ಕೊಚ್ಚಿ: ಬಹುಭಾಷಾ ನಟಿ ಮೇಲಿನ ಲೈಂಗಿಕ ದೌರ್ಜನ್ಯ ಪ್ರಕರಣ ದಿನಕ್ಕೊಂದು ತಿರುವು ಪಡೆಯುತ್ತಿದೆ. ಪ್ರಕರಣದ ಪ್ರಮುಖ ಆರೋಪಿ ಪಲ್ಸರ್ ಸುನಿ ಈ ಹಿಂದೆ ಸಂಪರ್ಕಿಸಿದ್ದ ವಕೀಲರೇ ಈಗ ಸಾಕ್ಷಿ ಹೇಳಲು ಕೋರ್ಟಿಗೆ ಹಾಜರಾಗಲಿದ್ದಾರೆ.
ಘಟನೆ ನಡೆದ ಮರುದಿನ ಆರೋಪಿಗಳಾದ ಪಲ್ಸರ್ ಸುನಿ, ಮಣಿಕಂಟನ್ ಹಾಗೂ ವಿಜೇಶ್ ಅಲುವಾದಲ್ಲಿ ವಕೀಲರೊಬ್ಬರನ್ನು ಅವರ ಮನೆಯಲ್ಲಿ ಭೇಟಿ ಮಾಡಿದ್ದರು. ಸುನಿ ತನ್ನ ಫೋನ್, ಮೆಮೊರಿ ಕಾರ್ಡ್ ಹಾಗೂ ವಿಜೇಶ್‍ನ ಪಾಸ್‍ಪೋರ್ಟನ್ನು ವಕೀಲರಿಗೆ ನೀಡಿದ್ದ. ನಟಿಯ ಮೇಲಿನ ದಾಳಿಯ ದೃಶ್ಯಾವಳಿಗಳಿರುವ ವೀಡಿಯೋ ಮೆಮೊರಿ ಕಾರ್ಡ್‍ನಲ್ಲಿ ಇರಬಹುದು ಎಂದು ಮಾಧ್ಯಮಗಳು ವರದಿ ಮಾಡಿದ ನಂತರ ವಕೀಲರು ಈ ಪ್ರಕರಣದ ಪ್ರಮುಖ ಸಾಕ್ಷಿಯಾಗಿ ಬದಲಾದ್ರು. ವಕೀಲರ ಪತ್ನಿಯೂ ಕೂಡ ವಕೀಲೆಯಾಗಿದ್ದು, ಆರೋಪಿಗಳು ಬಂದಾಗ ಅವರೂ ಕೂಡ ಮನೆಯಲ್ಲೇ ಇದ್ರು. ಹೀಗಾಗಿ ಆಕೆಯೂ ಕೂಡ ಈಗ ಪ್ರಕರಣದ ಸಾಕ್ಷಿ ಎಂದು ಪರಿಗಣಿಸಲಾಗುತ್ತದೆ.
ಆರಂಭದಲ್ಲಿ ಆರೋಪಿಗಳಲ್ಲಿ ಒಬ್ಬನಾದ ಡ್ರೈವರ್ ಮಾರ್ಟಿನ್‍ನ ಅರ್ಜಿ ಸಲ್ಲಿಸಿದ್ದ ವಕೀಲರು ನಂತರ ಅವನ ಪರವಾಗಿ ನಾನು ಹಾಜರಾಗುವುದಿಲ್ಲ ಎಂದಿದ್ದರು.
ಮೆಮೋರಿ ಕಾರ್ಡ್‍ನಲ್ಲಿ ನಟಿಯ ದೃಶ್ಯಾವಳಿಗಳು ಇದೆ ಎಂದು ವಿಧಿವಿಜ್ಞಾನ ಪ್ರಯೋಗಾಲಯ ದೃಢಪಡಿಸಿತ್ತು. ಆದ್ರೆ ಇದು ಫೋಟೋ ತೆಗೆಯಲಾದ ಮೊಬೈಲ್‍ನದ್ದೇ ಕಾರ್ಡ್ ಹೌದೋ ಅಲ್ಲವೋ ಎಂಬುದು ಸ್ಪಷ್ಟವಾಗಿಲ್ಲ. ಫೋಟೋಗಳನ್ನು ಮೆಮೋರಿ ಕಾರ್ಡ್‍ಗೆ ರವಾನೆ ಮಾಡಿರಲೂಬಹುದು ಎಂದು ಹೇಳಲಾಗಿದೆ.
ಪಲ್ಸರ್ ಸುನಿ ಕೋರ್ಟಿಗೆ ಹಾಜರಾಗಲು ಬಂದಿದ್ದಾಗ ಆತನ ಬ್ಯಾಗ್‍ನಲ್ಲಿದ್ದ ಮತ್ತೊಂದು ಮೆಮೊರಿ ಕಾರ್ಡನ್ನು ತನಿಖಾ ತಂಡ ವಶಪಡಿಸಿಕೊಂಡಿದೆ. ಈ ಬಗ್ಗೆ ಇನ್ನೆರಡು ದಿನಗಳಲ್ಲಿ ತನಿಖಾ ತಂಡ ವಿಸ್ತೃತ ವರದಿಯನ್ನು ಸಲ್ಲಿಸಲಿದೆ.
ಫೆಬ್ರವರಿ 17ರಂದು ಕೇರಳದಲ್ಲಿ ಶೂಟಿಂಗ್ ಮುಗಿಸಿ ವಾಪಸಾಗುತ್ತಿದ್ದ ವೇಳೆ ಬಹುಭಾಷಾ ನಟಿಯ ಮೇಲೆ ಲೈಂಗಿಕ ದೌರ್ಜನ್ಯ ನಡೆದಿತ್ತು.
