ಹೈದರಾಬಾದ್: ಟಾಲಿವುಡ್‍ನಲ್ಲಿ ಪ್ರಭಾಸ್-ಅನುಷ್ಕಾ ಸೂಪರ್ ಜೋಡಿ. ಕ್ಯೂಟ್ ಹೀರೋ-ಹೀರೋಯಿನ್ ಅನುಷ್ಕಾ ಶೆಟ್ಟಿ ಮತ್ತು ಪ್ರಭಾಸ್ ಯಾವಾಗಲು ಒಂದಲ್ಲಾ ಒಂದು ವಿಷಯಕ್ಕೆ ಸುದ್ದಿ ಆಗುತ್ತಿರುತ್ತಾರೆ. ಅದರಲ್ಲೂ `ಬಾಹುಬಲಿ 2 ಚಿತ್ರ ತೆರೆಕಂಡ ನಂತರ ಇವರಿಬ್ಬರ ಆಫ್ ಸ್ಕ್ರೀನ್ ಕೆಮಿಸ್ಟ್ರಿ ಬಗ್ಗೆ ಗಾಸಿಪ್‍ಗಳು ಹೆಚ್ಚಾಗುತ್ತಲೇ ಇವೆ.
ಸ್ರ್ಕೀನ್ ಮೇಲೆ ಪ್ರಭಾಸ್ ಹಾಗೂ ಅನುಷ್ಕಾ ಒಟ್ಟಾಗಿ ನಟಿಸಿದರೆ ಆ ಚಿತ್ರ ಸೂಪರ್ ಹಿಟ್. ಅಭಿಮಾನಿಗಳನ್ನು ಮೋಡಿ ಮಾಡುವ ಈ ಜೋಡಿಗೆ ಟಾಲಿವುಡ್‍ನಲ್ಲಿ ತುಂಬಾ ಬೇಡಿಕೆ ಇದೆ. ಇತ್ತೀಚಿಗಷ್ಟೇ ಪ್ರನುಷ್ಕಾ ಜೋಡಿ ಬಾಹುಬಲಿ 2 ಚಿತ್ರದಲ್ಲಿ ತೆರೆಹಂಚಿಕೊಂಡಿದ್ದರು. ಮತ್ತೊಮ್ಮೆ ಒಂದಾಗಲಿ ಎಂದು ಅಭಿಮಾನಿಗಳ ಡಿಮ್ಯಾಂಡ್ ಹೆಚ್ಚಿದೆ.
ನಟ ಪ್ರಭಾಸ್ ಬಾಲಿವುಡ್‍ಗೆ ಎಂಟ್ರಿ ಕೊಡುತ್ತಿರುವ ವಿಷಯ ಹಳೆಯದು. ಅಮರೇಂದ್ರ ಬಾಹುಬಲಿ ಬಿಟೌನ್‍ಗೆ ಗ್ರ್ಯಾಂಡ್ ಎಂಟ್ರಿ ಕೊಡಲು ಸಿದ್ಧವಾಗಿದ್ದಾರೆ. ಇತ್ತ ಸ್ವೀಟಿ ಅನುಷ್ಕಾಗೂ ಕೂಡ ಬಾಲಿವುಡ್‍ನಿಂದ ಆಫರ್ ಗಳು ಬಂದಿದ್ದು, ಇತ್ತೀಚಿಗಷ್ಟೇ ನಿರ್ದೇಶಕರೊಬ್ಬರು ಬಾಲಿವುಡ್‍ಗೆ ಬರುವಂತೆ ಅನುಷ್ಕಾ ಶೆಟ್ಟಿಗೆ ಕೇಳಿಕೊಂಡಿದ್ದಾರೆ ಎನ್ನಲಾಗಿದೆ. ಆದರೆ ಬಾಲಿವುಡ್‍ನಿಂದ ಬಂದ ಆಹ್ವಾನವನ್ನು ಅನುಷ್ಕಾ ತಿರಸ್ಕರಿಸಿದ್ದಾರೆ. ಈ ನಿರ್ಧಾರದ ಹಿಂದೆ ಪ್ರಭಾಸ್ ಇದ್ದಾರೆ ಎಂಬ ಸುದ್ದಿ ಬಿಟೌನ್ ನಲ್ಲಿ ಹರಿದಾಡುತ್ತಿದೆ.
