ಮುಂಬೈ: ಸೊಸೆಯ ತಂಗಿಯ ಮೇಲೆ ಅತ್ಯಾಚಾರವೆಸಗಿದ ಆರೋಪದ ಮೇಲೆ 53 ವರ್ಷದ ವ್ಯಕ್ತಿಯನ್ನ ಭಾನುವಾರದಂದು ಮಹಾರಾಷ್ಟ್ರದ ಅಂಬರ್‍ನಾತ್ ಪೊಲೀಸರು ಬಂಧಿಸಿದ್ದಾರೆ.
ಬಂಧಿತ ಆರೋಪಿ ತನ್ನ ಮಗ- ಸೊಸೆಯ ಖಾಸಗಿ ಫೋಟೋಗಳನ್ನ ತೆಗೆದಿದ್ದ. ಈ ಫೋಟೋಗಳನ್ನ ಸೊಸೆಯ ತಂಗಿಗೆ ತೋರಿಸಿ ಅವುಗಳನ್ನ ಸಾಮಾಜಿಕ ಜಾಲತಾಣಗಳಿಗೆ ಹಾಕುವುದಾಗಿ ಬೆದರಿಸಿದ್ದ. ಅಲ್ಲದೆ ನಿನ್ನ ಅಕ್ಕನ ಜೀವನ ಹಾಳು ಮಾಡ್ತೀನೆಂದು ಬ್ಲಾಕ್‍ಮೇಲ್ ಮಾಡಿ ಸೊಸೆಯ ತಂಗಿಗೆ ತನ್ನೊಂದಿಗೆ ದೈಹಿಕ ಸಂಬಂಧ ಬೆಳೆಸಲು ಬಲವಂತ ಮಾಡಿದ್ದ. ಆರೋಪಿ ಅಂಬರ್‍ನಾತ್ ನಿವಾಸಿಯಾಗಿದ್ದು, ಮಹಿಳೆ ಮೇಲೆ ಕಳೆದ 8 ತಿಂಗಳಿಂದ ಹಲವಾರು ಬಾರಿ ಲೈಂಗಿಕ ದೌರ್ಜನ್ಯವೆಸಗಿದ್ದಾನೆ ಎಂದು ವರದಿಯಾಗಿದೆ.
ಆರೋಪಿ ತನ್ನ ಫೋಟೋಗಳನ್ನೂ ಕೂಡ ತೆಗೆದು ಸಂಬಂಧಿಕರೊಬ್ಬರಿಗೆ ಕಳಿಸಿದ ನಂತರ ಸಂತ್ರಸ್ತೆ ಪೊಲೀಸರ ಮೊರೆ ಹೋಗಿದ್ದಾಗಿ ದೂರಿನಲ್ಲಿ ತಿಳಿಸಿದ್ದಾರೆ. ಮಹಿಳೆಯ ಫೋಟೋಗಳನ್ನ ಹಂಚಿಕೊಳ್ಳೋ ಮೂಲಕ ಆಕೆಯ ಮರ್ಯಾದೆ ಹಾಳು ಮಾಡಬೇಕು. ಸಂಬಂಧಿಕರು ಆಕೆಯನ್ನು ದೂರ ಮಾಡಬೇಕೆಂದು ಆತ ಇಚ್ಛಿಸಿದ್ದ ಎಂದು ಪೊಲೀಸರು ಹೇಳಿದ್ದಾರೆ.
ಸಂತ್ರಸ್ತೆಯ ದೂರಿನನ್ವಯ ನಾವು ಆರೋಪಿಯನ್ನ ಬಂಧಿಸಿ ಆತನ ಫೋನ್ ವಶಪಡಿಸಿಕೊಂಡಿದ್ದೇವೆ ಎಂದು ಅಂಬರ್‍ನಾತ್ ಪೊಲೀಸ್ ಠಾಣೆಯ ಸಹಾಯಕ ಇನ್ಸ್ ಪೆಕ್ಟರ್ ಮನೋಜ್ ಚವಾನ್ ಹೇಳಿದ್ದಾರೆ. ಆರೋಪಿ ವಿರುದ್ಧ ಅತ್ಯಾಚಾರ, ಲೈಂಗಿಕ ದೌರ್ಜನ್ಯ ಹಾಗೂ ಐಟಿ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ.
ನ್ಯಾಯಾಲಯ ಆರೋಪಿಯನ್ನು ನವೆಂಬರ್ 24ರ ವರೆಗೆ ಪೊಲೀಸ್ ಕಸ್ಟಡಿಗೆ ನೀಡಿದೆ.
