ಮೈಸೂರು: ಸಂಗೀತದ ಗಾನ ಕೋಗಿಲೆ ಎಂಬ ಹೆಸರಿನಿಂದ ಕರೆಸಿಕೊಳ್ಳುವ ಹಿರಿಯ ಗಾಯಕಿ ಎಸ್. ಜಾನಕಿ ಅವರು ಇಂದು ನಗರದಲ್ಲಿ ನಡೆಯುತ್ತಿರುವ ಕಾರ್ಯಕ್ರಮದಲ್ಲಿ ಹಾಡುವ ಮೂಲಕ ಗಾಯನ ನಿಲ್ಲಿಸಿದ್ದಾರೆ.
ಹೌದು, 80 ವರ್ಷದ ಎಸ್.ಜಾನಕಿ ತಮ್ಮ ಗಾಯನ ವೃತ್ತಿಯಿಂದ ವಿಶ್ರಾಂತಿ ಪಡೆಯಲಿದ್ದಾರೆ. ಇಂದು ನಗರದಲ್ಲಿ `ಎಸ್.ಜಾನಕಿ ಮ್ಯೂಸಿಕಲ್ ನೈಟ್’ ಕಾರ್ಯಕ್ರಮದಲ್ಲಿ ಸಾರ್ವಜನಿಕವಾಗಿ ಕೊನೆಯದಾಗಿ ಹಾಡಿದ್ದಾರೆ. ನಗರದ ಮಾನಸ ಗಂಗೋತ್ರಿ ಮೈದಾನದಲ್ಲಿ ಸಂಗೀತ ಕಾರ್ಯಕ್ರಮಕ್ಕೆ ಅದ್ದೂರಿ ಚಾಲನೆ ದೊರೆತಿದ್ದು, ಅನೇಕ ಸಿನಿ, ಸಂಗೀತ ಲೋಕದ ಗಣ್ಯರು ಆಗಮಿಸಿದ್ದಾರೆ.
ರಾಜವಂಶಸ್ಥೆ ಪ್ರಮೋದಾ ದೇವಿ, ನಟ ರಾಜೇಶ್, ಹಿರಿಯರಾದ ನಟಿ ಜಯಂತಿ, ಭಾರತೀ ವಿಷ್ಣುವರ್ಧನ್, ಹೇಮಾ ಚೌಧರಿ ಸೇರಿದಂತೆ ಹಲವು ಗಣ್ಯರು ಸಂಗೀತ ಕಾರ್ಯಕ್ರಮಕ್ಕೆ ಸಾಕ್ಷಿಯಾಗಿದ್ದಾರೆ. ಉದ್ಘಾಟನೆಯ ನಂತರ ಮಾತು ಆರಂಭಿಸಿದ ಗಾಯಕಿ ಎಸ್.ಜಾನಕಿ ಅವರು, ಹಾಡು ನಿಲ್ಲಿಸಿದ್ದೇನೆ. ಮೈಸೂರಿನ ಈ ಕಾರ್ಯಕ್ರಮದ ಮೂಲಕ ನನ್ನ ವೃತ್ತಿ ಜೀವನದಿಂದ ನಿವೃತ್ತಿ ಹೊಂದುತ್ತೇನೆ ಎಂದು ಹೇಳಿದರು. ಕಡೆಯ ಕಾರ್ಯಕ್ರಮದಲ್ಲು ತಮ್ಮ ಶಿಸ್ತು ಪ್ರದರ್ಶಿಸಿದ ಎಸ್.ಜಾನಕಿ ಅವರು ಉದ್ಘಾಟನೆಯ ಮಾತುಗಳ ನಂತರ, ಅರೆ ಕ್ಷಣವನ್ನು ವ್ಯರ್ಥ ಮಾಡದೆ ಹಾಡು ಆರಂಭಿಸಿದರು.
