– ಸ್ವಿಗ್ಗಿ, ಝೊಮ್ಯಾಟೋ ಷೇರುಗಳ ಮೌಲ್ಯ ಇಳಿಕೆ
– ಬೆಂಗಳೂರಿನಲ್ಲಿ ಪ್ರಾಯೋಗಿಕ ಪರೀಕ್ಷೆ
ನವದೆಹಲಿ: ಆಟೋ, ಬೈಕ್ ಟ್ಯಾಕ್ಸಿ ಸೇರಿದಂತೆ ಇನ್ನಿತರ ಸೇವೆಗಳನ್ನು ಒದಗಿಸುತ್ತಿರುವ ರ‍್ಯಾಪಿಡೋ (Rapido) ಇದೀಗ ಫುಡ್ ಡೆಲಿವರಿ (Food Delivery) ಸೇವೆಯನ್ನು ಒದಗಿಸಲು ಮುಂದಾಗಿದೆ.
ಹೌದು, ಬೈಕ್ ಟ್ಯಾಕ್ಸಿಗೆ ಹೆಸರಾಗಿರುವ ರ‍್ಯಾಪಿಡೋ ಇದೀಗ ಫುಡ್ ಡೆಲಿವರಿ ಮಾಡಲು ಸಜ್ಜಾಗುತ್ತಿದೆ. ಈ ಮೂಲಕ ಸ್ವಿಗ್ಗಿ ಹಾಗೂ ಝ್ಯೊಮ್ಯಾಟೋಗೆ ಕಠಿಣ ಸ್ಪರ್ಧೆ ನೀಡಲಿದ್ದು, ಕಡಿಮೆ ಕಮಿಷನ್‌ನಲ್ಲಿ ಗ್ರಾಹಕರಿಗೆ ಸೇವೆ ಒದಗಿಸಲಿದೆ. ಈಗಾಗಲೇ ರಾಷ್ಟ್ರೀಯ ಹೋಟೆಲ್ ಒಕ್ಕೂಟಗಳ (NRAI) ಜೊತೆ ಒಪ್ಪಂದದ ಕುರಿತಾಗಿ ರ‍್ಯಾಪಿಡೋ ಮಾತುಕತೆ ನಡೆಸಿದ್ದು, ರೆಸ್ಟೋರೆಂಟ್‌ಗಳೊಂದಿಗಿನ ನಿಯಮಗಳಿಗೆ ಒಪ್ಪಿಗೆ ಸೂಚಿಸಿದೆ ಹಾಗೂ ರೆಸ್ಟೋರೆಂಟ್‌ಗಳಿಗೆ ಕಡಿಮೆ ಕಮಿಷನ್ ದರ ನೀಡುವ ಮೂಲಕ ಹೊಸ ಹೆಜ್ಜೆಹಾಕಲು ಸಿದ್ಧವಾಗಿದೆ ಎಂದು ಮೂಲಗಳು ತಿಳಿಸಿವೆ.ಇದನ್ನೂ ಓದಿ: DCET ಜೂ.10ರಿಂದ 13ರವರೆಗೆ ದಾಖಲಾತಿ ಪರಿಶೀಲನೆ – KEA
NRAI ಮಾಹಿತಿ ಪ್ರಕಾರ, ರ‍್ಯಾಪಿಡೋ ಈ ಮೂಲಕ ಸಣ್ಣ ಮಟ್ಟದ ರೆಸ್ಟೋರೆಂಟ್‌ಗಳಿಗೆ ಸಹಾಯ ಮಾಡಲಿದ್ದು, ಆರ್ಡರ್‌ನ ಬೆಲೆಯ ಆಧಾರದ ಮೇಲೆ ರೆಸ್ಟೋರೆಂಟ್‌ಗಳಿಂದ 8-15% ಕಮಿಷನ್ ವಿಧಿಸುವ ನಿರೀಕ್ಷೆಯಿದೆ. ಝ್ಯೊಮ್ಯಾಟೋ ಮತ್ತು ಸ್ವಿಗ್ಗಿಗೆ ಹೋಲಿಸಿದರೆ ಈ ಕಮಿಷನ್ ದರ ಕಡಿಮೆಯಾಗಿದ್ದು, ಅವುಗಳು 16-30% ಶುಲ್ಕ ವಿಧಿಸುತ್ತವೆ. ರ‍್ಯಾಪಿಡೋ 400 ರೂ.ಗಿಂತ ಕಡಿಮೆಯಿರುವ ಆರ್ಡರ್‌ಗಳಿಗೆ 25 ರೂ. ಮತ್ತು 400 ರೂ.ಗಿಂತ ಹೆಚ್ಚಿನ ಆರ್ಡರ್‌ಗಳಿಗೆ 50 ರೂ. ನಿಗದಿತ ಶುಲ್ಕವನ್ನು ವಿಧಿಸುತ್ತದೆ ಎಂದು ವರದಿಗಳು ತಿಳಿಸಿವೆ.
