– ರಮ್ಯಾ ಮಂಡ್ಯಕ್ಕೆ ಬರ್ತಾರೆಂದು ಕಾದು ಕುಳಿತ ವೃದ್ಧ
ಮಂಡ್ಯ: ಕಾಂಗ್ರೆಸ್ ನ ಸಾಮಾಜಿಕ ಜಾಲತಾಣ ಮುಖ್ಯಸ್ಥೆ, ಸ್ಯಾಂಡಲ್‍ವುಡ್‍ನ ಕ್ವೀನ್ ಹಾಗೂ ಮಾಜಿ ಸಂಸದೆ ರಮ್ಯಾ ಹುಟ್ಟುಹಬ್ಬವನ್ನು ಮಂಡ್ಯ ಜನತೆ ಸಂಭ್ರಮ ಸಡಗರದಿಂದ ಆಚರಿಸುತ್ತಿದ್ದಾರೆ.
ರಮ್ಯಾ ಬರ್ತಡೇ ಪ್ರಯುಕ್ತ ಅವರ ಅಭಿಮಾನಿಗಳು, ರಾಜಕೀಯ ಬೆಂಬಲಿಗರು ಬ್ಯಾನರ್ ಹಾಕಿ ಶುಭಾಶಯವನ್ನು ಕೋರಿದ್ದಾರೆ. ಅಷ್ಟೇ ಅಲ್ಲದೇ ಅವರ ಭಾವಚಿತ್ರ ಇರುವ 2018 ನೇ ಇಸವಿಯ ಕ್ಯಾಲೆಂಡರ್ ಕೂಡ ಬಿಡುಗಡೆ ಮಾಡಿದ್ದಾರೆ.
ವಿದ್ಯಾನಗರದ ಗಣಪತಿ ದೇವಸ್ಥಾನದಲ್ಲಿ ಪೂಜೆ ಸಲ್ಲಿಸಿ ರಮ್ಯಾ ಅಭಿಮಾನಿ ರಾಜೀವ್ ಮತ್ತು ಸಂತೋಷ್ ಕ್ಯಾಲೆಂಡರ್ ಬಿಡುಗಡೆ ಮಾಡಿದ್ದಾರೆ. ಅವರು ಮಂಡ್ಯ ಜಿಲ್ಲೆಯಲ್ಲಿ ಸಂಚರಿಸಿದ ವಿವಿಧ ಫೋಟೋಗಳನ್ನು ಹಾಕಿ ಕ್ಯಾಲೆಂಡರ್ ಅನಾವರಣ ಮಾಡಲಾಗಿದೆ.
ಇಷ್ಟೆಲ್ಲಾ ಸಂಭ್ರಮದಿಂದ ರಮ್ಯಾ ಅಭಿಮಾನಿಗಳು ಕಾಯುತ್ತಿದ್ದು, ಜನ್ಮದಿನವನ್ನ ಮಂಡ್ಯದಲ್ಲೇ ಆಚರಿಸಿಕೊಳ್ಳುತ್ತಾರೆ ಎಂದು ಸುದ್ದಿಯಾಗಿತ್ತು. ಆದರೆ ಈಗ ಅವರು ಬರಲ್ಲ ಅನ್ನೋದು ಕೂಡ ಖಚಿತವಾಗಿದೆ. ಆದರೂ ಮಂಡ್ಯದಲ್ಲಿ ರಮ್ಯಾ ಗಾಗಿ ಬಂಟಿಂಗ್ ಬ್ಯಾನರ್ ಗಳು ರಾರಾಜಿಸುತ್ತಿವೆ. ದೇವಸ್ಥಾನಗಳಲ್ಲಿ ಅವರ ಹೆಸರಲ್ಲಿ ಪೂಜೆ ಪುನಸ್ಕಾರ ನಡೆಯುತ್ತಿದೆ. ಅಭಿಮಾನಿಗಳು ಪೂಜೆ ಮಾಡಿಸಿ ಎಲ್ಲರಿಗೂ ಸಿಹಿ ಹಂಚಿ ಹುಟ್ಟಹಬ್ಬವನ್ನು ಆಚರಿಸುತ್ತಿದ್ದಾರೆ.
ಇಂದು ರಮ್ಯಾ ಮಂಡ್ಯಕ್ಕೆ ಬರುತ್ತಾರೆ ಎಂದು ಕಣ್ಣು ಕಾಣದ ವೃದ್ಧರೊಬ್ಬರು ಮನೆ ಮುಂದೆ ಕಾದು ಕುಳಿತಿದ್ದರು. 65 ವರ್ಷದ ವಿಠ್ಠಲ್ ರಾವ್ ಸಹಾಯ ಯಾಚಿಸಿ ಮನೆ ಬಳಿ ಕಾದು ಕುಳಿತ್ತಿದ್ದು, ಅವರ ಬರಲ್ಲ ಎಂದು ತಿಳಿದ ಮೇಲೆ ವಾಪಸಾಗಿದ್ದಾರೆ. ಈ ಬಾರಿ ರಮ್ಯಾ ಅಭಿಮಾನಿಗಳಿಗೆ ತುಂಬಾ ನಿರಾಸೆಯಾಗಿದೆ. ಆದರೂ ಅಭಿಮಾನಿಗಳು ಭರ್ಜರಿಯಿಂದ ಅವರ ಹುಟ್ಟುವನ್ನು ಆಚರಿಸುತ್ತಿದ್ದಾರೆ.
