ವಾಷಿಂಗ್ಟನ್: ವ್ಯಕ್ತಿಯೊಬ್ಬ ತನ್ನ ಮಗಳನ್ನೇ ಪತ್ನಿಯನ್ನಾಗಿ ಮಾಡಿ, ಆಕೆಗೆ ಒಂದು ಗಂಡು ಮಗು ನೀಡಿ ನಂತರ ಇಬ್ಬರನ್ನು ಕೊಲೆ ಮಾಡಿ ಅತ್ಮಹತ್ಯೆ ಮಾಡಿಕೊಂಡ ಘಟನೆ ಅಮೇರಿಕಾದ ಕನೆಕ್ಟಿಕಟ್‍ನಲ್ಲಿ ನಡೆದಿದೆ.
ಸ್ಟೀವನ್ ವಾಲ್ಟರ್(42) ಕೊಲೆ ಮಾಡಿ, ಆತ್ಮಹತ್ಯೆ ಮಾಡಿಕೊಂಡ ವ್ಯಕ್ತಿ. ಸ್ಟೀವನ್ ತನ್ನ ಮಗಳು ಕೈಟಿ ಫ್ಲಡಾಲ್‍ನನ್ನು ಮದುವೆಯಾಗಿದ್ದನು. ಸ್ಟೀವನ್ ಕೈಟಿಯ ದತ್ತು ತಂದೆ ಆಂಟೋನಿ ಫಯ್ಯುಸ್ಕೋ(56) ನನ್ನು ಕೂಡ ಕೊಲೆ ಮಾಡಿ, ತಾನು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.
ಏನಿದು ಕಹಾನಿ?: ಕೊಲೆಯಾದ ಕೈಟಿ ಚಿಕ್ಕವಳಿದ್ದಾಗ ಆಂಟೋನಿ ಎಂಬವವರು ಆಕೆಯನ್ನು ದತ್ತು ಪಡೆದುಕೊಂಡಿದ್ದರು. ಕೈಟಿ ದೊಡ್ಡವಳಾದ ಮೇಲೆ ತನ್ನ ಸ್ವಂತ ತಂದೆ-ತಾಯಿಯ ಪತ್ತೆಗೆ ಮುಂದಾಗಿದ್ದಳು. ಹೀಗೆ ಸೋಶಿಯಲ್ ಮೀಡಿಯಾದ ಮೂಲಕ ಸ್ವೀವನ್ ವಾಲ್ಟರ್ ಎಂಬಾತನೇ ತನ್ನ ತಂದೆಯೆಂದು ಪತ್ತೆ ಮಾಡಿದ್ದಾಳೆ. ಪರಿಚಯಗೊಂಡ ಸ್ಟೀವನ್ ತನ್ನ ಮಗಳೊಂದಿಗೆ ಲೈಂಗಿಕ ಸಂಪರ್ಕ ಹೊಂದಿದ್ದನು. ಪರಿಣಾಮ ಕೈಟಿ ಸಹ ಮಗುವಿಗೆ ಜನ್ಮ ನೀಡಿದ್ದಳು.
