ಜೈಪುರ: ಪತ್ನಿಯನ್ನು ಅತ್ಯಾಚಾರ ಮಾಡಿದ ಆರೋಪಿ ಮೇಲೆ ಪತಿ ಆ್ಯಸಿಡ್ ದಾಳಿ ಮಾಡಿದ ಘಟನೆ ರಾಜಸ್ಥಾನದ ಅಜ್ಮೇರ್ ನಲ್ಲಿ ನಡೆದಿದೆ.
ಸಂಜಯ್ ಅರೆಸ್ಟ್ ಆದ ಪತಿ. ಸಂಜಯ್ ಹಾಗೂ ಆರೋಪಿ ಖಿನ್ವರಾಜ್ ಇಬ್ಬರು ಸ್ನೇಹಿತರು. ಕಳೆದ ವರ್ಷ ಸಂಜಯ್ ಪತ್ನಿ ಖಿನ್ವರಾಜ್ ವಿರುದ್ಧ ಅತ್ಯಾಚಾರದ ದೂರು ದಾಖಲಿಸಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಗುರುವಾರ ನ್ಯಾಯಾಲಯದಲ್ಲಿ ಹಾಜರಾಗಿದ್ದರು. ನ್ಯಾಯಾಲಯಕ್ಕೆ ಹಾಜರಾದ ಬಳಿಕ ಇಬ್ಬರ ನಡುವೆ ಜಗಳವಾಯಿತು.
ಜಗಳವಾದ ಬಳಿಕ ಅಲ್ಲಿಂದ ಹೊರಟು ಹೋದ ಖಿನ್ವರಾಜ್ ಪೆಟ್ರೋಲ್ ಬಂಕ್‍ನಲ್ಲಿ ಪೆಟ್ರೋಲ್ ಹಾಕಿಸಿಕೊಳ್ಳಲು ನಿಂತಿದ್ದನು. ಈ ವೇಳೆ ಸಂಜಯ್ ಆತನನ್ನು ಹಿಂಬಾಲಿಸಿ ಏಕಾಏಕಿ ಆತನ ಮೇಲೆ ಆ್ಯಸಿಡ್ ಹಾಕಿದ್ದಾನೆ. ಆ್ಯಸಿಡ್ ಎಸೆದಿದ್ದಕ್ಕೆ ಪೊಲೀಸರು ಸಂಜಯ್‍ನನ್ನು ಬಂಧಿಸಿ ವಿಚಾರಣೆ ನಡೆಸುತ್ತಿದ್ದಾರೆ.
ಈ ಘಟನೆ ಸ್ಥಳದಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದೆ. ಸಂಜಯ್ ಆ್ಯಸಿಡ್ ಬಾಟಲ್‍ನ ಕ್ಯಾಪ್ ತೆರೆಯುತ್ತಿರುವುದು ಕಂಡ ಖಿನ್ವರಾಜ್ ದಾಳಿಯಿಂದ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದ್ದಾನೆ. ಆದರೆ ಅಷ್ಟರಲ್ಲೇ ಸಂಜಯ್ ಆ್ಯಸಿಡ್ ಅನ್ನು ಆತನ ಮೇಲೆ ಎಸೆದಿದ್ದಾನೆ.
ಆ್ಯಸಿಡ್ ಬಿದ್ದ ಕಾರಣ ಖಿನ್ವರಾಜ್ ಬೆನ್ನಿಗೆ ಗಂಭೀರ ಗಾಯವಾಗಿದ್ದು, ಪೆಟ್ರೋಲ್ ಬಂಕ್‍ನಲ್ಲಿದ್ದ ಜನರು ಆತನನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಿದ್ದಾರೆ. ಸದ್ಯ ಖಿನ್ವರಾಜ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾನೆ.
