ಗದಗ: ಹೃದಯಾಘಾತದಲ್ಲಿ ಪತಿ ಮೃತಪಟ್ಟ ಕೆಲವೇ ನಿಮಿಷಗಳಲ್ಲಿ ಪತ್ನಿಯೂ ದುಃಖಿತಳಾಗಿ ಕುಸಿದು ಬಿದ್ದು ಸಾವನ್ನಪ್ಪಿರುವ ಘಟನೆ ಜಿಲ್ಲೆಯ ಮುಂಡರಗಿ ತಾಲೂಕಿನ ಬ್ಯಾಲವಾಡಗಿ ಗ್ರಾಮದಲ್ಲಿ ನಡೆದಿದೆ.
ಈರಪ್ಪ ಹಟ್ಟಿ (53) ಹಾಗೂ ರೇಣವ್ವ (45) ಮೃತ ದಂಪತಿ. ಪತಿ ಈರಪ್ಪ ಹೃದಯಾಘಾತದಿಂದ ಮೃತಪಟ್ಟಿದ್ದರು. ಈ ವಿಷಯ ಪತ್ನಿ ರೇಣವ್ವಗೆ ತಿಳಿಯುತ್ತಿದ್ದಂತೆ ದುಃಖಿತಳಾಗಿ ಅತ್ತು ಸುಸ್ತಾಗಿ ಕುಸಿದುಬಿದ್ದು ಪ್ರಾಣಬಿಟ್ಟಿದ್ದಾರೆ. ದಂಪತಿ ತುಂಬಾ ಅನೂನ್ಯವಾಗಿದ್ದು, ಊರಲ್ಲಿ ಎಲ್ಲರ ಜೊತೆಯೂ ಮಾತನಾಡಿಕೊಂಡು ಚೆನ್ನಾಗಿದ್ದರು. ಆದರೆ ಈ ದಂಪತಿ ಸಾವಿನಲ್ಲೂ ಒಂದಾಗಿರುವುದು ಸ್ಥಳೀಯರ ದುಃಖಕ್ಕೆ ಕಾರಣವಾಗಿದೆ.
ಪತಿ-ಪತ್ನಿಯರಿಬ್ಬರನ್ನು ಅಕ್ಕಪಕ್ಕ ಕೂಡಿಸಿ ಅಂತ್ಯಕ್ತಿಯೆಗೆ ಮೊದಲು ಪೂಜೆ ಸಲ್ಲಿಸಲಾಯಿತು. ಕೈಹಿಡಿದು ಸಪ್ತಪದಿ ತುಳಿದು, ಬಾಳಿ ಬದುಕಿದ ಜೀವಗಳು ಸಾವಿನಲ್ಲೂ ಒಂದಾಗಿದ್ದು ನಿಜಕ್ಕೂ ಮನಕಲಕುವಂತಿದೆ. ದಂಪತಿಯ ಸಾವಿನಿಂದ ಕುಟುಂಬದವರ ಆಕ್ರಂದನ ಮುಗಿಲು ಮುಟ್ಟಿದ್ದು, ಒಂದೆ ಕಡೆ ಒಟ್ಟಾಗಿ ಅಂತ್ಯಕ್ರಿಯೆ ಕೂಡ ಮಾಡಲಾಯಿತು.
