ಮುಂಬೈ: ಬಾಲಿವುಡ್ ನಟ ರಣ್‍ವೀರ್ ಸಿಂಗ್ ನೋಡಿ ಪುಟ್ಟ ಬಾಲಕಿಯೊಬ್ಬಳು ಹೆದರಿಕೊಂಡು ಕಣ್ಣೀರಿಟ್ಟ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ರಣ್‍ವೀರ್ ಡಬ್ಬಿಂಗ್ ಸ್ಟುಡಿಯೋಗೆ ಕೆಂಪು ಬಣ್ಣದ ಉದ್ದದ ಹೂಡಿ ಧರಿಸಿಕೊಂಡು ಹೋಗಿದ್ದರು. ಈ ವಿಷಯ ತಿಳಿದ ಅಭಿಮಾನಿಗಳು ಅವರ ಜೊತೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಹೊರಗೆ ನಿಂತಿದ್ದರು. ಇದೇ ವೇಳೆ ಡಬ್ಬಿಂಗ್ ಸ್ಟುಡಿಯೋದಿಂದ ಹೊರ ಬಂದ ರಣ್‍ವೀರ್ ಕ್ಯಾಮೆರಾಗೆ ಪೋಸ್ ನೀಡಿದ್ದಾರೆ.
ಫೋಟೋಗೆ ಪೋಸ್ ನೀಡಿ ರಣ್‍ವೀರ್ ಕಾರಿನತ್ತ ತೆರಳುತ್ತಿದ್ದರು. ಈ ವೇಳೆ ತಂದೆಯೊಬ್ಬರು ತಮ್ಮ ಮಗಳನ್ನು ಎತ್ತಿಕೊಂಡು ರಣ್‍ವೀರ್ ಬಳಿ ಸೆಲ್ಫಿ ಕೇಳಿದ್ದಾರೆ. ರಣ್‍ವೀರ್ ಆ ಬಾಲಕಿಯ ಮುಂದೆ ಹೋಗುತ್ತಿದ್ದಂತೆ ಆಕೆ ಹೆದರಿಕೊಂಡು ಅಳುತ್ತಾ ತನ್ನ ತಂದೆಯನ್ನು ತಬ್ಬಿಕೊಂಡಿದ್ದಾಳೆ.
ಸದ್ಯ ರಣ್‍ವೀರ್ ಸಿಂಗ್ ನೋಡಿ ಬಾಲಕಿ ಅಳುತ್ತಿರುವ ವಿಡಿಯೋ ಸಾಕಷ್ಟು ವೈರಲ್ ಆಗುತ್ತಿದೆ. ಕೆಲವರು ರಣ್‍ವೀರ್ ತನ್ನ ಉಡುಪಿನಿಂದ ಪುಟ್ಟ ಬಾಲಕಿಯನ್ನು ಹೆದರಿಸಿದ್ದಾರೆ ಎಂದು ಕಮೆಂಟ್ ಮಾಡಿದ್ದಾರೆ. ಮತ್ತೆ ಕೆಲವರು ರಣ್‍ವೀರ್ ಬಿಟ್ಟು ಇಂತಹ ಉಡುಪು ಬೇರೆ ಯಾರೂ ಧರಿಸಲು ಸಾಧ್ಯವಿಲ್ಲ ಎಂದು ಕಮೆಂಟ್ ಮಾಡಿದ್ದಾರೆ.
ರಣ್‍ವೀರ್ ಸಿಂಗ್ ’83’ ಚಿತ್ರದಲ್ಲಿ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಚಿತ್ರ ಮಾಜಿ ಕ್ರಿಕೆಟ್ ಆಟಗಾರ ಕಪಿಲ್ ದೇವ್ ಅವರ ಜೀವನಚರಿತ್ರೆ ಆಗಿದ್ದು, ರಣ್‍ವೀರ್ ಸಿಂಗ್‍ಗೆ ನಾಯಕಿಯಾಗಿ ಡಿಂಪಲ್ ಬೆಡಗಿ, ಅವರ ಪತ್ನಿ ದೀಪಿಕಾ ಪಡುಕೋಣೆ ನಟಿಸುತ್ತಿದ್ದಾರೆ.