ಕೈಟಿ ಗರ್ಭವತಿಯಾದ ವಿಷಯ ತಿಳಿದ ಆಕೆಯ ನಿಜವಾದ ತಾಯಿ ಇಬ್ಬರ ಸಂಬಂಧಕ್ಕೆ ತೀವ್ರ ವಿರೋಧ ವ್ಯಕ್ತಪಡಿಸಿದ್ದರು. ಇಬ್ಬರ ಅನೈತಿಕ ಸಂಬಂಧ ವಿರೋಧಿಸಿ ಸ್ಥಳೀಯ ಪೊಲೀಸ್ ಠಾಣೆಯಲ್ಲಿ ದೂರನ್ನು ಸಹ ದಾಖಲಿಸಿದ್ದರು. ಅಷ್ಟರಲ್ಲೇ ಸ್ಟೀವನ್ ಹಾಗೂ ಕೈಟಿ ಮದುವೆ ಮಾಡಿಕೊಳ್ಳಲು ಎಲ್ಲ ತಯಾರಿ ನಡೆಸಿಕೊಳ್ಳುತ್ತಿದ್ದರು. ನಂತರ ಪೊಲೀಸರು ಇಬ್ಬರನ್ನೂ ಬಂಧಿಸಿದ್ದರು. ಮುಂದಿನ ದಿನಗಳಲ್ಲಿ ಇಬ್ಬರು ಮತ್ತೆ ಒಂದಾಗುವುದಿಲ್ಲ ಎಂಬ ಷರತ್ತಿನ ಮೇಲೆ ಮಾರ್ಚ್ ತಿಂಗಳಿನಲ್ಲಿ ಅವರನ್ನು ಬಿಡುಗಡೆ ಮಾಡಲಾಗಿತ್ತು.
ಕೈಟಿ ದೂರವಾಗಿದ್ದಕ್ಕೆ ಕೋಪಗೊಂಡ ಸ್ಟೀವನ್: ಇತ್ತ ಕೈಟಿ ದೂರವಾಗುತ್ತಿದ್ದಂತೆ ಕೋಪಗೊಂಡ ಸ್ಟೀವನ್ ಆಕೆಯನ್ನು ಕೊಲೆ ಮಾಡಲು ಮುಂದಾದನು. ಸ್ಟೀವನ್ ತನ್ನ ತಾಯಿಗೆ ಫೋನ್ ಮಾಡಿ ತಾನು 7 ತಿಂಗಳ ನನ್ನ ಮಗುವನ್ನು, ನೆಕ್ಟಿಕಟ್‍ನಲ್ಲಿ ತನ್ನ ಪತ್ನಿ(ಮಗಳು) ಹಾಗೂ ಆಕೆಯ ದತ್ತು ತಂದೆಯನ್ನು ಕೊಂದಿದ್ದೇನೆ ಅಂತಾ ಹೇಳಿದ್ದಾನೆ. ಇದ್ರಿಂದ ಭಯಬೀತಳಾದ ಸ್ಟೀವನ್ ತಾಯಿ ಕೂಡಲೇ ಸ್ಥಳೀಯ ಪೊಲೀಸ್ ಠಾಣೆಗೆ ಫೋನ್ ಮಾಡಿ ವಿಷಯ ತಿಳಿಸಿದ್ದಾರೆ.
ಮಾಹಿತಿ ಪಡೆದ ಪೊಲೀಸರು ಸ್ಟೀವನ್ ಮನೆಗೆ ತೆರಳಿದಾಗ ಅಲ್ಲಿ 7 ತಿಂಗಳ ಮಗುವಿನ ಮೃತದೇಹ ಪತ್ತೆಯಾಗಿದೆ. ಇನ್ನೂ ಪಶ್ಚಿಮ ಕನೆಕ್ಟಿಕಟ್‍ನ ಪಿಕ್‍ಅಪ್ ಟ್ರಕ್‍ವೊಂದರಲ್ಲಿ ಕೈಟಿ ಹಾಗೂ ಆಕೆಯ ದತ್ತು ತಂದೆಯ ಮೃತದೇಹ ಸಿಕ್ಕಿತ್ತು. ಇನ್ನೂ ಸ್ಟೀವನ್‍ನ ಮೃತದೇಹ ಮಿನಿ ವ್ಯಾನ್‍ನಲ್ಲಿ ಕಂಡು ಬಂದಿದ್ದು, ಆತನ ಮೃತದೇಹದಲ್ಲಿ ಗುಂಡುಗಳು ಪತ್ತೆಯಾಗಿದೆ. ಇದರ ಆಧಾರದ ಮೇಲೆ ಸ್ಟೀವನ್ ಮೂವರನ್ನು ಕೊಂದು, ತಾನು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ ಎಂದು ವರದಿಯಾಗಿದೆ.
