ಪಡ್ಡೆ ಹುಡುಗರು, ಕಾಲೇಜು ಪೋರರು, ಐ.ಟಿ ಉದ್ಯಮದವರು ಹಾಗೂ ಕುಟುಂಬ ಪ್ರೇಕ್ಷಕರ ಮೇಲೂ ಗಮನ ಕೇಂದ್ರೀಕರಿಸಿ ಕನ್ನಡ ಮತ್ತು ತೆಲುಗಿನಲ್ಲಿ ನಿರ್ಮಿಸಿರುವ ‘www.ಮೀನಾ ಬಜಾರ್’ ಸಿನಿಮಾ ತೆರೆಗೆ ಬರಲು ಸಿದ್ಧವಾಗಿದೆ. ಪೋಸ್ಟರ್ ರಿಲೀಸ್ ಆದಾಗಿನಿಂದ ಸಖತ್ ಸೌಂಡ್ ಮಾಡುತ್ತಲೇ ಬಂದ ಸಿನಿಮಾ. ಲಿರಿಕಲ್ ಹಾಡಿನಲ್ಲೂ ಎಲ್ಲರ ಚಿತ್ತ ತನ್ನತ್ತ ತಿರುಗಿಸಿಕೊಂಡಿದೆ. ಇದೀಗ ಹುಡುಗರ ನಿದ್ದೆ ಕದಿಯುವಂತ ಸಾಂಗ್ ವೊಂದನ್ನು ಸಿನಿಮಾ ರಿಲೀಸ್ ಮಾಡಿದೆ. ‘ಸಂಜೆಯ ಗೆಳೆಯರೇ ನೀವೂ’ ಎಂಬ ಹಾಡು ಇದೀಗ ಹುಡುಗರನ್ನ ಹಾಗೇ ತೇಲಿಸುತ್ತಿದೆ.
ರಾಣ ಸುನೀಲ್ ಕುಮಾರ್ ಸಿಂಗ್ ಬರೆದ ಸಾಹಿತ್ಯಕ್ಕೆ ವಿನಯ ಕಾರ್ತೀಕ್ ರಾಜನ್ ಕಂಠ ನೀಡಿದ್ದಾರೆ. ಕ್ಲಾಸಿಕಲ್ ಮ್ಯೂಸಿಕ್‍ನಲ್ಲಿ ಒಂದು ಸುಮಧುರ ಹಾಡೊಂದು ಎಲ್ಲರನ್ನ ಡಿಸ್ಟರ್ಬ್ ಮಾಡುತ್ತಿದೆ. ಹೆಣ್ಣಿನ ವಿರಹ ಗೀತೆಯನ್ನ ಸಿನಿಮಾದಲ್ಲಿ ಬಹಳ ಅದ್ಭುತವಾಗಿ ಕಟ್ಟಿಕೊಟ್ಟಿದ್ದಾರೆ. ಹಾಡನ್ನ ಕೇಳ್ತಾ ಇದ್ರೆ ಪರಮ ಶಿವನ ಧ್ಯಾನದಲ್ಲಿ ತೇಲುವಂತೆ ಮಾಡುತ್ತೆ. ಕಣ್ಮುಚ್ಚಿ ಆಲಿಸಿದರೆ ಮನಸ್ಸಲ್ಲೇ ಕುಣಿಯುವಂತೆ ಮಾಡುತ್ತಿದೆ.
ಕ್ರೈಂ, ಲವ್, ಸೆಂಟಿಮೆಂಟ್ ಹೀಗೆ ಎಲ್ಲಾ ಬಗೆಯ ಕಮರ್ಷಿಯಲ್ ಅಂಶಗಳು ಈ ಚಿತ್ರದಲ್ಲಿ ಮಿಳಿತಗೊಂಡಿವೆ. ರಾಣಾ ಸುನೀಲ್ ಕುಮಾರ್ ಸಿಂಗ್ ಈ ಹಿಂದೆ ಹಲವು ಧಾರಾವಾಹಿಗಳನ್ನು ನಿರ್ದೇಶಿಸಿರುವ ಅನುಭವಿ. ಮೀನಾ ಬಜಾರ್ ಮೂಲಕ ಸಿನಿಮಾ ನಿರ್ದೇಶಕನ ಕ್ಯಾಪ್ ಧರಿಸಿದ್ದಾರೆ. ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯದ ಜತೆಗೆ ಚಿತ್ರದ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ವೈಭವಿ ಜೋಷಿ, ಶ್ರೀಜಿತಾ ಘೋಷ್, ಆಲಿಷಾ ಆ್ಯಂಡ್ರೇಡ್ ನಾಯಕಿಯರಾಗಿ ನಟಿಸಿದ್ದಾರೆ. ರಾಜೇಶ್ ನಟರಂಗ, ಅರವಿಂದ್ ರಾವ್, ಜೀವ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಸಿಂಗ್ ಸಿನಿಮಾಸ್ ಬ್ಯಾನರ್ ನಡಿ ಸುನೀಲ್ ಕುಮಾರ್ ಸಿಂಗ್ ಸಹೋದರ ನಾಗೇಂದ್ರ ಸಿಂಗ್ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಛಾಯಾಗ್ರಹಣ ಮ್ಯಾಥಿವ್, ಮಣಿಕಾಂತ್ ಕದ್ರಿ ಸಂಗೀತ ನೀಡಿದ್ದಾರೆ.