ಸದ್ಯಕ್ಕೆ ಅನುಷ್ಕಾ ಬಾಲಿವುಡ್‍ಗೆ ಬರೋದು ಬೇಡ ಎಂದು ಪ್ರಭಾಸ್ ಹೇಳುತ್ತಿದ್ದು, ಬಾಲಿವುಡ್‍ನ ಆಫರ್ ತಿರಸ್ಕರಿಸುವಂತೆ ಹೇಳಲು ಬಲವಾದ ಕಾರಣವಿದೆ. ಒಂದು ವೇಳೆ ಅನುಷ್ಕಾ ಶೆಟ್ಟಿ ಬಾಲಿವುಡ್‍ಗೆ ಎಂಟ್ರಿ ಕೊಡುವುದಾದರೆ ಅದು ಪ್ರಭಾಸ್ ಜೊತೆಯೇ ಆಗಬೇಕಂತೆ. ಅನುಷ್ಕಾ ಅವರೊಂದಿಗೆ ಬಾಲಿವುಡ್ ಗೆ ಪಾದಾರ್ಪಣೆ ಮಾಡಬೇಕೆಂದು ಪ್ರಭಾಸ್ ಅಭಿಪ್ರಾಯಪಟ್ಟಿದ್ದಾರೆ ಎಂದು ತಿಳಿದು ಬಂದಿದೆ.
ಪ್ರಭಾಸ್ `ಭಾಗಮತಿ’ ಸಿನಿಮಾದ ಚಿತ್ರೀಕರಣದಲ್ಲಿ ಸ್ವತಃ `ಭಾಗಮತಿ’ ಸೆಟ್‍ಗೆ ತೆರಳಿ ಅನುಷ್ಕಾರನ್ನು ಭೇಟಿಯಾಗಿದ್ದರು. ಸೆಟ್ ಪ್ರವೇಶಕ್ಕೂ ಮುನ್ನ ಯಾರಿಗೂ ತಿಳಿಯಬಾರದೆಂದು ಮುಖಕ್ಕೆ ಕರ್ಚಿಪ್ ಕಟ್ಟಿಕೊಂಡು ಹೋಗಿದ್ದರು. ಭಾಗಮತಿ ಟ್ರೇಲರ್ ಬಿಡುಗಡೆಗೊಂಡಾಗ ಪ್ರಭಾಸ್ ಫೇಸ್‍ಬುಕ್‍ನಲ್ಲಿ “ಪ್ರತಿ ಸಿನಿಮಾಗಳಲ್ಲಿಯೂ ಹೊಸ ರೀತಿಯ ಪ್ರಯೋಗ ಮಾಡುವುದರಲ್ಲಿ ಅನುಷ್ಕಾ ಶೆಟ್ಟಿ ಯಾವಾಗಲೂ ಮೊದಲಿರುತ್ತಾರೆ. ಗುಡ್ ಲಕ್ ಸ್ವೀಟಿ.. ಹಾಗೂ ಚಿತ್ರತಂಡಕ್ಕೆ ಶುಭವಾಗಲಿ” ಎಂದು ಬರೆದು ಭಾಗಮತಿ ಸಿನಿಮಾ ಟೀಸರ್ ಹಾಕಿಕೊಂಡು ಅನುಷ್ಕಾ ಶೆಟ್ಟಿಗೆ ಶುಭಕೋರಿದ್ದರು.
ಪ್ರಸ್ತುತ ಪ್ರಭಾಸ್ ಸುಜೀತ್ ನಿರ್ದೇಶನದ `ಸಾಹೋ’ ಸಿನಿಮಾ ಚಿತ್ರೀಕರಣದಲ್ಲಿ ತೊಡಗಿದ್ದಾರೆ. ಚಿತ್ರದಲ್ಲಿ ಶ್ರದ್ಧಾ ಕಪೂರ್ ಮತ್ತು ನೀಲ್ ನಿತಿನ್ ಮುಖೇಶ್ ಮುಖ್ಯ ಪಾತ್ರಗಳಲ್ಲಿ ನಟಿಸುತ್ತಿದ್ದು, ಯುಎಇಯಲ್ಲಿ ಕೆಲವು ಪ್ರಮುಖ ದೃಶ್ಯಗಳನ್ನು ಚಿತ್ರೀಕರಿಸುತ್ತಿದ್ದಾರೆ. ಈ ಚಿತ್ರವು ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಮೂಡಿ ಬರುತ್ತಿದ್ದು, ಪ್ರಭಾಸ್ ಅವರ ಮೊದಲು ಬಾಲಿವುಡ್ ಸಿನಿಮಾವಾಗಿದೆ. ಈ ಚಿತ್ರವು ವರ್ಷಾಂತ್ಯದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆ ಇದೆ.
