ಅಹಮದಾಬಾದ್: ಕಿಸ್ ಮಾಡುವಾಗ ಬಾಯಲ್ಲಿ ಸಿಲುಕಿಕೊಂಡ ಪತ್ನಿಯ ನಾಲಿಗೆಯನ್ನೇ ಪತಿ ಕತ್ತರಿಸಿ ವಿಕೃತಿ ಮೆರೆದ ಘಟನೆ ಗುಜರಾತ್‍ನ ಜಾಹುಪ್ರ ಪ್ರದೇಶದಲ್ಲಿ ನಡೆದಿದೆ.
ಒಂದು ವಾರದ ಹಿಂದೆ ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಆರೋಪಿಯನ್ನು ಅಯ್ಯುಬ್ ಮನ್ಸೂರ್(46) ಎಂದು ಗುರುತಿಸಲಾಗಿದೆ. ಈತ ತನ್ನ ಪತ್ನಿಯ ನಾಲಿಗೆಯನ್ನು ಕತ್ತರಿಸಿ ಪರಾರಿಯಾಗಿದ್ದನು. ಆದರೆ ಈತನನ್ನು ವೆಜಲ್ಪುರ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ವಿಚಾರಣೆ ವೇಳೆ ಪತ್ನಿ ನಾಲಿಗೆ ಕತ್ತರಿಸಲು ಕಾರಣವೇನು ಎಂದು ಅಯ್ಯುಬ್ ಹೇಳಿದ್ದು, ಅದನ್ನು ಕೇಳಿ ಪೊಲೀಸರೇ ದಂಗಾಗಿದ್ದಾರೆ. ಇದನ್ನೂ ಓದಿ:ಲೈಂಗಿಕ ಕ್ರಿಯೆಗೆ ಒಪ್ಪದ್ದಕ್ಕೆ ಬೆಂಕಿ ಹಚ್ಚಿ ವಿವಾಹಿತೆಯ ಕೊಲೆ
ಕಿಸ್ ಮಾಡುವಾಗ ನಮ್ಮಿಬ್ಬರ ನಾಲಿಗೆ ಸಿಕ್ಕಿ ಹಾಕಿಕೊಂಡಿತ್ತು. ಆಗ ಅದನ್ನು ಬಿಡಿಸಲು ಬೇರೆ ದಾರಿ ತೋಚದೆ ಪತ್ನಿಯ ನಾಲಿಗೆ ಕತ್ತರಿಸಿದೆ. ಆಗ ಆಕೆಯ ಬಾಯಿಂದ ಸುರಿಯುತ್ತಿದ್ದ ರಕ್ತ ನೋಡಿ ಭಯವಾಯ್ತು, ಅದಕ್ಕೆ ಆಕೆಯನ್ನು ರೂಮಿನಲ್ಲಿ ಕೂಡಿ ಹಾಕಿ ನಾನು ಮನೆ ಬಿಟ್ಟು ಓಡಿಹೋದೆ ಎಂದು ಅಯ್ಯುಬ್ ತಪ್ಪೊಪ್ಪಿಕೊಂಡಿದ್ದಾನೆ. ಇದನ್ನೂ ಓದಿ:ಪೋರ್ನ್ ಸೈಟಿನಲ್ಲಿ ಪತ್ನಿಯ ಸೆಕ್ಸ್ ವಿಡಿಯೋ ಕಂಡು ಪತಿ ಶಾಕ್
ಘಟನೆ ಬಳಿಕ ಸಂತ್ರಸ್ತ ಮಹಿಳೆಗೆ ನೆರೆಹೊರೆ ಅವರು ಸಹಾಯಕ್ಕೆ ಬಂದಿದ್ದು, ತಕ್ಷಣ ಆಕೆಯನ್ನು ಸರ್ದಾರ್ ವಲ್ಲಬಭಾಯಿ ಪಟೇಲ್ ಆಸ್ಪತ್ರೆಗೆ ಸೇರಿಸಿದ್ದರು. ಅಲ್ಲಿ ವೈದ್ಯರು ಹರಸಾಹಸ ಪಟ್ಟು ಮಹಿಳೆಯ ಕತ್ತರಿಸಲ್ಪಟ್ಟ ನಾಲಿಗೆ ಭಾಗವನ್ನು ಶಸ್ತ್ರಚಿಕಿತ್ಸೆ ಮಾಡಿ ಮರುಜೋಡನೆ ಮಾಡಿದ್ದಾರೆ. ಸದ್ಯ ಮಹಿಳೆಗೆ ಆಹಾರ ಸೇವನೆ ಮಾಡಲು ಕಷ್ಟವಾಗುತ್ತಿದ್ದು, ವೈದ್ಯರು ಕೇವಲ ದ್ರವ ಆಹಾರವನ್ನು ಮಾತ್ರ ಸೇವಿಸಲು ಸೂಚಿಸಿದ್ದಾರೆ.
ಸಂತ್ರಸ್ತ ಮಹಿಳೆಯು ಅಯ್ಯುಬ್‍ನ ಮೂರನೇ ಪತ್ನಿಯಾಗಿದ್ದು, 2018ರಲ್ಲಿ ಆಕೆಯನ್ನು ಅಯ್ಯುಬ್ ವಿವಾಹವಾಗಿದ್ದನು. ಮದುವೆ ಆದಾಗಿನಿಂದಲೂ ಪತ್ನಿಗೆ ಆರೋಪಿ ಹೊಡಿದು, ಬಡಿದು ಕಿರುಕುಳ ನೀಡುತ್ತಿದ್ದ ಎಂದು ಸ್ವತಃ ಪತ್ನಿಯೇ ಆರೋಪಿಸಿದ್ದಾಳೆ.
ಅಲ್ಲದೆ ಆರೋಪಿ ತನ್ನ ಮೊದಲ ಪತ್ನಿಯನ್ನು ಬೆಂಕಿ ಹಚ್ಚಿ ಸುಟ್ಟು ಕೊಲೆ ಮಾಡಿರುವ ಆರೋಪ ಎದುರಿಸುತ್ತಿದ್ದು, ಆತನ ಮೇಲೆ ಈ ಸಂಬಂಧ ಪ್ರಕರಣ ಕೂಡ ದಾಖಲಾಗಿದೆ. ಹಾಗೆಯೇ ಮೊದಲ ಪತ್ನಿ ಸಾವಿನ ಬಳಿಕ ಈ ಭೂಪ ಮತ್ತೊಂದು ಮದುವೆ ಆಗಿದ್ದನು. ಆದರೆ ಅಯ್ಯುಬ್‍ನ ಕಾಟ ತಾಳಲಾರದೆ ಆಕೆ ಅವನನ್ನು ಬಿಟ್ಟು ಹೋಗಿದ್ದಳು. ಆ ಬಳಿಕ ಆರೋಪಿ ಸಂತ್ರಸ್ತೆಯನ್ನು ವರಿಸಿದ್ದನು. ಸದ್ಯ ಆರೋಪಿಯನ್ನು ಸಾಬರ್ಮತಿ ಜೈಲಿನಲ್ಲಿ ಇರಿಸಿ ವಿಚಾರಣೆ ನಡೆಸಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
