ಇದೀಗ ತಮ್ಮ ಪುತ್ರನ ಪಡ್ಡೆಹುಲಿ ಚಿತ್ರದಲ್ಲಿ ಬ್ಯುಸಿಯಾಗಿರುವ ನಿರ್ಮಾಪಕ ಕೆ. ಮಂಜು ತಮ್ಮ ನಿರ್ಮಾಣದ ಮುಂದಿನ ಚಿತ್ರದ ಬಗೆಗೊಂದು ಹೊಸಾ ಸುದ್ದಿಯನ್ನು ಹರಿಯ ಬಿಟ್ಟಿದ್ದಾರೆ. ಅದರ ಪ್ರಕಾರವಾಗಿ ಹೇಳೋದಾದರೆ ಅವರು ರಕ್ಷಿತ್ ಶೆಟ್ಟಿ ನಾಯಕನಾಗಿರೋ ಚಿತ್ರವೊಂದನ್ನು ಸದ್ಯದಲ್ಲಿಯೇ ನಿರ್ಮಾಣ ಮಾಡಲಿದ್ದಾರೆ!
ಈಗಾಗಲೇ ಈ ಬಗೆಗಿನ ಎಲ್ಲ ರೀತಿಯ ಮಾತುಕತೆಗಳೂ ಪಕ್ಕಾ ಆಗಿವೆಯಂತೆ. ಶ್ರೀಮನ್ನಾರಾಯಣ ಸೇರಿದಂತೆ ಮತ್ತೊಂದು ಚಿತ್ರವಾದ ನಂತರ ಈ ಚಿತ್ರದಲ್ಲಿ ನಟಿಸಲು ರಕ್ಷಿತ್ ಕೂಡಾ ಒಪ್ಪಿಕೊಂಡಿದ್ದಾರೆ. ಹಾಗಾದರೆ ಈ ಚಿತ್ರವನ್ನು ಯಾರು ನಿರ್ದೇಶನ ಮಾಡಲಿದ್ದಾರೆಂಬುದು ಬಹು ಮುಖ್ಯವಾದ ಪ್ರಶ್ನೆ. ಇದನ್ನೂ ಕೂಡಾ ಮಂಜು ಅವರೇ ಜಾಹೀರು ಮಾಡಿದ್ದಾರೆ.
ಈ ಚಿತ್ರವನ್ನು ಯೋಗರಾಜ ಭಟ್ಟರು ನಿರ್ದೇಶನ ಮಾಡಲಿದ್ದಾರೆ. ಈ ಹಿಂದೆ ವಾಸ್ತು ಪ್ರಕಾರ ಚಿತ್ರದಲ್ಲಿ ರಕ್ಷಿತ್ ಶೆಟ್ಟಿಯನ್ನು ನಾಯಕನಾಗಿ ನಟಿಸುವಂತೆ ಮಾಡಿದ್ದ ಯೋಗರಾಜಭಟ್ಟರು ಅವರೊಂದಿಗಿನ ಎರಡನೇ ಚಿತ್ರಕ್ಕೆ ರೆಡಿಯಾಗುತ್ತಿದ್ದಾರಂತೆ. ಈಗಾಗಲೇ ಕಥೆಯೊಂದನ್ನು ಮಾಡಿ ಅದನ್ನು ಮಂಜು ಅವರಿಗೂ ಹೇಳಿದ್ದಾರಂತೆ. ಆ ಕಥೆ ಇಷ್ಟವಾದ ನಂತರವೇ ಈ ಚಿತ್ರದ ಬಗ್ಗೆ ಮಂಜು ವಿವರ ನೀಡಿದ್ದಾರೆ.
ಅತ್ತ ಯೋಗರಾಜ ಭಟ್ಟರು ಪಂಚತಂತ್ರ ಚಿತ್ರದಲ್ಲಿ ತೊಡಗಿಸಿಕೊಂಡಿದ್ದಾರೆ. ಇತ್ತ ರಕ್ಷಿತ್ ಕೂಡಾ ಎರಡೆರಡು ಚಿತ್ರಗಳಲ್ಲಿ ಕಳೆದು ಹೋಗಿದ್ದಾರೆ. ನಿರ್ಮಾಪಕ ಮಂಜುಗೆ ತಮ್ಮ ಮಗನ ಪಡ್ಡೆಹುಲಿಯದ್ದೇ ಧ್ಯಾನ. ಈ ಮೂವರೂ ಕೊಂಚ ಬಿಡುವು ಮಾಡಿಕೊಂಡ ತಕ್ಷಣವೇ ಈ ಚಿತ್ರದ ಉಳಿಕೆ ವಿವರಗಳು ಸಿಗಲಿವೆ.
ಪಬ್ಲಿಕ್ ಟಿವಿಯನ್ನು ಇನ್ ಸ್ಟಾಗ್ರಾಮ್ ನಲ್ಲಿ ಫಾಲೋ ಮಾಡಿ www.instagram.com/publictvnews
