– ವಧುವಿನ ಪಾಲಿಗೆ ಮೊದಲರಾತ್ರಿ ಆಯ್ತು ಕರಾಳ ರಾತ್ರಿ
– ಸಂಭ್ರಮವಿದ್ದ ಮನೆಯಲ್ಲಿ ಸೂತಕದ ಛಾಯೆ
ಲಕ್ನೋ: ಫಸ್ಟ್ ನೈಟ್‍ನಲ್ಲಿ ಹೃದಯಾಘಾತದಿಂದ ವರ ಮೃತಪಟ್ಟಿದ್ದು, ಮೊದಲ ರಾತ್ರಿಯೇ ಆತನಿಗೆ ಕೊನೆ ರಾತ್ರಿ ಆದ ಘಟನೆ ಉತ್ತರ ಪ್ರದೇಶದ ರಾಯ್‍ಬರೇಲಿಯಲ್ಲಿ ನಡೆದಿದೆ.
ಶಿವ್ ಬಾಲಕ್(24) ಮೃತಪಟ್ಟ ವರ. ಫೆ.23ರಂದು ಶಿವ್ ಗದಾಗಂಜ್ ಗ್ರಾಮದ ಯುವತಿ ಜೊತೆ ಮದುವೆ ಮಾಡಿಕೊಂಡಿದ್ದನು. ಮದುವೆ ನಂತರ 24ರಂದು ವಧು ತನ್ನ ಪತಿಯ ಮನೆಗೆ ಹೋದಳು. ವಧು ಆಗಮನದಿಂದ ಮನೆಯಲ್ಲಿ ಎಲ್ಲಾ ಕಡೆ ಸಂಭ್ರಮದ ವಾತಾವರಣವಿತ್ತು.
ವಧು ಮನೆಗೆ ಆಗಮಿಸಿದ ಕಾರಣ ಸೋಮವಾರ ರಾತ್ರಿ ಮನೆಯಲ್ಲಿದ್ದ ಮಹಿಳೆಯರು ಮಂಗಳಗೀತೆ ಹಾಡುತ್ತಿದ್ದರು. ಅಲ್ಲದೆ ವಧು-ವರನಿಗೆ ಮೊದಲರಾತ್ರಿಯ ತಯಾರಿ ಕೂಡ ನಡೆದಿತ್ತು. ರಾತ್ರಿ ಸುಮಾರು 11 ಗಂಟೆಗೆ ಶಿವ್ ಆರೋಗ್ಯ ಏರುಪೇರಾಗಿ ಏಕಾಏಕಿ ಪ್ರಜ್ಞೆ ತಪ್ಪಿ ಬಿದ್ದನು. ಮೊದಲ ರಾತ್ರಿಯಲ್ಲಿ ಪತಿಯ ಸ್ಥಿತಿ ನೋಡಿ ವಧು ಜೋರಾಗಿ ಕಿರುಚಿಕೊಂಡಿದ್ದಾಳೆ.
ವಧುವಿನ ಕಿರುಚಾಟದ ಶಬ್ದ ಕೇಳಿ ಮನೆಯವರು ಓಡಿ ಬಂದಿದ್ದಾರೆ. ಶಿವ್ ಸ್ಥಿತಿ ನೋಡಿದ ಕುಟುಂಬಸ್ಥರು ತಕ್ಷಣ ಆತನನ್ನು ಖಾಸಗಿ ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಬಳಿಕ ಮತ್ತೊಂದು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಆದರೆ ಅಷ್ಟರಲ್ಲೇ ಶಿವ್ ಮೃತಪಟ್ಟಿದ್ದಾನೆ ಎಂದು ವೈದ್ಯರು ತಿಳಿಸಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯಿಸಿದ ಡಾ. ಎಮ್ಕೆ ಶರ್ಮಾ, ಹೃದಯಾಘಾತದಿಂದ ಶಿವ್ ಮೃತಪಟ್ಟಿದ್ದಾನೆ ಎಂದು ತಿಳಿಸಿದ್ದಾರೆ. ಅಲ್ಲದೆ ಪೊಲೀಸ್ ಅಧಿಕಾರಿ ರಾಮ್‍ದಾಸ್ ವರ್ಮಾ ಕೂಡ ಮಾತನಾಡಿ, ಶಿವ್ ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ವರದಿ ಬಂದ ನಂತರ ಸಾವಿಗೆ ನಿಖರ ಕಾರಣ ತಿಳಿದು ಬರಲಿದೆ ಎಂದು ಹೇಳಿದ್ದಾರೆ.
