿಯಲ್ ಮಿ 6 ಪ್ರೊ ಸ್ಮಾರ್ಟ್ ಫೋನ್ ಜಾಹೀರಾತಿನಲ್ಲಿ ಸಲ್ಮಾನ್ ಖಾನ್ ಕಾಣಿಸಿಕೊಳ್ಳಲಿದ್ದಾರೆ. ಇದಕ್ಕಾಗಿ ಸಲ್ಮಾನ್ ಖಾನ್ ಬರೋಬ್ಬರಿ 7 ಕೋಟಿ ರೂ. ಸಂಭಾವನೆ ಪಡೆದಿದ್ದಾರೆ ಎನ್ನಲಾಗಿದೆ.
ಈಗಾಗಲೇ ಜಾಹೀರಾತಿನ ಚಿತ್ರೀಕರಣ ಅಂತಿಮಗೊಂಡಿದೆ. ಕಂಪನಿ 14,999 ರೂ. ಬೆಲೆ ಸ್ಮಾರ್ಟ್ ಫೋನ್ ಪ್ರಚಾರಕ್ಕಾಗಿ 7 ಕೋಟಿ ರೂ.ಯನ್ನ ನೀಡಿದೆ. ಜಾಹೀರಾತಿನ ಕೆಲ ಫೋಟೋಗಳು ಸಹ ರಿವೀಲ್ ಆಗಿವೆ.
ಕಂಪನಿಯ ಜೊತೆಗಿನ ಒಪ್ಪಂದದ ಬಳಿಕ ಪ್ರತಿಕ್ರಿಯಿಸಿರುವ ಸಲ್ಮಾನ್ ಖಾನ್, ವಿಶ್ವದಲ್ಲಿ ವೇಗವಾಗಿ ಬೆಳೆಯುತ್ತಿರುವ ಸ್ಮಾರ್ಟ್ ಫೋನ್ ಬ್ರ್ಯಾಂಡ್‍ನಲ್ಲಿ ನಾನು ಸಹ ಒಬ್ಬನಾಗಿರೋದಕ್ಕೆ ಖುಷಿಯಾಗುತ್ತಿದೆ. ರಿಯಲ್ ಮಿ 6 ಸೀರೀಜ್ ಸ್ಟೈಲಿಶ್ ಆಗಿದ್ದು ಗ್ರಾಹಕರಿಗೆ ಇಷ್ಟವಾಗಲಿದೆ ಎಂದು ಹೇಳಿದ್ದಾರೆ.
ನಮ್ಮ ಉತ್ಪನ್ನ ಗ್ರಾಹಕರಿಗೆ ತಲುಪಿಸಲು ಸಲ್ಮಾನ್ ಖಾನ್ ನಮಗೆ ಸಹಾಯವಾಗಲಿದ್ದಾರೆ. ಅವರ ಜನಪ್ರಿಯತೆ ನಮ್ಮ ಸ್ಮಾರ್ಟ್ ಫೋನ್‍ನನ್ನು ಜನರಿಗೆ ತಲುಪಿಸುತ್ತದೆ. ದೇಶದ ಪ್ರತಿ ವರ್ಗದ ಜನ ಸಲ್ಮಾನ್ ಅವರನ್ನ ಇಷ್ಟಪಡುತ್ತಾರೆ. ಸಲ್ಮಾನ್ ಖಾನ್ ನಮ್ಮನ್ನು ಗ್ರಾಹಕರ ಬಳಿಗೆ ತಲುಪಿಸುವ ಸೇತುವೆ ಆಗ್ತಾರೆ ಎಂದು ರಿಯಲ್ ಮಿ ಕಂಪನಿಯ ಸಿಇಓ ಮಾಧವ್ ಸೇಠ್ ತಿಳಿಸಿದ್ದಾರೆ.
