ಗಾಂಧಿನಗರ: ಇಬ್ಬರು ಸಲಿಂಗಿಗಳು ಮೂರು ವರ್ಷದ ಕಂದಮ್ಮನ ಜೊತೆ ಅಹಮದಾಬಾದ್ ಬಳಿಯ ಸಾಬರಮತಿಗೆ ನದಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಸೋಮವಾರ ಬೆಳಗಿನ ಜಾವ ನದಿಗೆ ಹಾರಿ ಆತ್ಮಹತ್ಯೆಗೆ ಶರಣಾಗಿದ್ದು, ಸಾಯುವ ಮುನ್ನ ಲಿಪ್‍ಸ್ಟಿಕ್ ಬಳಸಿ ಕಲ್ಲಿನ ಮೇಲೆ ಡೆತ್ ನೋಟ್ ಬರೆದಿದ್ದಾರೆ.
ಆಶಾ ಠಾಕೂರ್ (30), ಭಾವನಾ ಠಾಕೂರ್ (28) ಮತ್ತು ಆಶಾಳ ಮೂರು ವರ್ಷದ ಮಗು ಮೇಘಾ ಸಾವನ್ನಪ್ಪಿದವರು. ಮೃತರ ದೇಹಗಳು ಎಲ್ಲೆ ಬ್ರಿಡ್ಜ್ ಬಳಿ ಪತ್ತೆಯಾಗಿದ್ದು, ಮಹಿಳೆಯರಿಬ್ಬರು ಸಲಿಂಗಿಗಳಾಗಿದ್ದು, ಹಲವು ವರ್ಷಗಳಿಂದ ಸಂಬಂಧದಲ್ಲಿದ್ದರು ಎಂದು ತಿಳಿದು ಬಂದಿದೆ.
ಬಾವ್ಲಾ ನಗರದ ರಾಂಚೋಡ್ ಗ್ರಾಮದ ನಿವಾಸಿಗಳಾದ ಆಶಾ ಮತ್ತು ಭಾವನಾ ಹಲವು ವರ್ಷಗಳಿಂದ ರಿಲೇಶನ್ ಶಿಪ್‍ನಲ್ಲಿದ್ದರು. ಇಬ್ಬರಿಗೂ ಮದುವೆಯಾಗಿದ್ದು, ಎರಡು ಮಕ್ಕಳನ್ನು ಹೊಂದಿದ್ದಾರೆ.
ಆಶಾ ಮತ್ತು ಭಾವನಾ ಜೂನ್ 8ರಿಂದ ಮೇಘಾ ಜೊತೆ ಮನೆಯಿಂದ ಕಾಣೆಯಾಗಿದ್ರು. ಆದ್ರೆ ಕುಟುಂಬಸ್ಥರು ಹುಡುಕುವ ಪ್ರಯತ್ನ ಅಥವಾ ನಾಪತ್ತೆ ದೂರು ಸಹ ದಾಖಲಿಸಿರಲಿಲ್ಲ. ಭಾನುವಾರ ಸಂಜೆ ನದಿ ದಂಡೆಗೆ ಬಂದ ಜೋಡಿ ಅಲ್ಲಿಯೇ ಊಟ ಮಾಡಿದ್ದಾರೆ. ನಮ್ಮ ಸಂಬಂಧವನ್ನು ಸಮಾಜ ಒಪ್ಪಿಕೊಳ್ಳುತ್ತಿಲ್ಲ ಅಂತಾ ಒಬ್ಬರನ್ನೊಬ್ಬರು ಒಂದೇ ದುಪ್ಪಟಾದಲ್ಲಿ ಕಟ್ಟಿಕೊಂಡು ಮಗುವಿನ ಜೊತೆ ನದಿಗೆ ಜಿಗಿದಿದ್ದಾರೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ಎಂ.ಎಸ್.ಸಿಂಗ್ ತಿಳಿಸಿದ್ದಾರೆ.
ಡೆತ್ ನೋಟ್‍ನಲ್ಲಿ ಏನಿತ್ತು: ಸಮಾಜ ನಮ್ಮನ್ನು ಬದುಕಲು ಬಿಡುತ್ತಿಲ್ಲ. ನಮ್ಮಿಬ್ಬರ ಪ್ರೀತಿ ಸಂಬಂಧವನ್ನು ಒಪ್ಪಿಕೊಳ್ಳದೇ ನಮ್ಮನ್ನು ಅವಮಾನಿಸುತ್ತಿದೆ. ಹಾಗಾಗಿ ನಾವಿಬ್ಬರೂ ಜೊತೆಯಾಗಿಯೇ ಸಾಯುತ್ತಿದ್ದೇವೆ ಎಂದು ಕಲ್ಲಿನ ಮೇಲೆ ಬರೆದಿದ್ದಾರೆ.
ಪ್ರಸ್ತುತ ಸಮಾಜದಲ್ಲಿ ಇಬ್ಬರು ಯುವತಿಯರು ಒಂದೇ ಮನೆ ಮಾಡಿಕೊಂಡು ಜೀವನ ನಡೆಸುತ್ತಿದ್ದರೆ ಅವರನ್ನು ಕೆಟ್ಟ ದೃಷ್ಟಿಕೋನದಿಂದ ನೋಡಲಾಗುತ್ತದೆ. ಆದ್ರೆ ಹುಡುಗರು ರೂಮ್ ಮಾಡಿಕೊಂಡಿದ್ದರೆ ಸಮಾಜದಲ್ಲಿ ಯಾವ ಸಮಸ್ಯೆಗಳನ್ನು ಎದುರಿಸಲ್ಲ. ಒಂದು ವೇಳೆ ಇಬ್ಬರು ಮಹಿಳೆಯರು ಒಂದೇ ಮನೆಯಲ್ಲಿದ್ದು, ಸಂಬಂಧದಲ್ಲಿ ಇದ್ದಾರೆ ಅಂತಾ ತಿಳಿದ್ರೆ ಅವರು ಎಲ್ಲರ ಬೆಂಬಲ ಕಳೆದುಕೊಳ್ಳುತ್ತಾರೆ. ಎಲ್ಲರಿಂದ ದೂರವಾದ ಬಳಿಕ ಕೊನೆದೆ ವಿಧಿ ಇಲ್ಲದೇ ಆತ್ಮಹತ್ಯೆಗೆ ಮುಂದಾಗುತ್ತಾರೆ ಅಂತಾ ಲೈಂಗಿಕ ಅಲ್ಪಸಂಖ್ಯಾತರ ಎನ್‍ಜಿಓ ಸದಸ್ಯರೊಬ್ಬರು ಅಸಮಾಧಾನ ಹೊರ ಹಾಕಿದ್ದಾರೆ.