ಗಜಮುಖನನ್ನ ನೆನೆದು, ಪೂಜಿಸಲೇಂದೆ ಹಾಡಿಗೆ ಧ್ವನಿಯಾದ ಜಾನಕಮ್ಮನ ಸ್ವರಕ್ಕೆ ನೆರೆದಿದ್ದವರೇಲ್ಲ ಮೂಕ ವಿಸ್ಮಿತರಾದರು. ಕಾರ್ಯಕ್ರಮದಲ್ಲಿ ಹಾಜರಿದ್ದ ಹಿರಿಯ ನಟಿಯರಾದ ಜಯಂತಿ ಹಾಗೂ ಭಾರತಿ, ಎಸ್. ಜಾನಕಿ ಕುರಿತು ಭಾವುಕರಾಗಿ ಮಾತನಾಡಿದ್ರು. ಹಿರಿಯ ನಟ ರಾಜೇಶ್ ಹಾಗೂ ಖ್ಯಾತ ಸಂಗೀತ ನಿರ್ದೇಶಕ ರಾಜನ್ ಸಹ ವೇದಿಕೆ ಹಂಚಿಕೊಂಡು ಜಾನಕಮ್ಮರನ್ನು ಹಾಡಿಹೊಗಳಿದರು.
ಅಂತಿಮವಾಗಿ ಸತತ 3 ಗಂಟೆಗಳ ಕಾರ್ಯಕ್ರಮದ ಮೂಲಕ ಎಸ್.ಜಾನಕಿ ತಮ್ಮ ಗಾಯನ ನಿಲ್ಲಿಸಿದರು. ಬಹುತೇಕ ಕನ್ನಡ ಗೀತೆಗಳನ್ನ ಹಾಡಿ ನೆರೆದಿದ್ದವರನ್ನ ರಂಜಿಸಿದ ಜಾನಕಮ್ಮ. ತಮ್ಮ ಮುಗ್ದ ಕಂಠಸಿರಿಗೆ ವಿಶ್ರಾಂತಿ ನೀಡುವ ಮೂಲಕ ಕೋಟ್ಯಾಂತರ ಅಭಿಮಾನಿಗಳ ಮನದಲ್ಲಿ ಸುಮಧುರ ಧ್ವನಿಯಾಗಿ ಉಳಿದರು. ವೇದಿಕೆ ಏರಿದ್ದ ಅಭಿಮಾನಿಗಳು ಜಾನಕಮ್ಮರನ್ನ ಸನ್ಮಾನಿಸಿ ಗೌರವಿಸಿದರು. ಮೈಸೂರು ಪೇಟ ತೊಡಿಸಿ, ಹೂವಿನ ಹಾರಗಳೊಂದಿಗೆ, ಬಿಳ್ಕೋಡುಗೆ ನೀಡಿದ್ರು.
ಎಸ್ ಜಾನಕಿ ಅವರಿಗೆ ಈಗ ಸುಮಾರು 80 ವರ್ಷ ವಯಸ್ಸಾಗಿದ್ದು, ಸುಮಾರು 17 ಭಾಷೆಗಳಲ್ಲಿ 48 ಸಾವಿರಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿದ್ದಾರೆ. ಜೊತೆಗೆ ನಾಲ್ಕು ಬಾರಿ ತಮ್ಮ ಹಾಡಿಗೆ ರಾಷ್ಟ್ರ ಪ್ರಶಸ್ತಿ ಪಡೆದಿದ್ದಾರೆ. ಇವರು 1952ರಲ್ಲಿ ಅಂದಿನ ಪ್ರಖ್ಯಾತ ಸಂಗೀತ ನಿರ್ದೇಶಕ ಜಿ.ಕೆ. ವೆಂಕಟೇಶ್ ಅವರಿಂದ ಆಯೋಜಿಸಲ್ಪಟ್ಟಿದ್ದ ಸಂಗೀತ ಸಂಜೆಯಲ್ಲಿ ಪಿ. ಬಿ. ಶ್ರೀನಿವಾಸ್ ಜೊತೆಗೆ ಹಾಡಿದ್ದರು. ಹೀಗಾಗಿ ಜಾನಕಿ ಅವರು ತಮ್ಮ ಸಂಗೀತ ಪಯಣವನ್ನು ಪ್ರಥಮ ಬಾರಿಗೆ ಮಹಾನಗರಿಯಲ್ಲಿಯೇ ಆರಂಭಿಸಿದ್ದರು. ಇದೀಗ ಅವರ ಕೊನೆಯ ಗಾಯನ ಕೂಡ ಮೈಸೂರಿನಲ್ಲಿ ಹಾಡಿದ್ದಾರೆ.
https://www.youtube.com/watch?time_continue=1789&v=u7hM79uZF_U
