ಸ್ಯಾಂಡಲ್ ವುಡ್ ಕ್ವೀನ್ ರಮ್ಯಾ ಪದೇ ಪದೇ ಮದುವೆ ಬಗ್ಗೆಯೇ ಆಲೋಚನೆ ಮಾಡುತ್ತಿದ್ದಾರೆ. ಕೆಲವು ದಿನಗಳಿಂದ ಅವರು ಮದುವೆ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಪೋಸ್ಟ್ ಮಾಡುತ್ತಿದ್ದಾರೆ. ಕಳೆದ ತಿಂಗಳಷ್ಟೇ ತನ್ನ ಹುಡುಗ ಹೇಗಿರಬೇಕು? ಅವನು ಗುಣಗಳು ಎಂತಿರಬೇಕು ಎನ್ನುವ ಅರ್ಥದಲ್ಲಿ ವಿಡಿಯೋವೊಂದನ್ನು ಹಾಕಿದ್ದರು. ಈ ಬಾರಿ ತಮ್ಮ ಮದುವೆ ಯಾಕಾಗಿಲ್ಲ ಎನ್ನುವುದರ ಬಗ್ಗೆ ಹಾಡಿನ ರೂಪದಲ್ಲಿ ಹೇಳಿದ್ದಾರೆ.
ರಮ್ಯಾ ಜೊತೆ ಸಿನಿಮಾ ರಂಗಕ್ಕೆ ಬಂದ ಬಹುತೇಕ ನಟಿಯರು ಮದುವೆಯಾಗಿ, ಮಕ್ಕಳೊಂದಿಗೆ ಸುಖಿ ಜೀವನ ನಡೆಸುತ್ತಿದ್ದಾರೆ. ಆದರೆ, ರಮ್ಯಾ ಮಾತ್ರ ಈವರೆಗೂ ಮದುವೆ ಆಗಿಲ್ಲ. ಹಾಗಾಗಿ ಯಾವಾಗ ಮದುವೆ ಆಗುತ್ತೀರಿ ಎಂದು ಅಭಿಮಾನಿಗಳು ಹಲವಾರು ಬಾರಿ ಕೇಳಿದ್ದುಂಟು. ಅಂತಹ ಪ್ರಶ್ನೆಗಳು ಎದುರಾದಾಗೊಮ್ಮೆ ಹಾರಿಕೆಯ ಉತ್ತರವನ್ನೇ ಕೊಡುತ್ತಾ ಬಂದಿದ್ದಾರೆ ರಮ್ಯಾ. ಈ ಬಾರಿ ವಿಶೇಷ ರೀತಿಯಲ್ಲಿ ಉತ್ತರವನ್ನು ನೀಡಿದ್ದಾರೆ. ಇದನ್ನೂ ಓದಿ:ತನ್ನನ್ನು ತಾನೇ ಮದುವೆಯಾದ ಕಿರುತೆರೆ ನಟಿ ಕಾನಿಷ್ಕಾ ಸೋನಿ
ತಾವಿನ್ನೂ ಮದುವೆ ಯಾಕಾಗಿಲ್ಲ ಎಂದು ಹೇಳುವುದಕ್ಕಾಗಿ ಹಾಡೊಂದನ್ನು ಪೋಸ್ಟ್ ಮಾಡಿದ್ದು, ಆ ಹಾಡಿನ ಸಾಲುಗಳಲ್ಲಿ ‘ನನ್ನ ಸೋಲ್ ಮೇಟ್ ಸತ್ತಿರಬಹುದು, ಬಹುಶಃ ನನಗೆ ಅಂತ ಯಾವುದೇ ಆತ್ಮ ಇಲ್ಲ ಅನಿಸುತ್ತಿದೆ’ ಎನ್ನುವ ಅರ್ಥ ಬರುವಂತಹ ವಿಷಯವಿದೆ. ಅದನ್ನೇ ಸೋಷಿಯಲ್ ಮೀಡಿಯಾದಲ್ಲಿ ರಮ್ಯಾ ಹಂಚಿಕೊಂಡು ಕೆಲವು ಸಾಲುಗಳನ್ನೂ ಅವರೂ ಹಾಡಿದ್ದಾರೆ.
ಈ ಹಿಂದೆ ತಾವು ಮದುವೆ ಮಾಡುವ ಹುಡುಗನ ಬಗ್ಗೆಯೂ ಗುಣಗಾನ ಮಾಡಿದ್ದ ರಮ್ಯಾ, ಪರಿಶುದ್ಧ ಆತ್ಮವುಳ್ಳ ಹುಡುಗ ಬೇಕು ಎಂದು ಹೇಳಿದ್ದರು. ಅಲ್ಲದೇ, ಭಾವನಾತ್ಮಕ ಪ್ರಬುದ್ಧತೆಯನ್ನು ಆತ ಹೊಂದಿರಬೇಕು ಎಂದು ಬಯಸಿದ್ದರು. ಸದ್ಯ ರಮ್ಯಾ ಸಿನಿಮಾ ರಂಗಕ್ಕೆ ವಾಪಸ್ಸಾಗುವ ಬಗ್ಗೆಯೂ ಸುಳಿವು ನೀಡಿದ್ದು, ಮದುವೆ ಬಗ್ಗೆ ಮಾತ್ರ ಅವರು ಯಾವುದೇ ಸುಳಿವೂ ನೀಡಿಲ್ಲ.