ಈ ಮೊದಲು 2015ರಲ್ಲಿ ಓಲಾ ಕಂಪನಿ ಓಲಾ ಕೆಫೆಯನ್ನು (Ola Cafe) ಪ್ರಾರಂಭಿಸಿತು. ಅದಾದ ಬಳಿಕ 2017ರಲ್ಲಿ ಉಬರ್ ಕಂಪನಿಯು ಉಬರ್ ಈಟ್ಸ್ (Uber Eats) ಎಂಬುವುದನ್ನು ಪ್ರಾರಂಭಿಸಿತು. ಬಳಿಕ 2020ರಲ್ಲಿ ಉಬರ್ ಝ್ಯೊಮ್ಯಾಟೋ ಜೊತೆಗೆ ಒಪ್ಪಂದ ಮಾಡಿಕೊಂಡು 10% ಪಾಲನ್ನು ಪಡೆಯುತ್ತಿತ್ತು. ಆದರೆ 2022ರಲ್ಲಿ ಉಬರ್ ತನ್ನ ಸಂಪೂರ್ಣ ವ್ಯವಹಾರವನ್ನು ಝ್ಯೊಮ್ಯಾಟೋಗೆ ಮಾರಾಟ ಮಾಡಿತು.
ಸದ್ಯ ಬೈಕ್, ಆಟೋ, ಪಾರ್ಸೆಲ್, ಕ್ಯಾಬ್ ಎಕಾನಮಿ ಮತ್ತು ಕ್ಯಾಬ್ ಪ್ರೀಮಿಯಂ ಸೇರಿದಂತೆ ಇನ್ನಿತರ ಸೇವೆಗಳನ್ನು ಒದಗಿಸುತ್ತಿರುವ ರ‍್ಯಾಪಿಡೋ ಜೂನ್ ಅಂತ್ಯ ಅಥವಾ ಜುಲೈ ಆರಂಭದಲ್ಲಿ ಫುಡ್ ಡೆಲಿವರಿ ಸೇವೆಯನ್ನು ಬೆಂಗಳೂರಿನಲ್ಲಿ ಆರಂಭಿಸಲಿದೆ ಹಾಗೂ ಗ್ರಾಹಕರಿಗೆ ಕೈಗೆಟುಕುವ ಬೆಲೆಯಲ್ಲಿ ತ್ವರಿತವಾಗಿ ಸಿಗುತ್ತದೆ ಸೇವೆಯನ್ನು ನೀಡಲಿದೆ ಎಂದು ತಿಳಿಸಿದೆ.
ಇನ್ನೂ ಸ್ವಿಗ್ಗಿ (Swiggy) ಹಾಗೂ ಝೊಮ್ಯಾಟೋ (Zomato) ಷೇರುಗಳ ಮೌಲ್ಯದಲ್ಲಿ (Share Price) ಇಳಿಕೆಯಾಗಿದ್ದು, ಸ್ವಿಗ್ಗಿ ಷೇರು ಮೌಲ್ಯ 2.79% (10.45 ರೂ.) ಕುಸಿದು 364.10ರೂ.ನಲ್ಲಿ ವ್ಯವಹಾರ ಮುಗಿಸಿದರೆ, ಝೋಮ್ಯಾಟೋ ಮೌಲ್ಯ 1.92% (4.87 ರೂ.) ಕುಸಿದು 256.84 ರೂ.ನಲ್ಲಿ ವ್ಯವಹಾರ ಮುಗಿಸಿದೆ.ಇದನ್ನೂ ಓದಿ: Honeymoon Murder | ಕಾಂಟ್ರ್ಯಾಕ್ಟ್‌ ಕಿಲ್ಲರ್ಸ್‌.. ಫೋನ್‌ಕಾಲ್‌ನಲ್ಲೇ ಪಿನ್‌ ಟು ಪಿನ್‌ ಅಪ್ಡೇಟ್‌ – ಕೊಲೆ ರಹಸ್ಯ ಬಯಲಾಗಿದ್ದೇ ರೋಚಕ
