– ವಿಡಿಯೋ ಮಾಡಿ ಈತನ ವಿರುದ್ಧ ಕ್ರಮಕ್ಕೆ ಅಧಿಕಾರಿಗಳ ಆಗ್ರಹ
ಬೆಂಗಳೂರು: ಪ್ರತಿ ದಿನವೂ ಡಿ ಗ್ರೂಪ್ ನೌಕರನೋರ್ವ ಕಂಠಪೂರ್ತಿ ಕುಡಿದು ಹಿರಿಯ ಅಧಿಕಾರಿಗಳಿಗೆ ಕ್ಯಾರೆ ಅನ್ನದೇ ಅವಾಜ್ ಹಾಕುತ್ತಾನೆ. ನಿತ್ಯವು ಈತನ ರಂಪಾಟದಿಂದ ಬೇಸತ್ತ ಅಧಿಕಾರಿಗಳು ವಿಡಿಯೋ ಮಾಡಿ ಈತನ ಮೇಲೆ ಕ್ರಮ ತೆಗೆದುಕೊಳ್ಳಿ ಎಂದು ಮೇಲಾಧಿಕಾರಿಗಳಿಗೆ ಮನವಿ ಮಾಡಿಕೊಂಡಿದ್ದಾರೆ.
ಪ್ರತಿನಿತ್ಯ ಕಂಠಪೂರ್ತಿ ಕುಡಿದು ಸರ್ಕಾರಿ ಅಧಿಕಾರಿಗಳು, ಸಾರ್ವಜನಿಕರನ್ನ ಹಿಗ್ಗಾಮುಗ್ಗಾ ನಿಂದಿಸುವ ಡಿ ಗ್ರೂಪ್ ನೌಕರನ ಹೆಸರು ಸುರೇಶ್. ಈತ ಬೆಂಗಳೂರು ಹೊರವಲಯದ ನೆಲಮಂಗಲ ಜಿಲ್ಲಾ ಪಂಚಾಯತಿ ಕಚೇರಿಯಲ್ಲಿ ಡಿ ಗ್ರೂಪ್ ನೌಕರನಾಗಿ ಕೆಲಸ ಮಾಡುತ್ತಿದ್ದಾನೆ. ಆದರೆ ಕಚೇರಿಯಲ್ಲಿ ಈತನ ದರ್ಬಾರ್ ಮೀತಿ ಮೀರಿದೆ. ಕೆಲಸದ ಸಮಯದಲ್ಲೇ ಕಾಲು ಮೇಲೆ ಕಾಲು ಹಾಕಿ ಹಿರಿಯ ಅಧಿಕಾರಿಗೆ ಧಮ್ಕಿ ಹಾಕುವುದು, ಮಹಿಳಾ ಅಧಿಕಾರಿಗಳ ಮುಂದೆ ಅಸಭ್ಯ ವರ್ತನೆ ತೋರುವುದೇ ಈತನ ನಿತ್ಯ ಕೆಲಸವಾಗಿದೆ.
ಬೆಳ್ಳಂಬೆಳಗ್ಗೆಯೇ ಕೆಲಸಕ್ಕೆ ಕುಡಿದು ಬರುವ ಸುರೇಶ್ ರಂಪಾಟದ ಬಗ್ಗೆ ಅಧಿಕಾರಿಗಳಿಗೆ ತಿಳಿಸಿದ್ದರೂ ಆತನ ಕಾಟಕ್ಕೆ ಯಾರೂ ಬ್ರೇಕ್ ಹಾಕುತ್ತಿಲ್ಲ. ಈತನ ಬಗ್ಗೆ ಹೀಗಾಗಲೇ ಇತರೇ ಸಿಬ್ಬಂದಿ ದೂರು ನೀಡಿದ್ದರೂ ಕ್ರಮ ಕೈಗೊಳ್ಳಲು ಮೇಲಾಧಿಕಾರಿಗಳು ಹಿಂದೇಟು ಹಾಕಿದ್ದಾರೆ.
ಪ್ರತಿ ನಿತ್ಯವೂ ಈತನ ರಂಪಾಟದಿಂದ ಕಚೇರಿಯಲ್ಲಿರುವ ಅಧಿಕಾರಿಗಳು ಮಾತ್ರ ಬೇಸತ್ತಿದ್ದಾರೆ. ಈತನ ರಂಪಾಟ ತಾಳಲಾರದೆ ವಿಡಿಯೋ ಸೆರೆಹಿಡಿದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಮಾಡಿ, ಈಗಲಾದರೂ ಈತನ ವಿರುದ್ಧ ಕ್ರಮ ಕೈಗೊಳ್ಳಿ ಎಂದು ಮನವಿ ಮಾಡಿದ್ದಾರೆ.
